দেওবাৰে পুৱা ১০ মান বজাত অসম বিশ্ববিদ্যালয় ডিফু চৌহদৰ উদ্যোগ (Assam University Diphu Campus Initiative)ত বিশ্ববিদ্যালয়খনৰ বাৰ্ষিক ইউনিভাৰচিটি সপ্তাহ উদযাপন (Annual Week of Assam University) কৰা হয় ৷ ২০ মে’ৰ পৰা ২৬ মে’লৈকে চলিব এই কাৰ্যসূচী৷ শুভাৰম্ভনি কাৰ্যসূচী অনুসৰি আজি পুৱাৰ ভাগত বিশ্ববিদ্যালয়খনৰ শতাধিক ছাত্ৰ-ছাত্ৰীয়ে পৰাম্পৰাগত সাজ-পাৰ পৰিধান কৰি ডিফু চৰকাৰী বালক উচ্চতৰ মাধ্যমিক বিদ্যালয়ৰ খেলপথাৰত উপস্থিত হৈ ডিফু চহৰৰ মাজেৰে এক বৰ্ণাঢ্য সাংস্কৃতিক শোভাযাত্ৰা (Cultural procession) উলিয়ায়৷
ডিফু কাছা খেলপথাৰত এই শোভাযাত্ৰাৰ সামৰণি পৰে৷ বিশ্ববিদ্যালয়খনৰ ১০ টা বিভাগে বিভিন্ন থীমলৈ শোভাযাত্ৰাত অংশ গ্ৰহণ কৰে৷ “সাংস্কৃতিক বৈচিত্ৰ আৰু ঐক্য” মূল থীম হিছাপে লৈ ইউনিভাৰচিটি সপ্তাহ উদযাপন কৰা হৈছে বুলি জানিব পৰা গৈছে৷
ইয়াৰোপৰি প্ৰতিটো বিভাগৰ অংশ গ্ৰহণকাৰী ছাত্ৰ-ছাত্ৰীৰ প্ৰদৰ্শন বিভাগ সমূহৰ শিক্ষক সকলে নিৰিক্ষণ কৰি সামৰণি অনুষ্ঠানত পুৰষ্কৃত কৰা হব বুলি ছাত্ৰ একতা সভাৰ নেতা সকলে জানিবলৈ দিছে ৷
