ASSAM TIMES POST
ডিফুঃ নাগৰিকত্ব সংশোধনী বিধেয়ক আৰু এনআৰচিকলৈ সমগ্ৰ উত্তৰ পূবেই ঐক্যবদ্ধ হৈ পৰিছে ৷ যাৰ বাবে মুখ্যমন্ত্ৰীয়ে নিজ ঘৰৰ পৰা হেলিকাপ্তাৰলৈ পলায়ণ কৰিব লগীয়া হৈছে ৷ সেয়েহে নাগৰিকত্ব সংশোধনী বিধেয়ক ষষ্ঠ অনুসূচী আৰু ইনাৰ লাইন পাৰ্মিটযুক্ত এলেকাত কাৰ্যকৰী নহ’ব বুলি চৰকাৰে এক প্ৰকাৰ প্ৰচাৰ চলাইছে ৷
এনে নীতিৰে প্ৰকৃততে শেহতীয়াকৈ উত্তৰ- পূবত সৃষ্টি হোৱা কেব বিৰোধী আন্দোলনকাৰী শক্তি সকলৰ মাজত বিভাজনৰ সৃষ্টি কৰি নিশকতীয়া কৰাৰ চেষ্টা চলাইছে ৷ এই অভিযোগ কাৰবি আংলং জিলা কংগ্ৰেছৰ ৷ আজি দিনৰ প্ৰায় ১১ বজাত ডিফুত স্থিত কাৰবি আংলং জিলা কংগ্ৰেছৰ এক সংবাদ মেল আয়োজন কৰি এই অভিযোগ কৰে জিলা কংগ্ৰেছে ৷
সংবাদ মেলক সম্বোধন কৰি জিলা কংগ্ৰেছৰ উপসভাপতি ৰতন ইংতি আৰু সাধাৰণ সম্পাদক সুৰেণ ছিংনাৰ আৰু ডাঃ মংবে ৰংপিয়ে শাসকীয় বিজেপি চৰকাৰৰ বিভিন্ন নীতিৰ বিৰুদ্ধে সৰৱ হৈ পৰা পৰিলক্ষিত হয় ৷ ডিফু চিকিৎসা মহাবিদ্যালয়ত শেহতীয়াকৈ হৈ যোৱা নিযুক্তি প্ৰক্ৰিয়াই জিলাখনত প্ৰতিক্ৰিয়াৰ সৃষ্টি কৰা বুলি উল্লেখ কৰি নেতৃবৰ্গই কয় যে, মহাবিদ্যালয় খনত নিযুক্তি প্ৰদানৰ ক্ষেত্ৰত কাৰবি আংলঙৰ থলুৱা প্ৰাৰ্থীতকৈ বাহিৰা প্ৰাৰ্থীকহে অধিক গুৰুত্ব প্ৰদান কৰা হ’ল ৷
কাৰবি আংলং জিলাত শেহতীয়াকৈ চৰকাৰৰ ইউনিফৰ্ম চিভিল ক’ডৰ প্ৰসঙ্গক লৈ বিভিন্ন দল সংগঠন সৰৱ হৈ থকা প্ৰসংগত কংগ্ৰেছৰ নেতা কেইগৰাকীয়ে এনে আইনে মেৰুকৰণৰ জৰিয়তে ভাৰতৰ বৈচিত্ৰৰ মাজত থকা ঐক্যৰ বিনষ্ট কৰিব বুলি মন্তব্য কৰি ইয়াৰ ফল অতিকৈ মাৰাত্মক হ’ব বুলি আশংকা প্ৰকাশ কৰে ৷ চৰকাৰৰ এনে নীতিৰ বিৰুদ্ধে কংগ্ৰেছে প্ৰতিবাদ কৰি যাব বুলি কয় ৷ আনহাতে অৰ্থনীতি ,মূল্যবৃদ্ধি নিবণুৱা সমস্যা আদিৰ প্ৰসংগকলৈ লৈ বিজেপি চৰকাৰক কঠোৰ ভাষাৰে সমালোচনা কৰে জিলা কংগ্ৰেছৰ নেতৃবৰ্গই ৷
