নিৰ্বাচন আয়োগে ভোটাৰ তালিকাৰ বিশেষ নিবিড় সংশোধনৰ (SIR) বাবে খচৰা তালিকাত নাম নথকা ভোটাৰক বিশেষ সুবিধা প্ৰদান কৰিব বিচাৰিছে। সেই সন্দৰ্ভত তেওঁলোকে এক নতুন অধিসূচনা জাৰি কৰিছে।
অনুপস্থিত, স্থানান্তৰিত হোৱা, মৃত আৰু ভুৱা ভোটাৰক চিনাক্ত কৰি নাম বাদ দি খচৰা তালিকা প্ৰকাশ কৰা হয়। কিন্তু খচৰা তালিকাৰ পৰা বাদ পৰা ভোটাৰসকলে চূড়ান্ত তালিকাত নাম অন্তৰ্ভুক্ত কৰাৰ সুযোগ পায়। আয়োগে দেশৰ সাতখন ৰাজ্যৰ বাবে আৰু এটা সুযোগ দিছে।
দিল্লী, মহাৰাষ্ট্ৰ, হাৰিয়ানা, অন্ধ্ৰপ্ৰদেশ, ঝাৰখণ্ড, তেলেংগানা আৰু নাগালেণ্ডত চলি আছে এছআইআৰ পৰ্যায়। আয়োগে কয় যে এই এছআইআৰ পৰ্যায়ত যাতে কোনো যোগ্য ভোটাৰৰ নাম চূড়ান্ত তালিকাৰ পৰা বাদ নপৰে তাৰ বাবে নিৰ্বাচনী বিষয়াসকলে নিশ্চিত কৰিব লাগিব। কেৱল সেয়াই নহয়, বাদ পৰা ভোটাৰসকলে যাতে নতুনকৈ নাম অন্তৰ্ভুক্ত কৰাৰ সুযোগৰ পৰা বঞ্চিত নহয়, তাৰ বাবেও আয়োগে তেওঁলোকক অনুৰোধ জনাইছে।
পূৰ্বে ভোটাৰ তালিকাত নামটো আছিল, কিন্তু এছআইআৰৰ পিছত আয়োগে প্ৰকাশ কৰা খচৰা তালিকাত দেখা গৈছে যে বহুতৰে নাম বাদ দিয়া হৈছে। আয়োগৰ নিৰ্দেশ অনুসৰি সেই ভোটাৰসকলে প্ৰ-পত্ৰ ৬ পূৰণ কৰি ভোটাৰ তালিকাত পুনৰ নাম পঞ্জীয়ন কৰিবলৈ আবেদন কৰিব পাৰে।
কিন্তু নাম বাদ পৰাৰ বহুতেই আশংকা কৰিছে যে এতিয়া তেওঁলোকৰ নাম পুনৰ পঞ্জীয়ন কৰিবলৈ প্ৰ-পত্ৰ ৬ দাখিল কৰিলে অনুশাসনমূলক ব্যৱস্থাৰ সন্মুখীন হ’বলগীয়া হ’ব পাৰে। কাৰণ নতুন ভোটাৰ হিচাপে তেওঁলোকৰ নাম পুনৰ পঞ্জীয়ন কৰিবলৈ ৬ নং ফৰ্ম জমা দিব লাগিব।
যিজন ব্যক্তিৰ নাম ইতিমধ্যে ভোটাৰ তালিকাত আছিল, তেওঁ নতুন ভোটাৰ হিচাপে কেনেদৰে আবেদন কৰিব, তাক লৈ বহুতে চিন্তিত হৈ পৰিছে। বহুতে এই প্ৰশ্নও উত্থাপন কৰিলে যে পুৰণি ভোটাৰে যদি প্ৰ-পত্ৰ ৬ পূৰণ কৰি নিজকে নতুন ভোটাৰ বুলি দাবী কৰে তেন্তে তাৰ অৰ্থ তেওঁলোকে ‘মিছা ঘোষণা’ কৰিছে। সেই সকলো সন্দেহ দূৰ কৰিছে আয়োগে। আয়োগৰ এনে দুপক্ষীয় স্থিতিৰ বিৰুদ্ধে বিৰোধীয়েও মাত মাতিছে।
দুদিনমান পূৰ্বে আয়োগে বাদ পৰা ভোটাৰক আশ্বস্ত কৰিবলৈ নিৰ্দেশিকা জাৰি কৰিছিল। বিভ্ৰান্তি দূৰ কৰি আয়োগে কয় যে যদি বাদ পৰা ভোটাৰসকলে প্ৰ-পত্ৰ ৬ পূৰণ কৰি নিজৰ নাম উঠাব বিচাৰে তেন্তে সংশ্লিষ্ট ভোটাৰৰ ঘোষণাক মিছা বুলি গণ্য কৰা নহ’ব। আচলতে তেওঁলোকৰ বিৰুদ্ধে কোনো ব্যৱস্থা গ্ৰহণ কৰা নহ’ব। সেয়ে এই বিষয়ে ভয় কৰিবলগা নাই ।
একে সময়তে আয়োগে চৰ্তও আৰোপ কৰিছে। আন কোনো লোকসভা বা বিধানসভা সমষ্টিৰ ভোটাৰ তালিকাত ব্যক্তিজনৰ নাম থাকিব নালাগে বুলিও কয়। এইবাৰ আয়োগে ৭ খন ৰাজ্যৰ ভোটাৰক নাম সংযোগ কৰাৰ আন এক সুযোগ দিছে। সেই সাতখন ৰাজ্যৰ মুখ্য নিৰ্বাচনী বিষয়ালৈ পত্ৰ প্ৰেৰণ কৰা হৈছে। ৩০ নৱেম্বৰত নাগালেণ্ড, অন্ধ্ৰপ্ৰদেশ, তেলেংগানা, মহাৰাষ্ট্ৰ আৰু হাৰিয়ানাত চূড়ান্ত তালিকা প্ৰকাশ পাব। দিল্লীত চূড়ান্ত ভোটাৰ তালিকা প্ৰকাশৰ তাৰিখ ২২ ডিচেম্বৰ নিৰ্ধাৰণ কৰা হৈছে।
