শনিবাৰে দুদিনীয়া ভ্ৰমণসূচীৰে অসমত (two day visit to Assam) উপস্থিত হ’ব প্ৰধানমন্ত্ৰী নৰেন্দ্ৰ মোদী (Prime Minister Narendra Modi)। এই ভ্ৰমণকালত প্ৰধানমন্ত্ৰীয়ে কেন্দ্ৰীয় আৰু ৰাজ্য চৰকাৰৰ মুঠ ১১,৫৯৯ কোটি টকাৰ কেইবাটাও প্ৰকল্পৰ শুভ উদ্বোধন আৰু শুভাৰম্ভণি কৰিব। এক সংবাদমেলত প্ৰধানমন্ত্ৰীৰ ভ্ৰমণসূচী সম্পৰ্কে বিতংভাৱে ব্যাখ্যা কৰে মুখ্যমন্ত্ৰী হিমন্ত বিশ্ব শৰ্মাই।
উল্লেখ্য যে দুদিনীয়া অসম ভ্ৰমণৰ কাৰ্যসূচীৰে শনিবাৰে নিশা ৭.৩০ বজাত গুৱাহাটী বিমানবন্দৰত অৱতৰণ কৰিব প্ৰধানমন্ত্ৰী। নিশা তেওঁ দলৰ ৰাজ্যিক ক’ৰ কমিটীৰ সৈতে এক আলোচনাত মিলিত হ’ব। নিশাটো ৰাজ্যিক অতিথিশালাত কটাই দেওবাৰে দিনৰ ১১.৩০ বজাত তেওঁ এখন ৰাজহুৱা সভা সম্বোধন কৰিব। এই সভাখন অনুষ্ঠিত হ’ব খানাপাৰাত। এই সভাৰ পৰায়ে তেওঁ মুঠ ১১,৫৯৯ কোটি টকাৰ প্ৰকল্পকেইটাৰ ভাৰ্চুৱেলী শুভ উদ্বোধন তথা আধাৰশিলা স্থাপন কৰিব।
প্ৰধানমন্ত্ৰীয়ে উদ্বোধন আৰু আধাৰশিলা কৰিবলগীয়া প্ৰকল্পসমূহ হৈছে-
- পি এম ডিভাইন আঁচনিৰ অধীনত কামাখ্যা ক’ৰিডৰৰ আধাৰশিলা স্থাপন । এই প্ৰকল্পত মুঠ ব্যয় ৪৯৮ কোটি টকা ধাৰ্য কৰা হৈছে ।
- লোকপ্ৰিয় গোপীনাথ বৰদলৈ আন্তঃৰাষ্ট্ৰীয় বিমান বন্দৰৰ নতুন টাৰ্মিনেললৈ ছয়লেনযুক্ত পথৰ আধাৰশিলা স্থাপন । ধাৰাপুৰৰ পৰা গৰল হৈ নিৰ্মাণ কৰিবলগীয়া এই পথৰ বাবে ৩৫৮ কোটি টকা ধাৰ্য কৰা হৈছে ।
- অসমমালাৰ দ্বিতীয় সংস্কৰণৰ শুভাৰম্ভ কৰিব প্ৰধানমন্ত্ৰীয়ে । এই আঁচনিৰ অধীনত নিৰ্মাণ হ’বলগা ৰাজ্যৰ ৪৩ টা নতুন পথৰ আধাৰশিলা স্থাপন কৰিব প্ৰধানমন্ত্ৰী মোদীয়ে । ইয়াৰ বাবে ব্যয় ধাৰ্য কৰা হৈছে ৩,৪৪৪ কোটি টকা ।
- নেহৰু ষ্টেডিয়ামক নতুনকৈ সজোৱাৰ পৰিকল্পনা ৰাজ্য চৰকাৰৰ । ফিফা ৱৰ্ল্ডকাপ পৰ্যায়ৰ স্প’ৰ্টছ কমপ্লেক্স হিচাপে নিৰ্মাণ কৰা হ’ব নেহৰু ষ্টেডিয়ামক । বেতৰ খৰাহীৰ আৰ্হিত নতুনকৈ নিৰ্মাণ কৰিবলগা নেহৰু ষ্টেডিয়ামত ৰাজ্যৰ সকলো ক্ৰীড়া সন্থাৰ কাৰ্যালয় থাকিব । ৩০ হাজাৰ আসনবিশিষ্ট ক্ৰীড়া প্ৰকল্পটোৰ আধাৰশিলা স্থাপন কৰিব প্ৰধানমন্ত্ৰীয়ে । ইয়াৰ বাবে ব্যয় ধাৰ্য কৰা হৈছে ৮৩১ কোটি টকা ।
- ৩০০ কোটি টকা ব্যয়সাপেক্ষে চন্দ্ৰপুৰত নিৰ্মাণ হ’বলগা মাল্টি স্প’ৰ্টছ কমপ্লেক্সৰ আধাৰশিলা স্থাপন । আনহাতে, গুৱাহাটীৰ মণিৰাম দেৱান ট্ৰেড চেণ্টাৰক ইউনিটি মললৈ ৰূপান্তৰিত কৰা হ’ব । ইয়াৰো আধাৰশিলা স্থাপন কৰিব প্ৰধানমন্ত্ৰীয়ে । ইয়াৰ বাবে নিৰ্মাণ ব্যয় ২৯৭ কোটি টকা ধাৰ্য কৰা হৈছে ।
- ৩ হাজাৰ কোটি টকাৰে পুনৰ নিৰ্মাণ কৰা হ’ব গুৱাহাটী চিকিৎসা মহাবিদ্যালয় হাস্পতাল । ইয়াৰো শুভাৰম্ভণি কৰিব প্ৰধানমন্ত্ৰীয়ে ।
