পুনৰ অশান্ত মণিপুৰ। সশস্ত্ৰ কুকি গোটৰ সদস্যৰ গুলীচালনাত মেইটেই গোষ্ঠীৰ তিনিজন যুৱকে প্ৰাণ হেৰুৱায়। সোমবাৰে তেওঁলোকৰ মৃতদেহ ৰাজ্যখনৰ মুখ্যমন্ত্রী য়ুমনাম খেমচান্দ সিঙৰ বাসগৃহৰ সন্মুখত ৰাখি ৰাইজে প্ৰতিবাদ সাব্যস্ত কৰে। পৰিস্থিতি নিয়ন্ত্ৰণৰ বাবে কন্দুৱা গেছ ব্যৱহাৰ কৰা হয়। জানিব পৰা মতে, সোমবাৰে পুৱা মেইটেই সম্প্ৰদায়ৰ এদল লোকে খৰি সংগ্ৰহৰ বাবে হাবিলৈ গৈছিল।
অভিযোগ অনুসৰি, তাতেই তেওঁলোকৰ ওপৰত গুলীচালনা কৰা হয় আৰু তিনিজন লোকে প্ৰাণ হেৰুৱায়। আন তিনিজন আহত হয়। বিষয়াসকলে জনোৱা মতে, ১৬ জনীয়া মেইটেইৰ এটা দলে পূৱ ইম্ফল আৰু কংপকপি জিলাৰ সীমান্তৰ সমীপৰ অৰণ্যত খৰি সংগ্ৰহ কৰিবলৈ গৈছিল।
সেই সময়ত আকস্মিকভাৱে কুকিসকলে তেওঁলোকক আক্ৰমণ কৰে। অসম ৰাইফলছৰ জোৱানে তিনিজন আহত লোকক উদ্ধাৰ কৰি চিকিৎসালয়ত ভৰ্তি কৰে। ইয়াৰে এজনৰ চিকিৎসালয়তে মৃত্যু হয়। নিহত লোক দুজনৰ নাম আৰুবাম ৰানিল (৩৫) আৰু লাইৰেনলাকপাম ইনাওবি (৫১)। চিকিৎসালয়ত মৃত্যু হয় ক্ষেত্ৰিমায়ুম সুশীলৰ (৩২)।
পিছত নিৰাপত্তাৰক্ষীয়ে মৃতদেহ উদ্ধাৰ কৰি মৰণোত্তৰ পৰীক্ষাৰ বাবে চিকিৎসালয়লৈ প্ৰেৰণ কৰে। আনহাতে, মণিপুৰৰ মুখ্যমন্ত্ৰীয়ে চিকিৎসালয়খন পৰিদৰ্শন কৰি আহতসকলক সাক্ষাৎ কৰে। এই সন্দৰ্ভত তেওঁ সংবাদ মাধ্যমৰ আগত কোনো মন্তব্য দিব বিচৰা নাছিল।
