হাওৰা-শালিমাৰৰ (Howrah-Shalimar) পৰা হায়দৰাবাদলৈ ৰাওনা হোৱা ফালাকনুমা এক্সপ্ৰেছ (Falaknuma Express) ৰে’লখনৰ কপলিং ছিঙি চলন্ত অৱস্থাতেই (In a moving) দুটা ভাগত বিভক্ত (Divided into two parts) হৈ পৰে। ৰে’লৱেৰ সূত্ৰ অনুসৰি, অন্ধ্ৰপ্ৰদেশৰ শ্ৰীকাকুলাম জিলাৰ চুম্মাদেৱীৰ সমীপত সংঘটিত হয় এই ঘটনা।
প্ৰাৰম্ভিক তথ্য অনুসৰি, এ চি ডবা দুটাৰ মাজৰ কাপলিং ছিঙি যোৱাৰ ফলত ৰে’লখন দুটা ভাগত বিভক্ত হয়। কেইটামান ডবা ইঞ্জিনৰ সৈতে আগবাঢ়ি যায়। শেষৰ ডবাবোৰ পৃথক হৈ ইঞ্জিন নোহোৱাকৈ ৰে’লপথৰ কাষেৰে বহু দূৰ আগবাঢ়ি যায়। কিবা এটা হোৱা বুলি উপলব্ধি কৰি চালকে ৰে’লখন ৰখাই দিয়ে। তেতিয়ালৈকে ৰে’লখনৰ সন্মুখৰ অংশটো বাকী ডবাবোৰৰ পৰা বহু দূৰলৈ আগবাঢ়ি গৈছিল।
এজন যাত্ৰীয়ে কয় যে তেওঁৰ হঠাতে এটা জোকাৰণি অনুভৱ কৰে। ইয়াৰ পিছত তেওঁ দেখে যে ৰে’লখনৰ গতি কমি আহিছে। কিন্তু তেতিয়াও ৰে’লখনৰ যাত্ৰীসকলে বুজিব পৰা নাছিল কি হৈছে। ৰে’লখন ৰৈ যোৱাৰ লগে লগে যাত্ৰীসকল স্তম্ভিত হৈ পৰে। ৰে’লখনৰ কেইটামান ডবা ইঞ্জিনৰ সৈতে আগবাঢ়িছে। পিছফালৰ ডবাবোৰ ৰে’লৰ সন্মুখৰ ডবাবোৰৰ পৰা পৃথক হৈ গৈছে। এই ঘটনা গম পোৱাৰ লগে লগে যাত্ৰীসকলৰ মাজত আতংক বিয়পি পৰে।
অৱশ্যে এই ঘটনাত কোনো লোক আহত হোৱা নাই বুলি ৰে’লৱেৰ সূত্ৰই দাবী কৰিছে। ইফালে এই খবৰ পোৱাৰ পিছতে ৰে’লৱেৰ বিষয়া-অভিযন্তাসকলে ক্ষিপ্ৰতাৰে উক্ত স্থানত উপস্থিত হয়। মেৰামতিৰ অন্তত পুনৰ ৰে’লখনে যাত্ৰা আৰম্ভ কৰে। এই ঘটনাৰ বাবে ব্ৰহ্মপুৰ-বিশাখাপট্টনম ৰে’লপথত কেইবা ঘণ্টা ধৰি ৰে’ল চলাচল ব্যাহত হৈ পৰে। অৱশ্যে এই ঘটনা কেনেদৰে সংঘটিত হ’ল ৰে’লৱেই তাৰ তদন্ত অব্যাহত ৰাখিছে৷
