অসম আৰু মেঘালয়ত (Assam and Meghalaya) ধাৰাসাৰৰ পৰা অতি ধাৰাসাৰ বৰষুণৰ চূড়ান্ত সতৰ্কবাণী (warning of heavy rains) জাৰি কৰা হৈছে। আনহাতে, অৰুণাচল প্ৰদেশতো ধাৰাসাৰ বৰষুণৰ সম্ভাৱনা ব্যক্ত কৰা হৈছে। বতৰ বিভাগৰ তথ্য অনুসৰি, উত্তৰ-পূব ভাৰতৰ লগতে উত্তৰ-পশ্চিম আৰু পূব ভাৰততো আগন্তুক ৪-৫ দিনলৈ প্ৰবলৰ পৰা অতি প্ৰবল বৰষুণ হ’ব।
বতৰ বিভাগে লগতে জনাইছে যে অহা ৫ জুলাইত জম্মু-হিমাচল প্ৰদেশত কিছু অঞ্চলত ধাৰাসাৰ বৰষুণ হ’ব। উত্তৰাখণ্ড আৰু পঞ্জাবত অহা ৭ জুলাইলৈকে ধাৰাসাৰ বৰষুণৰ সম্ভাৱনা আছে। আনহাতে, অহা ৬ জুলাইলৈকে উত্তৰ প্ৰদেশত ধাৰাসাৰ বৰষুণ হ’ব।
একেদৰে পূব ভাৰতৰ ৰাজ্যসমূহতো প্ৰবল বৰষুণৰ আশংকা কৰা হৈছে। বিহাৰ, পশ্চিমবংগ আৰু ছিকিমৰ কিছু অঞ্চলত ৬ জুলাইলৈকে বৰষুণ হ’ব পাৰে। ইয়াৰ উপৰি অৰুণাচল প্ৰদেশ, নাগালেণ্ড, মণিপুৰ, মিজোৰাম আৰু ত্ৰিপুৰাতো অহা ৭ জুলাইলৈকে ধাৰাসাৰ বৰষুণৰ পূৰ্বাভাস পোৱা গৈছে।
বতৰ বিভাগৰ তথ্য অনুসৰি, অৰুণাচলৰ পাচিঘাটৰ মেবোৰ লংডিঙত বিগত ২৪ ঘণ্টাত ১২০-১৩০ মিলিমিটাৰ বৰষুণ হৈছে। আনহাতে, অসমৰ ২৯ খন জিলা বানত ক্ষতিগ্ৰস্ত। বৃহস্পতিবাৰে ৰাজ্যৰ কেইবাখনো নদীয়ে বিপদ সীমায়ে অতিক্ৰম কৰিছে। আটাইতকৈ বেছি ক্ষতিগ্ৰস্ত জিলাসমূহ হৈছে নগাঁও, দৰং আৰু কৰিমগঞ্জ। ইফালে বানৰ বাবে কাজিৰঙা ৰাষ্ট্ৰীয় উদ্যানৰ অৱস্থা শোচনীয় হৈ পৰিছে। হৰিণ আৰু গঁড়কে ধৰি ১৭টা বন্যপ্ৰাণীৰ মৃত্যু হোৱা বুলি জানিব পৰা গৈছে।
