বিগত কেইবছৰমানৰ পৰা কোনো অজ্ঞাত ব্যক্তিৰ দ্বাৰা (By an unknown person) লস্কৰ-ই-তৈবাৰ (Lashkar-e-Taiba) সন্ত্ৰাসবাদীৰ ইজনৰ পিছত সিজনক হত্যা (Kill the terrorists) কৰা হৈছে। সেই কথা মানি লৈছে সন্ত্ৰাসবাদী নেতা ৰিজৱান হানিফে (Rizwan Hanif)। তেওঁৰ দাবী, বিগত ৩-৪ বছৰত প্ৰায় ৩০ জন লস্কৰ সন্ত্ৰাসবাদী নিহত হৈছে। কিন্তু পাকিস্তানী সন্ত্ৰাসবাদী সংগঠনটোৱে এই হত্যাকাণ্ড কোনে সংঘটিত কৰিছে সেয়া এতিয়াও জানিব পৰা নাই।
শেহতীয়াকৈ ৰিজৱানৰ ভাষণৰ এটা ভিডিঅ’ ছ’চিয়েল মিডিয়াত ভাইৰেল হৈ পৰে। অৱশ্যে ভিডিঅ’টো কেতিয়া ৰেকৰ্ডিং কৰা হৈছিল সেয়া স্পষ্ট হোৱা নাই। ইণ্ডিয়া টুডেৰ এক প্ৰতিবেদন অনুসৰি, হয়তো সেইটো মে’ মাহত ৰেকৰ্ডিং কৰিছিল। ৰিজৱানে পাকিস্তানী সন্ত্ৰাসবাদী সংগঠন লস্কৰৰ সমৰ্থকৰ উদ্দেশ্যে বক্তব্য ৰাখি ৩০ জন লস্কৰ সন্ত্ৰাসবাদীৰ মৃত্যুৰ কথা স্বীকাৰ কৰে। বিগত কেইবছৰমানৰ পৰা লস্কৰে নিজৰ লোকচানৰ বিষয়ে ৰাজহুৱা কৰা তথ্যৰ ভিতৰত এইটো এটা ডাঙৰ স্বীকাৰোক্তি বুলি বিবেচিত হৈছে।
সমৰ্থকসকলক সম্বোধন কৰি ৰিজৱানে কয়, “যোৱা তিনি-চাৰি বছৰত আমাৰ ৩০ জনতকৈ অধিক সতীৰ্থক হত্যা কৰা হৈছে।” তেওঁ দাবী কৰে যে পেছোৱাৰ, কৰাচী, ৰাৱালপিণ্ডি, মুজাফ্ফৰাবাদ, ৰাৱালকোটকে ধৰি পাকিস্তানৰ বিভিন্ন চহৰত লস্কৰৰ সদস্যক আক্ৰমণ কৰা হৈছে। এই অচিনাকি ব্যক্তিৰ হাতত ইজনৰ পিছত সিজনকৈ লস্কৰ সন্ত্ৰাসবাদীৰ মৃত্যুত ‘ভাৰতৰ হাত’ থাকিব পাৰে বুলিও দাবী কৰে লস্কৰ নেতাগৰাকীয়ে।
ৰিজৱানৰ ভাষণত পাক অধিকৃত কাশ্মীৰৰ বিষয়টোও উত্থাপন হয়। ভিডিঅ’টোত তেওঁ দাবী কৰিছে, “ভাৰতীয় চোৰাংচোৱাই আমাৰ মানুহক কাশ্মীৰত শান্তিৰে থাকিবলৈ নিদিয়ে।” ৰিজৱানে ভিডিঅ’টোত দাবী কৰিছে যে ভাৰতীয় এজেণ্টৰ দ্বাৰাই লস্কৰ সন্ত্ৰাসবাদীক হত্যা কৰা হৈছে। উল্লেখ্য যে পাকিস্তান চৰকাৰেও পূর্বে বিভিন্ন সময়ত পাকিস্তানৰ মাটিত হত্যাকাণ্ডৰ বাবে দিল্লীৰ ওপৰত প্রশ্ন উত্থাপন কৰি আহিছে৷ কিন্তু ভাৰতে আৰম্ভণিৰে পৰা এনে অভিযোগ অস্বীকাৰ কৰি আহিছে।
উল্লেখ্য যে যোৱা বছৰৰ এপ্ৰিল মাহত লাহোৰত কোনো অজ্ঞাত পৰিচয়ৰ ব্যক্তিয়ে লস্কৰৰ প্ৰতিষ্ঠাপক সন্ত্ৰাসবাদী সদস্য আমিৰ হামজাৰ ওপৰত গুলীচালনা কৰিছিল। গুৰুতৰভাৱে আঘাতপ্ৰাপ্ত হামজাক চিকিৎসালয়ত ভৰ্তি কৰোৱা হয়। স্থানীয় কেইবাটাও সংবাদ মাধ্যমৰ বাতৰি অনুসৰি, সেইদিনা লাহোৰৰ সংবাদ মাধ্যমৰ কাৰ্যালয়ৰ সন্মুখত তেওঁক গুলী কৰা হৈছিল।
