ষ্টাফ ৰিপ’ৰ্টাৰ,ডিফু : আজি কাৰ্বি আংলং স্বাযত্ব পৰিষদৰ চেছন হলত(KAAC) ২৫৪ সংখ্যক এদিনীয়া বিশেষ চমু অধিৱেশন অনুষ্ঠিত হয়৷ ডিফুস্থিত পৰিষদৰ চেছন হলত পুৱা ১০:০৩ বজাত কাৰ্বি আংলং স্বাযত্ব পৰিষদৰ অধ্যক্ষ ৰাজু টিচ্চ’ৰ অধ্যক্ষতাত এই অধিৱেশন অনুষ্ঠিত হয়৷ অধিৱেশন কেইবাটাও গুৰুত্বপূৰ্ণ সিদ্ধান্ত গ্ৰহন কৰে৷
ইয়াৰে বিশেষ ভাৱে কাৰ্বি জনগোষ্ঠীৰ নিজস্ব যি পৰম্পৰা শাসন ব্যৱস্থা বিল(কাষ্টমাৰী আইন আদালত), কাৰ্বি স্বাযত্ব পৰিষদৰ অধীন থকা শিক্ষা বিভাগৰ প্ৰাথমিক শিক্ষাৰ পৰা উচ্চ শিক্ষা বিভাগলৈ পৰিষদৰ নীতি-নিময়ৰ ব্যৱস্থাৰ বিল, কাৰ্বি পৰিষদৰ কৰ্মচাৰীৰ পেঞ্চন আৰু কৰ বিলৰ ব্যৱস্থা আৰু কাৰ্বি আংলং স্বাযত্ব পৰিষদৰ অধ্যক্ষ-উপাধ্যক্ষ আৰু মুখ্য কাৰ্যবাহী সদস্যকে আদি কৰি পৰিষদৰ কাৰ্যবাহী সদস্য আৰু পাৰিষদ সকলৰ দৰমহা বৃদ্ধিৰ বিল সমূহ আজি এই অধিৱেশনত অনুমোদন জনায়৷
সেই অনুযায়ী কাৰ্বি পৰিষদৰ অধ্যক্ষৰ পূৰ্বৰ দৰমহা ৭০ হাজাৰৰ পৰা এক লাখ দহ হাজাৰলৈ বৃদ্ধি, উপাধ্যক্ষৰ ৬৫ হাজাৰৰ পৰা ১ লাখ ৫ হাজাৰলৈ দৰমহা বৃদ্ধি কৰাৰ সমান্তৰালকৈ মুখ্য কাৰ্যবাহীৰ পূৰ্বৰ ৮০ হাজাৰ টকাৰ পৰিৱৰ্তে ১ লাখ ২০ হাজাৰলৈ বৃদ্ধি কৰোৱাৰ সমানে প্ৰতি গৰাকী কাৰ্যবাহী সদস্যৰ পূৰ্বৰ ৬৫ হাজাৰৰ পৰা ১ লাখ পাঁচ হাজাৰলৈ আৰু এমএচি অৰ্থাৎ পাৰিষদ সকলৰ পূৰ্বৰ ৬০ হাজাৰৰ পৰা ১লাখ টকালৈ দৰমহা বৃদ্ধিৰ বিল আজিৰ এই বিশেষ চমু অধিৱেশনে অনুমোদন জনায়৷
অধিৱেশন সুভাৰম্ভৰ পূৰ্বে কাৰ্বি আংলং স্বাযত্ব পৰিষদৰ ন-মনোনীত সদস্য দৰছিং ৰংহাঙক কাৰ্বি আংলং জিলা আয়ুক্তৰ দ্বাৰা গোপনীয়তা শপত পাঠ কৰোৱাৰ লগতে দুগৰাকীকৈ ন-কাৰ্যবাহী সদস্য-সদস্যা ক্ৰমে-হেড ছিং ৰংফাৰ আৰু কাদম টেৰাঙপীক ফুলৰ থোপাৰে কাৰ্বি আংলং স্বাযত্ব পৰিষদৰ মুখ্য কাৰ্যবাহী সদস্য ড° তুলিৰাম ৰংহাঙে আদৰণি জনায়৷
ইপিনে, অধিৱেশনৰ প্ৰথমাৱস্থাত পূৰ্বৰ মুখ্য কাৰ্যবাহী সদস্য তথা পাহাৰীয়া জিলা খনৰ প্ৰথম জন সাংসদৰ উপৰিও ইউনিয়ন ডেপু’টী মিনিষ্টাৰ প্ৰয়াত বীৰেণ ছিং ইংতিৰ চমু আত্ম-জীৱনি আলোকপাত কৰাৰ লগতে অধিৱেশনে এক মিনিট সময়ৰ বাবে মৌনতাৰে জেষ্ঠ নেতা গৰাকীক স্মৰণ কৰে৷
