মধ্য এছিয়াত যুদ্ধ বন্ধ কৰাৰ বাবে আমেৰিকা যুক্তৰাষ্ট্ৰ আৰু ইৰাণৰ মাজত যুদ্ধবিৰতি চুক্তিৰ মধ্যস্থতাকাৰীৰ সফলতাত ইছলামাবাদ উৎফুল্লিত হ’লেও, পাকিস্তানৰ (Pakistan) ভিতৰৰ পৰিস্থিতি ৰক্তাক্ত হৈ পৰিছে। ইছলামাবাদৰ বাহিনীয়ে আফগানিস্তানৰ সীমান্তত এক “ডাবল-টেপ” অভিযানত (Double-tap campaign) কমেও ৩৫ জন লোকক হত্যা (Killed 35 people) কৰিছে। তেওঁলোকক পাকিস্তানৰ দ্বাৰা “সন্ত্ৰাসবাদী” বুলি লেবেল লগোৱা হৈছে। “ডাবল-টেপ” হৈছে এক সামৰিক পৰিভাষা। প্ৰাৰম্ভিক আক্ৰমণৰ ঠিক পিছতে একেটা স্থানত ইচ্ছাকৃতভাৱে দ্বিতীয়টো আক্ৰমণ পুনৰাবৃত্তি কৰাক “ডাবল-টেপ” বুলি কোৱা হয়। এইটো এটা অত্যন্ত বিতৰ্কিত আৰু প্ৰায়েই নিন্দনীয় ৰণনীতি। জৰুৰীকালীন কৰ্মী, চিকিৎসা কৰ্মী আৰু সাংবাদিকসকল ঘটনাস্থলীত উপস্থিত হোৱাৰ সময়ত দ্বিতীয় আক্ৰমণটো পৰিকল্পিতভাৱে সংঘটিত কৰা হৈছিল।
আফগানিস্তানে দাবী কৰিছে যে পাকিস্তানৰ আক্ৰমণত মহিলা আৰু শিশুকে ধৰি বহুতো অসামৰিক লোক নিহত হৈছে। কাবুলৰ কৰ্তৃপক্ষই বাৰে বাৰে অস্বীকাৰ কৰি আহিছে যে তেওঁলোকৰ ভূখণ্ড সন্ত্ৰাসবাদীৰ বাবে এক সুৰক্ষিত আশ্ৰয়স্থল।প্ৰাপ্ত তথ্য অনুসৰি, পাকিস্তান বায়ু সেনাৰ যুঁজাৰু বিমানে আফগানিস্তানৰ তিনিখন জিলাৰ (পাকতিৰ গায়ান, পাকটিয়াৰ চামকানি আৰু কুনাৰৰ মাৰৱাৰা) ঘৰ আৰু মছজিদত নিশা প্ৰায় ১২.৩০ বজাত (ভাৰতীয় সময়) আক্ৰমণ কৰে। প্ৰথম বোমা বিস্ফোৰণৰ ঠিক ২৫ মিনিট পিছত, যেতিয়া গাঁওবাসীয়ে ধোঁৱাময় ধ্বংসস্তূপত আবদ্ধ হৈ থকা মহিলা আৰু চিঞৰি থকা শিশুসকলক উদ্ধাৰ কৰিবলৈ দৌৰি গৈছিল, পাকিস্তানী যুদ্ধবিমানবোৰ উভতি আহিছিল আৰু নিৰস্ত্ৰ উদ্ধাৰকাৰীসকলৰ ওপৰত দ্বিতীয় ৰাউণ্ড বোমা নিক্ষেপ কৰিছিল। দ্বিতীয় ইচ্ছাকৃত আক্ৰমণৰ ফলত দ্ৰুতগতিত মৃত্যুৰ সংখ্যা ৩৫ অতিক্ৰম কৰিছিল আৰু চিকিৎসালয়ত আঘাতপ্ৰাপ্ত লোকৰ সংখ্যা এশৰো অধিক আছিল।পাকিস্তানী কৰ্তৃপক্ষই দাবী কৰিছে যে আফগানিস্তানত আক্ৰমণবোৰ দেশজুৰি ধাৰাবাহিক সন্ত্ৰাসবাদী আক্ৰমণৰ প্ৰতিক্ৰিয়া হিচাপে সংঘটিত কৰা হৈছিল।
