ASSAM TIMES POST
ডিফুঃ অসমৰ জনতাৰ হাজাৰ প্ৰতিৰোধ, প্ৰতিবাদক সম্পূৰ্ণৰূপে নস্যাৎ কৰি কেন্দ্ৰীয় চৰকাৰে অসমীয়া জাতিধ্বংসী হিচাপে অভিহিত হোৱা নাগৰিকত্ব সংশোধিত আইন কাৰ্যকৰী কৰিবলৈ আগবঢ়াৰ সমানুপতিকভাৱে চৰকাৰখনৰ এনে বিপৰীত স্থিতিৰ বিৰুদ্ধে ক্ষোভত দুগুণে জ্বলিছে সাধাৰণ জনতা।
বহু বিতৰ্কিত আইনখন বাতিলৰ দাবীত জোৰদাৰ আন্দোলন চলাই অহা আছু আৰু ত্ৰিশটা সংগঠনৰ আহ্বানক্ৰমে আজি কাৰ্বি আংলং জিলাৰ ডিফু, বকলীয়াঘাট, বোকাজান আৰু পাৰখোৱাত হাজাৰ হাজাৰ লোক ৰাজপথলৈ ওলাই আহি সাব্যস্ত কৰে উত্তাল প্ৰতিবাদ। সন্ধিয়া প্ৰায় পাঁচ বজাত উল্লিখিত আটাইকেইটা স্থানতে কেইবা হাজাৰ লোকে হাতে হাতে অগ্নিশিখা লৈ ’অহ’’ ধ্বনিৰে চৰকাৰৰ জনবিৰোধী স্থিতিৰ বিৰুদ্ধে দিয়ে বজ্ৰহুংকাৰ ধ্বনি । ’আহ ঐ আহ, ওলাই আহ’, ’খেদ ঐ খেদ বিদেশী খেদ’, ’ৰাইজ আজি ৰাজপথত সৰ্বা তোমাৰ কাম নাই’, ’নৰেন্দ্ৰ মোডী গ’ বেক’, অমিত শ্বাহ গ’ বেক’, ’আছে গৰু নেবাই হাল, সৰ্বা তুমি নোহোৱাই ভাল’ ধ্বনিৰে উত্তাল কৰি তোলে পৰিৱেশ।
আজিৰ প্ৰতিবাদী সমদলত বিভিন্ন জনগোষ্ঠীয় লোকসকলৰ লগতে বেংগলী, হিন্দীভাষী সম্প্ৰদায়ৰ লোক ৰাজপথলৈ ওলাই আহি ’কা’ বাতিলৰ দাবী জনায় । আনহাতে পাহাৰীয়া জিলাৰ সদৰ চহৰ ডিফুত আছুৰ কাৰবি আংলং জিলা সমিতিৰ সাধাৰণ সম্পাদক সৰ্জোণ হাঞ্চেই সাংবাদিকৰ আগত কয়যে , পাৰ্বত্য জিলাত ‘কা’ বিৰোধী আন্দোলন নিশকতীয়া বুলি মন্তব্য কৰা মন্ত্ৰী হিমন্ত বিশ্ব শৰ্মাই জনা উচিত যে যোৱা ১০ ডিচেম্বৰত মন্ত্ৰী গৰাকী ডিফুলৈ আহোঁতে আছুৱে তেওঁক ক’লা কাপোৰেৰে আদৰণি জনাইছিলোঁ ৷ গতিকে সেই স্মৃতিযেন হিমন্ত বিশ্ব শৰ্মাই পাহৰি নাযায় ৷
