ASSAM TIMES POST
ডিফুঃ শিশুৰ মানসিকতা স্খলনৰ এক ভয়ানক ঘটনা পোহৰলৈ আহিছে কাৰবি আংলঙৰ বকলিয়াঘাটত৷ উক্ত ঘটনাই সচেতন মহলত জোকাৰণিৰ সৃষ্টি কৰিছে৷
প্ৰাপ্ত খবৰ অনুসৰি বকলিয়াঘাট আৰক্ষী থানাৰ অন্তৰ্গত ৰজাপথাৰ ধৰমতুলত এটি বিকৃত মানসিকতা থকা শিশুৰ যৌন নিৰ্যাতনৰ বলী হৈ অসুস্থ হৈ পৰে এটি ফুলকুমলীয়া কণ্যা শিশু৷ ঘটনাৰ বিৱৰণী অনুসৰি কালি দুপৰীয়াৰ ভাগত ঘৰত কোনো নথকাৰ সুযোগতে কণমানিজনীৰ ঘৰত প্ৰৱেশ কৰি কিশোৰটিয়ে এই জঘন্য কাণ্ড সংঘটিত কৰে৷
ঘটনা সংঘটিত কৰাৰ পিছত শিশুটি গুৰুতৰভাবে অসুস্থ হৈ পৰাৰ ফলত শিশুটিক লগে লগে ডিফু চিকিৎসালয়ত ভৰ্তি কৰাৰ পিছতহে ঘটনাটো পোহৰলৈ আহে৷ বকলিয়াঘাট আৰক্ষীয়ে ঘটনাত জৰিত কিশোৰটোক নিশাই ধৰমতুল ঘৰৰ পৰা আনি বকলিয়াঘাট থানাত ৰাখি ০২/২০ নম্বৰত ভাৰতীয় পস্ক’ আইনৰ অধীনত এক গোছৰ ৰুজো কৰে৷
এটি কণমানি শিশুৰ ক্ষেত্ৰত কল্পনাও কৰিব নোৱাৰা এনে ঘটনাই সামপ্ৰতিক সমাজত শিশু মানসিকতা সন্দৰ্ভতো গুৰুত্ব পূৰ্ণ প্ৰশ্ন অৱতাৰণা কৰাৰ লগতে বিজ্ঞান আৰু প্ৰযুক্তি বিদ্যাৰ বহুল প্ৰচাৰৰ সময়তো নেতিবাচক প্ৰভাৱ পৰাটো তাৎপৰ্যপূৰ্ণ বিবেচিত হৈছে৷