ইয়াৰ ভিতৰত আছে যোৱা সপ্তাহত কৰাচীত হোৱা এটা আক্ৰমণ য’ত পাকিস্তানী অৰ্ধসামৰিক বাহিনীৰ তিনিজন সদস্য নিহত হৈছিল আৰু চাৰিজন আহত হৈছিল। এক্সত এটা প’ষ্টত তথ্য মন্ত্ৰী আতাউল্লাহ তাৰাৰে কয় যে খাইবাৰ পাখতুনখোৱা আৰু বেলুচিস্তানৰ লোকসকলৰ ওপৰত শেহতীয়াকৈ হোৱা সন্ত্ৰাসবাদী আক্ৰমণ আৰু কৰাচীৰ পাকিস্তান ৰেঞ্জাৰ্ছ (সিন্ধ) শিবিৰৰ ওপৰত হোৱা সন্ত্ৰাসবাদী আক্ৰমণৰ প্ৰতিক্ৰিয়া হিচাপে এই অভিযান চলোৱা হৈছিল। এই আক্ৰমণটো তেহৰিক-ই-তালিবান পাকিস্তান (টিটিপি)ৰ এটা বিভাজিত গোট জামাত-উল-আহৰাৰে লক্ষ্য কৰি লৈছিল। “নিৰাপত্তা বাহিনীয়ে চোৰাংচোৱাৰ তথ্যৰ ওপৰত ভিত্তি কৰি পাকিস্তান-আফগান সীমান্তত এক সুপৰিকল্পিত স্থল অভিযান চলাইছিল। পিছত, সীমান্তৱৰ্তী অঞ্চলত জামাত-উল-আহৰাৰ আৰু ফিতনা আল-খাৱাৰিজৰ সন্ত্ৰাসবাদীৰ গোপন স্থান আৰু সুৰক্ষিত আশ্ৰয়স্থলত বিশেষ আক্ৰমণ চলোৱা হৈছিল, য’ত ২৯ জন ‘খাৱাৰিজ’ (ইছলামিক ইতিহাসত উগ্ৰপন্থী বা বিদ্ৰোহী) নিহত হৈছিল।
তেওঁ লগতে কয় যে পাকটিয়া, পাকটিকা আৰু কুনাৰ অঞ্চলৰ তিনিটা জামাত-উল-আহৰাৰ ঘাটি লক্ষ্য কৰি লোৱা আক্ৰমণৰ দ্বাৰা ধ্বংস কৰা হৈছে। তালিবান চৰকাৰে সোমবাৰে কয় যে তিনিখন পূব প্ৰদেশত বিমান আক্ৰমণত বহুতো আফগান নাগৰিকৰ মৃত্যু হৈছে। তালিবানৰ মুখপাত্ৰ জাবিহুল্লা মুজাহিদে এই অভিযানক গৰিহণা দিছে। পাকিস্তানে এই আক্ৰমণক “আগ্ৰাসন আৰু কাপুৰুষতাৰ কাৰ্য” বুলি অভিহিত কৰিছে। তেওঁ কয়, “আমি এই কাপুৰুষোচিত আৰু আগ্ৰাসী কাৰ্যক কঠোৰ ভাষাৰে গৰিহণা দিছো আৰু ইয়াক এক অপৰাধ আৰু বৰ্বৰতা বুলি গণ্য কৰোঁ।” তালিবানৰ বিষয়াসকলৰ মতে, বৃদ্ধ লোক আৰু ৪ৰ পৰা ৯ বছৰ বয়সৰ শিশুকে ধৰি ৩৫ জনৰো অধিক আফগান নিহত হৈছিল আৰু শ শ গুৰুতৰভাৱে আহত হৈছিল। চিকিৎসালয়ৰ পৰা অহা বিৰক্তিকৰ ফুটেজত ৰক্তাক্ত শিশু আৰু বৃদ্ধ লোকক ষ্ট্ৰেচাৰত পৰি থকা দেখা গৈছিল।
ধ্বংসস্তূপৰ পৰা উদ্ধাৰ কৰা এজন ব্যক্তিয়ে পাকিস্তানৰ দাবীক স্পষ্টভাৱে প্ৰত্যাখ্যান কৰিছে। “বোমা বিস্ফোৰণ আৰম্ভ হোৱাৰ সময়ত অঞ্চলটোৰ আশে-পাশে কোনো টিটিপি সন্ত্ৰাসবাদী বা কোনো সামৰিক সদস্য নাছিল। পাকিস্তানে এই হত্যাকাণ্ডক বৈধতা প্ৰদান কৰিবলৈ বিশ্বক মিছা কথা কৈছে। আক্ৰমণৰ আটাইকেইজন ভুক্তভোগী অসামৰিক লোক আছিল যিয়ে জীয়াই থাকিবলৈ চেষ্টা কৰি আছিল।” অলপতে ডুবাইত কামৰ পৰা উভতি অহা চামকানিৰ আন এজন আহত বাসিন্দাই পৰিস্থিতিটো বৰ্ণনা কৰিছে— “মোৰ চুবুৰীয়া কিং খানৰ ঘৰ বিমান আক্ৰমণত ধ্বংস হৈছিল। ধ্বংসাৱশেষৰ তলত আবদ্ধ হৈ থকা মহিলা আৰু শিশুসকলক উলিয়াই আনিবলৈ আমি তালৈ দৌৰি গৈছিলো। কেইমিনিটমানৰ পাছত পাকিস্তানী সেনাই আমাৰ উদ্ধাৰকাৰী দলৰ ওপৰত কেইবাটাও বোমা পেলায়৷ মোৰ চকুৰ সন্মুখতে বহু লোকে প্ৰাণ হেৰুৱাইছিল।
