অসম বিশ্ববিদ্যালয় ডিফু চৌহদ (Assam University Diphu Campus)ত আজি ছাত্র-ছাত্রীয়ে ধর্ণা প্রদর্শন কৰে। বিশ্ববিদ্যালয়খনৰ মূল প্রৱেশ দ্বাৰত বিভিন্ন দাবী পূৰণৰ বাবে ছাত্র একতা সভাৰ উদ্যোগত ধর্ণা কার্যসূচী ৰূপায়ণ কৰে ছাত্র-ছাত্রীসকলে। ছাত্র সংগঠনৰ নেতাই সাংবাদিকৰ আগত কয় যে- বিশ্ববিদ্যালয়খনত নামভর্তিকৰণৰ সমস্যা উদ্ভব হৈছে। ২০২৪-২৫ বর্ষৰ বাবে খালী থকা আসনসমূহত ছাত্র-ছাত্রী ভর্তি কৰাৰ দাবী উত্থাপন কৰে। বিশ্ববিদ্যালয়খনত অধ্যয়নৰত ছাত্র-ছাত্রীসকলৰ বাবে পর্যাপ্ত বাছ সেৱা যোগান ধৰাৰ দাবী জনায়।
বিশ্ববিদ্যালয়খনলৈ ছাত্র-ছাত্রী অহা-যোৱাৰ বাবে পর্যাপ্ত বাছ সেৱা উপলব্ধ নাই বুলি প্রতিবাদী ছাত্রসকলে অভিযোগ কৰে৷ পৰীক্ষাৰ সময়ত বাছ সেৱা পর্যাপ্ত নথকাৰ বাবে ছাত্র-ছাত্রীসকলে যথেষ্ট অসুবিধাৰ সন্মুখীন হ’ব লগা হয় বুলি অভিযোগ কৰে। বিশ্ববিদ্যালয়খনৰ চৌহদত আজিলৈকে এখন খেলপথাৰ নাই বুলি উল্লেখ কৰি ক্রীড়া সপ্তাহৰ সময়ত ছাত্র-ছাত্রীসকলে আন বিদ্যালয়- মহাবিদ্যালয় অথবা কাৰ্বি আংলং ক্রীড়া সন্থাৰ খেলপথাৰ ব্যৱহাৰ কৰিব লাগে বুলিও অভিযোগ কৰে। বিশ্ববিদ্যালয় চৌহদখনত ছাত্র আৱাস নথকাৰ কথা উল্লেখ কৰি কয় যে, ২০২১ চনত ছাত্রবাস নির্মাণ কৰা হৈছে যদিও আজিলৈকে ছাত্রবাসটো মুকলি কৰা নহ’ল। ছাত্রবাসটোত আজিলৈকে কোনো আচবাব প্রদান কৰা নহ’ল বুলিও অভিযোগ কৰে।
আনহাতে, ছাত্রী আবাস ২০২৪ চনত নির্মাণ সম্পূর্ণ হ’ল লাগিছিল যদিও আজিলৈকে, ছাত্র আৱাস নির্মাণ সম্পূর্ণ নহ’ল। এতিয়া ঠিকাৰ কাম লাভ কৰা ঠিকাদাৰী প্রতিষ্ঠানে এই আৱাস ২০২৫ চনৰ জানুৱাৰীতহে নির্মাণ সম্পূর্ণ হ’ব বুলি কোৱা কার্যক ছাত্র সংগঠনটোৱে অগ্রাহ্য কৰে। বিশ্ববিদ্যালয় চৌহদত ছাত্র-ছাত্রী অনুপাতে অধ্যাপকৰ সংখ্যা যথেষ্ট কম বুলি অভিযোগ কৰি কয় যে, ছাত্র-ছাত্রী অনুপাতে চৌহদটোত শিক্ষকৰ সংখ্যা যথেষ্ট কম। যাৰ ফলত ছাত্র-ছাত্রীসকল প্রকৃত শিক্ষা লাভৰ পৰা বঞ্চিত হ’ব লগা হৈছে। ৭০-৮০ ছাত্র-ছাত্রীৰ বিপৰীতে কেৱল এগবাকী শিক্ষক থকা বুলি ছাত্র সংগঠনটোৰ নেতৃবর্গই অভিযোগ কৰে ।
ছাত্র শিক্ষকৰ অনুপাত যথেষ্ট কম বুলি অভিযোগ কৰি অতিশীঘ্রে শিক্ষক নিযুক্তিৰ দাবী তোলে বিশ্ববিদ্যালয়খনৰ ছাত্র একতা সভাই। তেওঁলোকৰ দাবী পূৰণ নহ’লে অনির্দিষ্টকালীন ধর্মঘট পালন কৰিবলৈ বাধ্য হ’ব বুলিও ছাত্র সংগঠনটোৱে হুংকাৰ দিয়ে। উল্লেখ্য যে অসম বিশ্ববিদ্যালয় ডিফু চৌহদ স্থাপিত হোবাব সময়ৰে পৰা ডিফু চৌহদত শিক্ষকৰ অনুপাত যথেষ্ট কম বুলি অভিযোগ উত্থাপিত হৈ আহিছে যদিও অসম বিশ্ববিদ্যালয় কর্তৃপক্ষই কোনো গুৰুত্ব দিয়া পৰিলক্ষিত হোৱা নাই। ছাত্র সংগঠনটোৰ আজিৰ পৰা হোৱা এই আন্দোলনে কর্তৃপক্ষৰ মাজত কিমান প্রভাব পেলায় সেয়া লক্ষ্যণীয় হ’ব।
