দিল্লীৰ মুখ্যমন্ত্ৰী (Chief Minister of Delhi) তথা আম আদমী পাৰ্টীৰ মুৰব্বী অৰবিন্দ কেজৰিৱালে (Arvind Kejriwal) সকাহ নাপালে উচ্চতম ন্যায়ালয়ৰ পৰা। যাৰ বাবে সম্প্ৰতি তেওঁ জে’লতে থাকিব লাগিব। বুধবাৰে কেজৰিৱালৰ অন্তৱৰ্তীকালীন জামিন আবেদন (Interim bail plea)ৰ শুনানি গ্ৰহণ নকৰিলে (Did not hold a hearing) উচ্চতম ন্যায়ালয়ে (Supreme Court)। এই গোচৰত কেন্দ্ৰীয় তদন্তকাৰী সংস্থা চিবিআইৰ বক্তব্য বিচাৰিছে উচ্চতম ন্যায়ালয়ে। গোচৰটোৰ পৰৱৰ্তী শুনানি ২৩ আগষ্টত অনুষ্ঠিত হ’ব। উক্ত দিনত কেজৰিৱালৰ জামিন সন্দৰ্ভত চিবিআয়ে বিবৃতি দিব লাগিব।
উল্লেখ্য, দিল্লী আবকাৰী গোচৰত কেজৰিৱালক গ্ৰেপ্তাৰ কৰিছিল ইডিয়ে। জে’লত থকাৰ সময়ত একেটা গোচৰতে চিবিআয়ে গ্ৰেপ্তাৰ কৰে তেওঁক। উক্ত গোচৰৰ জামিন বিচাৰি দিল্লী উচ্চ ন্যায়ালয়ৰ কাষ চাপিছিল কেজৰিৱালে। ৫ আগষ্টত কেজৰিৱাল গোচৰৰ শুনানিৰ সময়ত ন্যায়াধীশ নীনা বানছাল কৃষ্ণৰ বিচাৰপীঠে পৰ্যবেক্ষণ কৰে যে গ্ৰেপ্তাৰৰ আঁৰত চিবিআইৰ ‘ন্যায্য’ কাৰণ আছে। গতিকে কেন্দ্ৰীয় তদন্তকাৰী সংস্থাৰ এই কাৰ্যক কেতিয়াও অবৈধ বুলি ক’ব নোৱাৰি। একে সময়তে দিল্লী উচ্চ ন্যায়ালয়ে কেজৰিৱালৰ জামিন আবেদনৰ গোচৰটো নিষ্পত্তি কৰিছে।
আনহাতে, উচ্চ ন্যায়ালয়ে তেওঁৰ জামিন আবেদন নাকচ কৰাৰ পিছতে যোৱা ১২ আগষ্টত উচ্চতম ন্যায়ালয়ৰ কাষ চাপে দিল্লীৰ মুখ্যমন্ত্ৰী। বুধবাৰে উচ্চতম ন্যায়ালয়ৰ ন্যায়াধীশ সূৰ্য্য কান্তৰ বিচাৰপীঠত কেজৰিৱালৰ অধিবক্তা অভিষেক মনু সিংভীয়ে কয় যে ১০ মে’ত আবকাৰী গোচৰত কেজৰিৱালক অন্তৱৰ্তীকালীন জামিন দিয়া হৈছিল। পিছত জুলাই মাহত তেওঁ একেটা গোচৰতে জামিন লাভ কৰে। আনকি নিম্ন আদালতেও চিবিআইৰ গোচৰত কেজৰিৱালক জামিন মঞ্জুৰ কৰিছিল। ইয়াৰ উপৰি চিবিআইৰ গ্ৰেপ্তাৰক উচ্চতম ন্যায়ালয়ত ‘অবৈধ’ বুলিও উল্লেখ কৰা হৈছিল।
আদালতত কেজৰিৱালৰ অধিবক্তাই কয় যে আবকাৰী গোচৰ ৰুজু হোৱাৰ এবছৰ ১০ মাহৰ পাছত চিবিআয়ে তেওঁৰ মক্কেলক গ্ৰেপ্তাৰ কৰে। ইয়াৰ পিছত কেজৰিৱালে অন্তৱৰ্তীকালীন জামিনৰ বাবে আবেদন জনায়। কিন্তু উচ্চতম ন্যায়ালয়ে নাকচ কৰে। ন্যায়াধীশ সূৰ্য্য কান্তৰ বিচাৰপীঠে কয়, “অন্তৱৰ্তীকালীন জামিনৰ কথা নক’ব। আমি কোনো অন্তৱৰ্তীকালীন জামিন নিদিওঁ।”
