ASSAM TIMES POST
ডিফুঃ পাহাৰীয়া জিলা কাৰবি আংলঙত ব্যৱসায়ীক অপহৰণ কৰি নৃশংস ভাবে হত্যা কৰা ঘটনাত চাঞ্চল্যৰ সৃষ্টি হৈছে৷ কাৰবি আংলং জিলাৰ ডিফুৰ সমীপৰ লাংছ’লিয়টৰ পৰা অলপতে অপহৃত হোৱা ব্যৱসায়ীৰ মৃতদেহ আৰক্ষীয়ে উদ্ধাৰ কৰিবলৈ সক্ষম হৈছে৷
ঘটনাৰ বিৱৰণ অনুসৰি যোৱা ২৮ ডিচেম্বৰত বৰলাংফেৰ থানা এলেকাধীন লাংছ’লিয়েটৰ পৰা কাজল দাস নামৰ এজন ব্যৱসায়ীক অপহৰণ কৰি নিয়ে ৷ ইফালে ব্যৱসায়ী গৰাকীক দূৰ্বৃত্তই অপহৰণ কৰি নিয়াৰ পিছতো অপহৃতা কাজল দাসৰ পৰিয়ালে আৰক্ষীক অৱগত কৰা নাছিল ৷ এক বিশেষ সূত্ৰে ৩ জানুৱাৰীত জিলা আৰক্ষীয়ে উক্ত অপহৰণ কাণ্ডৰ বিষয়ে জানিব পাৰে৷
অপহৰণ কাণ্ড সন্দৰ্ভত কাৰবি আংলং আৰক্ষীয়ে নিশ্ছিত হোৱাৰ পিছত কাৰবি আংলং জিলা আৰক্ষীয়ে ঘটনা সন্দৰ্ভত নিজাববীয়াকৈ তদন্ত আৰম্ভ কৰে৷ প্ৰবেছনাৰী আইপিএ বিষয়া সৌৰভ গুপ্তাৰ নেতৃত্বত. মাঞ্জা থানাৰ ভাৰপ্ৰাপ্ত বিষয়া জিতুমনি ডেকা, খটখটী থানাৰ ভাৰপ্ৰাপ্ত বিষয়া মৌবলিক ব্ৰক্ষ্ম, আৰু ধনশিৰি আৰক্ষী চকীৰ ভাৰপ্ৰাপ্ত বিষয়া ৰাজু ছেত্ৰীৰ সহযোগত আৰক্ষীয়ে যোৱা ৩ জানুৱাৰীৰ পৰা অভিযান আৰম্ভ কৰে৷
আৰক্ষীয়ে অবিৰত ভাবে অভিযান চলাই কালি মাঞ্জা আৰক্ষী থানাৰ অন্তৰ্গত হিদিম টেৰণ গাঁৱৰ পৰা ৰাজেশ ইংতি নামৰ এজন যুৱকক আটক কৰে৷ ইয়াৰ পিছত আৰক্ষীয়ে অভিযান চলাই আজি পুৱা উক্ত অপহৰণকাণ্ডত জড়িতৰ আন এজন অভিযুক্তক আটক কৰে৷ ধৃত অভিযুক্ত জন বকলিয়াঘাট আৰক্ষী থানৰ অন্তৰ্গত ছাম পথাৰ ছাৰ্থে ৰংহাঙ গাঁৱৰ নিবাসী কেনচিং তিচ’ বুলি চিনাক্ত কৰা হৈছে৷
আৰক্ষীৰ জালত পৰা দুয়োটা অভিযুক্তৰ স্বীকাৰোক্তিৰ ভিত্তিত আৰক্ষীয়ে আজি বৰলাংফেৰ আৰক্ষী থানাৰ অন্তৰ্গত লাংছ’লিয়েট ৰেল লাইনৰ সমীপৰ জংঘল নামৰ ঠাইৰ হাবিৰ মাজত পেলাই থোৱা অৱস্থাৰ পৰা যোৱা ১০ দিনে নিখোজ হৈ থকা ব্যৱসায়ী কাজল দাসৰ মৃতদেহটো উদ্ধাৰ কৰে৷ নিৰীহ ব্যৱসায়ী গৰাকীৰ অপহৰণ আৰু হত্যাৰ সৈতে জড়িত আন এটা অপৰাধী এতিয়াও পলাতক৷
সম্প্ৰতি পলাতক আৱস্থাত থকা তৃতীয়টো অপৰাধীকো আৰক্ষীয়ে অতি শীঘ্ৰে আৰক্ষীয়ে আটক কৰিবলৈ সক্ষম হব বুলি আৰক্ষীয়ে জানিবলৈ দিছে৷
