ASSAM TIMES POST
ডিফু : কাৰবি আংলং জিলাৰ সদৰ চহৰ ডিফুত আজি পুৱাৰ ভাগত সংঘটিত হয় এক ভয়াবহ পথ দূৰ্ঘটনা ৷ প্ৰাপ্ত খবৰ অনুসৰি আজি পুৱা ৬-৩০ মান বজাত সংঘটিত হয় ভয়াবহ পথ দূৰ্ঘটনাটো ৷
প্ৰাপ্ত বাতৰি মতে ডিফুৰ পৰা লংকাৰ জেংখালৈ যাবলগীয়া ‘মেৰা ভাৰত মহান’ নামৰ এএছ ০৯ এচি ০৫২২ পঞ্জীয়ন নম্বৰৰ আল্ট্ৰাবাছখনে নিজ গন্তব্য স্থানলৈ গৈ থকা সময়ত ডিফু ৰংখেলান দিশৰ পৰা ডিফু চহৰ দিশে খোজ কাঢ়ি প্ৰাতঃভ্ৰমণ কৰি থকা অৱস্থাত এজন লোকৰ মূৰৰ ওপৰত গাড়ীখনৰ চকা উঠি যায়, ফলত লোকজনৰ থিতাতে মৃত্যু হয় বুলি স্থানীয় লোকে সন্দেহ কৰিছে ৷
অভিযুক্ত বাছখন সম্পূৰ্ণ ভূল দিশত গতি কৰিছিল বুলি দূৰ্ঘটনাৰ স্থানে নিশ্চিত কৰিছে ৷ দূৰ্ঘটনা সংগঠিত কৰিয়েই বাছ খনৰ চালক হেণ্ডিমেন পলাই যাবলৈ সক্ষম হয় যদিও বাছখন আৰক্ষীয়ে জব্দ কৰে ৷ দূৰ্ঘটনাত নিহত হোৱা লোকজনক মণিপুৰৰ চুৰাচান্দপুৰ জিলাৰ লামকা গাঁৱৰ ৰেভাৰেণ টি কামজাখা( ৫৩) বুলি চিনাক্ত কৰা হৈছে ৷
ৰেভাৰেণ টি, কামজাখাম আজি পুৱা ১০ বজাৰ পৰা ডিফুৰ ৰংচিংৰুমত আৰম্ভ হবলগীয়া কাৰবি আংলং ইভাঞ্জিকেল বাপ্তিষ্ট টাৰ্ছৰ অধিবেশনত অংশ গ্ৰহণ কৰিবলৈ আহিছিল বুলি ডিফুৰ সহচাৰ্য সকলে জানিব দিছে ৷
