এইবাৰ খোদ বিত্তমন্ত্ৰী নিৰ্মলা সীতাৰমন (Finance Minister Nirmala Sitharaman)ৰ বিৰুদ্ধে উঠিছে ধনদাবীৰ অভিযোগ (Allegations of extortion)। অভিযোগ অনুসৰি, তেওঁ নিৰ্বাচনী বণ্ডৰ জৰিয়তে (through electoral bonds) বিজেপিৰ বাবে ধন সংগ্ৰহ (Fundraising) কৰিছিল। আনকি এই কাম কৰিবলৈ তেওঁ ইডি আৰু আয়কৰ বিভাগকো ব্যৱহাৰ কৰিছিল। বাংগালুৰুৰ এখন আদালতে বিত্তমন্ত্ৰীগৰাকীৰ বিৰুদ্ধে এই গুৰুতৰ অভিযোগত এফআইআৰ দাখিল কৰিবলৈ আৰক্ষীক নিৰ্দেশ দিছে।
জনাধিকাৰ সংঘৰ্ষ সংগঠন নামৰ এটা বেচৰকাৰী সংস্থাৰ উপ-সভাপতি আদৰ্শ আয়াৰে বিত্তমন্ত্ৰীৰ লগতে আন কেইবাজনো লোকৰ বিৰুদ্ধে ধনদাবীৰ অভিযোগত এজাহাৰ দাখিল কৰে। শুকুৰবাৰে শুনানিৰ সময়ত ন্যায়াধীশগৰাকীয়ে দাখিল কৰা আবেদনৰ ভিত্তিত এই নিৰ্দেশ দিয়ে। আবেদনখনত ইডি, ভাৰতীয় জনতা পাৰ্টিৰ মুৰব্বী জে পি নাড্ডা, কৰ্ণাটক বিজেপিৰ মুৰব্বী বিজয়েন্দ্ৰ আৰু বিজেপিৰ প্ৰাক্তন সাংসদ নলিন কুমাৰ কাটিলৰ নামো উল্লেখ কৰা হৈছে। আদৰ্শৰ অভিযোগ যে ইয়াৰ লগত বহু প্ৰভাৱশালী লোক জড়িত হৈ আছে।
কিন্তু ৰাষ্ট্ৰপতিৰ অনুমোদন অবিহনে আৰক্ষীয়ে বিত্তমন্ত্ৰীৰ বিৰুদ্ধে এফআইআৰ দাখিল কৰিব পাৰিবনে নোৱাৰে আৰু ৰাষ্ট্ৰপতিৰ অনুমতি অবিহনে তদন্ত কৰিব পাৰেনে নোৱাৰে সেয়া স্পষ্ট হোৱা নাই। আনহাতে, বিজয়েন্দ্ৰৰ ক্ষেত্ৰত যিহেতু তেওঁ এজন বিধায়ক, গতিকে নিয়ম অনুসৰি কৰ্ণাটকৰ ৰাজ্যপালৰ পৰা অনুমোদন আহিব লাগিব।
উল্লেখ্য যে ২০১৭ চনত বিত্ত আইনৰ জৰিয়তে নিৰ্বাচনী বণ্ড আঁচনি প্ৰৱৰ্তন কৰা হৈছিল। ২০২৪ চনৰ ফেব্ৰুৱাৰী মাহত উচ্চতম ন্যায়ালয়ে ইয়াক অসাংবিধানিক বুলি ঘোষণা কৰিছিল। আদালতৰ নিৰ্দেশত নিৰ্বাচনী বণ্ড সন্দৰ্ভত ব্যৱসায়ী আৰু ঔদ্যোগিক কোম্পানীসমূহৰ পৰা দলসমূহে কিমান ধন লাভ কৰিছে তাৰ তালিকা প্ৰকাশ কৰিছে এছ বি আয়ে। তাত দেখা গৈছে যে মুঠতে বিজেপিয়ে ৬,০৬১ কোটি, তৃণমূলে ১,৬১০ কোটি আৰু কংগ্ৰেছে ১,৪২২ কোটি টকা নিৰ্বাচনী বণ্ডৰ জৰিয়তে লাভ কৰিছিল। বিৰোধীয়ে অভিযোগ উত্থাপন কৰে যে বিজেপিয়ে এই বণ্ডসমূহৰ শোষণ কৰি নিৰ্বাচনত কেন্দ্ৰীয় সংস্থাসমূহ ব্যৱহাৰ কৰিছিল।
আনহাতে, আদালতে কয় যে কেৱল নিৰ্মলা সীতাৰমণেই নহয়, আন সংগীসকলৰ বিৰুদ্ধেও এফআইআৰ দাখিল কৰিব লাগে। আগন্তুক তিনিমাহৰ ভিতৰত আৰক্ষীয়ে তদন্তৰ প্ৰতিবেদন দাখিল কৰিব লাগিব।
