দেশৰ মুখ্য নিৰ্বাচন আয়ুক্ত জ্ঞানেশ কুমাৰক অপসাৰণৰ দাবীত ককৰোচ জনতা পাৰ্টীৰ লগতে বিৰোধী দলসমূহেও প্ৰতিবাদত যোগদান কৰিছে। বাৰে বাৰে আঙুলি টোঁৱাইছে নৰেন্দ্ৰ মোদী চৰকাৰৰ ফালে। এনে পৰিস্থিতিত প্ৰধানমন্ত্ৰীয়ে এটা অনুষ্ঠানত ‘বিভাজন শক্তি’ৰ কথা উল্লেখ কৰে। ইয়াৰ বিৰুদ্ধে তেওঁ ‘অখণ্ডতা’ বজাই ৰখাৰ বাৰ্তা দিয়ে। শুকুৰবাৰৰ পৰা দিল্লীত আৰম্ভ হৈছে ‘চিন্ময় অমৃত মহোৎসৱ গ্ল’বেল কনফাৰেন্স’। তিনিদিন ধৰি চলিবলগা এই সন্মিলনত দেশ-বিদেশৰ পৰা প্ৰায় ৯০০০ লোকে যোগদান কৰিছে। তাত উপস্থিত হৈ মোদীয়ে কয় যে চিন্ময় মিছন কোনো প্ৰতিষ্ঠান নহয়, বৰঞ্চ এটা ধাৰণাহে। ইয়াৰ পিছত তেওঁ বিভাজন শক্তিৰ বিষয়ে এটা বাৰ্তা দিয়।
তেওঁ কয়, “যি শক্তিয়ে আমাৰ মাজত বিভাজনৰ সৃষ্টি কৰিব বিচাৰে, সমগ্ৰ সমাজখনে ইয়াৰ বিৰুদ্ধে একত্ৰিত হ’ব লাগিব।” ইয়াৰ পিছত তেওঁ কয়, “২০৪৭ চনৰ ভিতৰত এখন উন্নত ভাৰত গঢ়ি তোলাৰ সংকল্পৰ সৈতে প্ৰতিজন ব্যক্তি জড়িত হ’ব লাগিব। তাৰ বাবে আমি অধিক সক্ৰিয় হ’ব লাগিব।” ১৯৫১ চনত গঠন হোৱা চিন্ময়ানন্দ মিছনৰ উদ্দেশ্য আছিল ভাগৱত আৰু বেদান্তক সকলোৰে বাবে সহজভাৱে সুলভ কৰি তোলা। স্বামী চিন্ময়ানন্দই সেই কাৰ্যসূচী আৰম্ভ কৰিছিল। সেই বিষয়টো শুকুৰবাৰে দিল্লীত আলোকপাত কৰে প্ৰধানমন্ত্ৰীয়ে। লগতে সংগঠনটোৰ সদস্যসকলক অভিনন্দন জ্ঞাপন কৰে। প্ৰধানমন্ত্ৰীৰ মতে, চিন্ময়ানন্দই আধ্যাত্মিকতাৰ লগতে যিবোৰক অগ্ৰাধিকাৰ দিয়া উচিত তেনে বিষয়সমূহৰ বিষয়েও কয়।
