নিৰ্বাচনআয়োগে বৃহস্পতিবাৰে নিৰ্বাচনমুখী ছত্তীশগড়ত নিৰ্বাচনী প্ৰচাৰৰ সময়ত সাম্প্ৰদায়িক মন্তব্য কৰাৰ অভিযোগত অসমৰ মুখ্যমন্ত্ৰী হিমন্ত বিশ্ব শৰ্মাক (Himanta Biswa Sarma) কাৰণ দৰ্শোৱাৰ জাননী জাৰি কৰে। নিৰ্বাচন আয়োগে উক্ত জাননীত কৈছে যে ১৮ অক্টোবৰত দিয়া বিজেপি নেতাজনৰ ভাষণৰ কিছু অংশ আদৰ্শ আচৰণ বিধি আৰু জনপ্ৰতিনিধিত্ব আইন, ১৯৫১ৰ বিধানসমূহৰ ‘প্ৰাথমিক দৃষ্টিত উলংঘন’ বুলি জানিব পৰা গৈছে।
আনহাতে, আয়োগে মুখ্যমন্ত্ৰীক ৩০ অক্টোবৰৰ সন্ধিয়া ৫ বজাৰ ভিতৰত জাননীখনৰ সঁহাৰি দিবলৈ কৈছে। উল্লেখযোগ্য যে কংগ্ৰেছ দলে নিৰ্বাচনী সংস্থাটোৰ ওচৰত কৰা অভিযোগত কৈছিল যে হিমন্ত বিশ্ব শৰ্মাই তীব্ৰ সাম্প্ৰদায়িক কথা কৈছিল আৰু কংগ্ৰেছৰ কাৱাৰধাৰ প্ৰাৰ্থী মহম্মদ আকবৰৰ বিৰুদ্ধে অপ্ৰমাণিত অভিযোগ আৰু তথ্যৰ বিকৃতি কৰিছিল।
কিন্তু ছত্তীশগড়ত কি কৈছিল হিমন্ত বিশ্ব শৰ্মাই?
“যদি এজন আকবৰ এখন ঠাইলৈ আহে, তেন্তে এই কথা নাপাহৰিব যে তেওঁলোকে শ শ আকবৰ মাতি আনে। সেয়েহে, যিমান সম্ভৱ সোনকালে আকবৰক বিদায় জনাব, অন্যথা মাতৃ কৌশল্যাৰ এই ভূমি অশুচি কৰা হ’ব।” ইচিৰ জাননীত হিমন্ত বিশ্ব শৰ্মাই এনেদৰে কোৱাৰ অভিযোগ অনা হৈছে।
তেওঁ লগতে কয়, “ভগৱান ৰামৰ মাতৃ কৌশল্যা আধুনিক ছত্তীশগড়ৰ পৰা আহিছে বুলি বিশ্বাস কৰা হয়। সেয়েহে ভাই-ভনীসকল, আপোনালোকে ছত্তীশগড়ক বচাব লাগিব। মা কৌশল্যাৰ এই পৱিত্ৰ ভূমি ৰক্ষা কৰিব লাগিব আৰু সেয়েহে আপোনালোক সকলোৱে বিজয় ভাইয়াক বিজয়ী কৰিব লাগে।” কাৱাৰধাৰ বিজেপি প্ৰাৰ্থীৰ কথা উল্লেখ কৰি হিমন্ত বিশ্ব শৰ্মাই এনেদৰে কয়।
