ASSAM TIMES POST
ডিফুঃ সদৌ অসম লেখিকা সমাৰোহ সমিতি ডিফু শাখা সমিতিয়ে জ্ঞানপীঠ বঁটা বিজয়িনী ডক্টৰ মামনি ৰয়ছম গোস্বামীৰ মৃত্যু দিৱসৰ লগত সংগতি ৰাখি ২৯ আৰু ৩০ নৱেম্বৰ দুদিনীয়া কাৰ্যসূচীলৈ ডিফুৰ ডক্টৰ মামনি ৰয়ছম গোস্বামী ভৱনত ইয়াৰ ৩৩ সংখ্যক প্ৰতিষ্ঠা দিৱসটি অনুষ্ঠিত কৰিছে ৷ কাৰ্য ক্ৰমণিকা অনুসৰি ২৯ নৱেম্বৰ পুৱাৰ ভাগত ডক্টৰ মামনি ৰয়ছম গোস্বামীৰ প্ৰতিচ্ছবিত পুষ্পাঞ্জলী আৰু মাল্যাৰ্পণ ৷ ৩০ নৱেম্বৰত পুৱা পতাকা উত্তোলন কৰে ডিফু লেখিকা সমাৰোহ সমিতিৰ সভানেত্ৰী ৰীণা দেৱে, স্মৃতি তৰ্পণ কৰে উপদেষ্টা প্ৰেমদা দত্তই ৷ দিনৰ ১১ বজাত মহিলা সকলৰ মাজত আমোদজনক প্ৰতিযোগিতা অনুষ্ঠিত হৈ যায় ৷
বিয়লি ডিফু লেখিকা সমাৰোহ সমিতিৰ সভানেত্ৰী ৰীণা দেৱৰ পৌৰিহিত্যত মুকলি সভা অনুষ্ঠিত হৈ যায় ৷ মুকলি সভাখনৰ উদ্দেশ্য বাখ্যা কৰে ডিফু লেখিকা সমাৰোহ সমিতৰ সম্পাদিকা কামিনী বড়োয়ে ৷ মুকলি সভাত বিশিষ্ট বক্তা হিছাপে ডিফু ৰেংবংহম উচ্চতৰ মাধ্যমিক বিদ্যালয়ৰ শিক্ষয়িত্ৰী মঞ্জু হাজৰিকা আৰু নিৰ্দিষ্ট বক্তা হিছাপে ডিফুৰ বিশিষ্ট সাহিত্যিক জয়ছিং টকবীয়ে বহুমূলীয়া ভাষণ প্ৰদান কৰি সুধী বৃন্দক আকৰ্ষিত কৰে ৷ ইয়াৰোপৰি ডিফু লেখিকা সমাৰোহ সমিতিৰ উপদেষ্টা প্ৰেমলা দত্তই সাংবাদিকৰে সৈতে হোৱা সাক্ষাৎকাৰত কয় যে, ডিফু লেখিকা সমাৰোহ সমিতি ইয়াৰ গৌৰৱোজ্জল ৩৩ টা বছৰ সফলতাৰে অতিক্ৰম কৰিছে ৷
পৰ্যায়ক্ৰমে আৰু ধাৰাবহিক ভাবে বিভিন্ন আলোচনা চক্ৰ আৰু দ্বি বাৰ্ষিক আলোচনী ‘মাণ্ডুলী’ও নিয়মীয়াকৈ প্ৰকাশ কৰি আহিছে ৷ আনহাতে ডিফু লেখিকা সমাৰোহ সমিতিৰ প্ৰাক্তন বিষয় ববীয়া গীতা বৰাই সাংবাদিকক সম্বোধন কৰি কয় যে, বিভিন্ন ভাষা আৰু জনগোষ্ঠীৰ মাজত সমন্বয় আৰু উন্নতি কল্পে ১৯৮৬ চনত ডিফু লেখিকা সমাৰোহ সমিতিৰ জন্ম হৈ আজি সফলতাৰে ৩৩ বছৰ গৰকিলে ৷ এই সমিতিয়ে মহিলা সকলৰ মানসিক উৎকৰ্ষ সাধন কৰিবলৈ নানা কাম কৰি মহিলা সকলৰ মাজৰ পৰা সু লেখিকা নাচনী, শিপিনী, গায়িকা আদি সৃষ্টি কৰিবলৈ সক্ষম হৈছে ৷ ডিফু লেখিকা সমাৰোহ সমিতি এটি অবিচ্ছিন্ন পৰিয়ালৰ দৰে তিষ্টি আছে, এই মঞ্চৰ পৰা কোনো এৰি যোৱা নাই, সমিতিয়ে নিৰ্দিষ্ট সময়ত ইয়াৰ আলোচনা চক্ৰ আৰু পৰ্যালোচনা সমূহ অনুষ্ঠিত কৰাৰ লগতে ৺ৰশ্মী ক্ৰপী বঁটা সুকলমে বিতৰণ কৰি সমিতিৰ গৌৰৱ অক্ষুণ্ণ ৰাখিবলৈ সক্ষম হৈছে ৷
