বৃহস্পতিবাৰে দিনৰ ১২ মান বজাত আৰক্ষীৰ সূত্ৰে জানিব পৰা অনুসৰি বুধবাৰে নিশা প্ৰায় ১১ বজাত বোকাজান (Bokajan) আৰক্ষী থানাৰ অধীনৰ কুলিগাঁৱত আৰক্ষীয়ে চলোৱা এক অভিযানত বৃহৎ পৰিমাণৰ নিষিদ্ধ ছেমপ্লেক্স প্লাছ কেপচুল জব্দ কৰে ৷
কুলিগাঁৱৰ এটা বাসগৃহত অভিযান চলাই এই টেবলেটসমূহ জব্দ কৰে ৷ নিচাযুক্ত ড্ৰাগছ হিচাবে ব্যৱহাৰ কৰা এই কেপচুল সমূহৰ বজাৰ মূল্য প্ৰায় ১২ লক্ষাধিক টকা হব বুলি জানিব পৰা গৈছে ৷ আৰক্ষীয়ে জব্দ কৰা ১৭,৫০০ টা কেপচুলৰ ওজন প্ৰায় ১৪ কেজি বুলি জানিব পৰা গৈছে ৷
এই সংক্ৰান্তত আৰক্ষীয়ে চাৰলংকি ৰংফাৰ নামৰ এজন যুৱকক আটক কৰে ৷ আৰক্ষীৰ সুত্ৰ অনুসৰি কোনো চুবুৰীয়া ৰাজ্যৰ পৰা বিক্ৰীৰ বাবে এই নিষিদ্ধ কেপচুল সমূহ আনিছিল আৰু প্ৰতিটো কেপচুল ৭০টকাৰ পৰা ৮০ টকাত বিক্ৰী কৰে ৷আৰক্ষীয়ে অধিক তথ্যৰ বাবে অনুসন্ধান অব্যাহত ৰাখিছে ৷
