দেশৰ বিভিন্ন উচ্চ ন্যায়ালয়ত বিচাৰাধীন হৈ থকা নিট সম্পৰ্কীয় গোচৰসমূহ (NEET-related cases) উচ্চতম ন্যায়ালয়ে স্থগিত ৰাখিছে। উচ্চতম ন্যায়ালয়ে (Supreme Court) সেই গোচৰসমূহৰ একেলগে শুনানি কৰিব (Hear the cases together) বিচাৰিছে। সেই সন্দৰ্ভত এক জাননীও জাৰি কৰা হৈছে। ইয়াৰ সমান্তৰালকৈ নিট গোচৰত কেন্দ্ৰীয় চৰকাৰ আৰু এই পৰীক্ষাৰ আয়োজক সংস্থা নেচনেল টেষ্টিং এজেন্সীক (National Testing Agency) (এনটিএ) সুকীয়াকৈ জাননী দিয়া হৈছে।
উল্লেখযোগ্য যে চিকিৎসা বিজ্ঞানৰ প্ৰৱেশ পৰীক্ষাত ইতিমধ্যে দুৰ্নীতিৰ অভিযোগ উত্থাপন হৈছে। উচ্চতম ন্যায়ালয়ৰ ন্যায়াধীশ বিক্ৰম নাথ আৰু ন্যায়াধীশ এছ ভি এন ভাট্টীৰ বিচাৰপীঠে এই সন্দৰ্ভত কেইবাটাও গোচৰৰ শুনানিৰ বাবে আগবাঢ়িছে। বৰ্তমান দেশৰ ৭খন উচ্চ ন্যায়ালয়ত নিট দুৰ্নীতিৰ কেইবাটাও গোচৰৰ বিচাৰ চলি আছে। বৃহস্পতিবাৰে আদালতে সেই গোচৰসমূহ স্থগিত ৰাখে। উচ্চতম ন্যায়ালয়ৰ ৭টা উচ্চ ন্যায়ালয়ৰ গোচৰ একেলগে শুনানিৰ বাবেও উচ্চতম ন্যায়ালয়ৰ বিচাৰপীঠে জাননী জাৰি কৰে।
এই সম্পৰ্কীয় গোচৰসমূহত বৃহস্পতিবাৰে উচ্চতম ন্যায়ালয়ে কেন্দ্ৰ আৰু এনটিএলৈ পৃথক জাননী জাৰি কৰে। ৮ জুলাইত এই গোচৰৰ পৰৱৰ্তী শুনানি অনুষ্ঠিত হ’ব। সেইদিনা আদালতৰ জাননীৰ উত্তৰ দিব লাগিব কেন্দ্ৰ আৰু এনটিএয়ে।
বৃহস্পতিবাৰে উচ্চতম ন্যায়ালয়ে নিট সম্পৰ্কীয় মুঠ ১৪টা গোচৰৰ শুনানি গ্ৰহণ কৰে। ইয়াৰে ১০টা গোচৰ ৪৯ গৰাকী ছাত্ৰ-ছাত্ৰী আৰু এটা ছাত্ৰ সংগঠনৰ (এছ এফ আই) দ্বাৰা দাখিল কৰা হৈছে। বাকী চাৰিটা গোচৰ এনটিএয়ে দাখিল কৰিছে। এনটিএয়ে দেশৰ বিভিন্ন উচ্চ ন্যায়ালয়ৰ পৰা নিট সম্পৰ্কীয় গোচৰসমূহ উচ্চতম ন্যায়ালয়লৈ হস্তান্তৰ কৰিবলৈ অনুৰোধ জনাইছে।
আনহাতে, উচ্চতম ন্যায়ালয়ে বৰ্তমান নিট কাউন্সেলিং প্ৰক্ৰিয়া স্থগিত ৰাখিব বিচৰা নাই। এই বিষয়ত এনটিএ আৰু কেন্দ্ৰীয় চৰকাৰৰ উত্তৰ প্ৰথমে শুনিব বিচাৰিছে ন্যায়াধীশসকলে। তাৰ পিছত সিদ্ধান্ত লোৱা হ’ব। ইয়াৰ উপৰি তেওঁলোকৰ বক্তব্য নুশুনাকৈ এই তদন্তৰ দায়িত্ব চিবিআইক দিবলৈ ইচ্ছুক নহয় উচ্চতম ন্যায়ালয়ে।
