‘ডিজিটেল গ্ৰেপ্তাৰ’ৰ (Digital Arrest) জালত পৰি মুম্বাইৰ এগৰাকী যুৱতী (Young girl from Mumbai)য়ে হেৰুৱালে ১ লাখ ৭৮ হাজাৰ টকা (Rs 1,78,000 lost)। অভিযোগ অনুসৰি, দিল্লী আৰক্ষীৰ পৰিচয় ব্যৱহাৰ কৰি মুম্বাইৰ এখন হোটেলত ছাব্বিশ বছৰীয়া যুৱতীগৰাকীক ‘ডিজিটেলি গ্ৰেপ্তাৰ’ কৰে। তাতে যুৱতীগৰাকীয়ে প্ৰৱঞ্চকে দিয়া বেংক একাউণ্টলৈ ১ লাখ ৭৮ হাজাৰ টকা পঠিয়াবলৈ বাধ্য হয়। আনকি কাপোৰ খুলিবলৈও বাধ্য হোৱা বুলি অভিযোগ উঠিছে। এই ঘটনা যোৱা ১৯-২০ নৱেম্বৰত মুম্বাইৰ এখন হোটেলত সংঘটিত হয়। যুৱতীগৰাকীয়ে বৃহস্পতিবাৰে আৰক্ষীক এই সন্দৰ্ভত অভিযোগ দাখিল কৰে। নিৰ্যাতন আৰু ধনদাবীৰ অভিযোগত দাখিল কৰা হৈছে এফআইআৰ। আৰক্ষীয়ে তথ্য প্ৰযুক্তি আইন আৰু ভাৰতীয় দণ্ডবিধিৰ একাধিক ধাৰাত গোচৰ ৰুজু কৰিছে।
অভিযোগকাৰী মুম্বাইৰ এটা ব্যক্তিগত কোম্পানীত কৰ্মৰত। চাইবাৰ প্ৰৱঞ্চকে দিল্লী আৰক্ষীৰ ভুৱা পৰিচয় দি তেওঁক ফোন কৰে। যুৱতীগৰাকীক আৰ্থিক জালিয়াতিৰ গোচৰত অভিযুক্ত বুলি অৱগত কৰা হয়। অভিযোগ অনুসৰি, যুৱতীগৰাকীক একাধিক মোবাইল নম্বৰ ব্যৱহাৰ কৰি ভাবুকি প্ৰদান কৰে। আনকি ‘ভাৰ্চুৱেল জেৰা’ৰ বাবে মুম্বাইৰ এখন হোটেলত এটা কোঠা ভাড়ালৈ ল’বলৈও বাধ্য কৰে।
ইয়াৰ পিছতে তেওঁক হোটেলৰ কোঠালৈ ভিডিঅ’ কল কৰি বিভিন্ন ধৰণে ভাবুকি আৰু হাৰাশাস্তি কৰা হয়। বেংক একাউণ্ট ভেৰিফিকেচনৰ নামত তেওঁৰ একাউণ্টৰ পৰা ১ লাখ ৭৮ হাজাৰ টকা চুৰি হোৱা বুলি অভিযোগ কৰে যুৱতীগৰাকীয়ে। ‘অভিযুক্তৰ শৰীৰ চিনাক্তকৰণ’ৰ বাবেই তেওঁক কাপোৰ খুলিবলৈ বাধ্য কৰা হয় বুলি অভিযোগ কৰে যুৱতীগৰাকীয়ে।
যুৱতীগৰাকীয়ে বৃহস্পতিবাৰে মুম্বাইৰ দহিছাৰ আৰক্ষী থানাত এজাহাৰ দাখিল কৰে। প্ৰথম অৱস্থাত দহিছাৰ আৰক্ষী থানাই তদন্ত চলাই আছিল। পিছত আন্ধেৰী আৰক্ষীক গতাই দিয়া হয়। বৰ্তমান আন্ধেৰী আৰক্ষীয়ে অভিযুক্তক চিনাক্ত কৰাৰ চেষ্টা চলাইছে।
উল্লেখযোগ্য যে চাইবাৰ প্ৰৱঞ্চকৰ বাবে এতিয়া উপলব্ধ অস্ত্ৰৰ ভিতৰত এটা হ’ল ‘ডিজিটেল গ্ৰেপ্তাৰ’। শেহতীয়াকৈ ‘ডিজিটেল গ্ৰেপ্তাৰ’ৰ হাৰ বৃদ্ধি পোৱাৰ বাবে চিন্তিত হৈ পৰিছে কেন্দ্ৰও। প্ৰধানমন্ত্ৰী নৰেন্দ্ৰ মোডীয়েও দেশবাসীক এই প্ৰতাৰণা পদ্ধতি সন্দৰ্ভত সকীয়াই দিছে। যোৱা মাহত প্ৰধানমন্ত্ৰীয়ে ‘মন কি বাত’ কাৰ্যসূচীত কৈছিল যে ‘ডিজিটেল গ্ৰেপ্তাৰ’ বুলি কোনো কথা নাই। তেওঁ লগতে সকীয়াই দিয়ে যে দেশৰ কোনো আইনতে তেনেকুৱা গ্ৰেপ্তাৰ নাই। এনে প্ৰৱঞ্চনামূলক ফোন কলৰ প্ৰতি অযথা ভয় নকৰাকৈ মূৰটো শীতল কৰি ৰখাৰ পদক্ষেপৰ পৰামৰ্শও আগবঢ়ায়।
