বুধবাৰে কেইবাটাও কাৰ্যসূচী হাতত লৈ ডিফুত উপস্থিত হয় ৰাজ্য চৰকাৰৰ কৃষি আৰু জলসিঞ্চন (Agriculture and Irrigation) বিভাগৰ মন্ত্ৰী পীযুষ হাজৰিকা (Minister Piyush Hazarika)। কাৰ্বি আংলং জিলাৰ অভিভাৱক মন্ত্ৰীগৰাকীয়ে ডিফুৰ তাৰালাংছ’স্থিত কাজিৰ ৰংহাংপী অতিথিশালাৰ প্ৰেক্ষাগৃহত কৃষি, জলসিঞ্চনৰ লগতে কেইবাটাও বিভাগৰ মুৰব্বী বিষয়াসকলৰ সৈতে এক পৰ্যালোচনা বৈঠক অনুষ্ঠিত কৰে।
বৈঠকত মন্ত্ৰীগৰাকীয়ে কৃষি-উদ্যোগীসকলক ৩ শতাংশ সুতৰ ৰেহাই থকা ২ কোটি টকালৈকে ঋণ প্ৰদান কৰা কৃষি আন্তঃগাঁথনি পুঁজি আঁচনিৰ পূৰ্ণ সুবিধা গ্ৰহণ কৰিবলৈ আহ্বান জনায়।আঁচনিসমূহৰ অগ্ৰগতিৰ পৰ্যালোচনা কৰি মন্ত্ৰী হাজৰীকাই উল্লেখ কৰে যে মুখ্যমন্ত্ৰী ড° হিমন্ত বিশ্ব শৰ্মাৰ ঐতিহাসিক ঘোষণা মৰ্মে প্ৰৱৰ্তন কৰা ‘মুখ্যমন্ত্ৰী কৃষি উৎকৃষ্টতা বঁটা’ৰ অধীনত এই বছৰ ১,০০০ গৰাকী প্ৰগতিশীল তথা শিক্ষিত কৃষকক ১ লাখ টকাকৈ নগদ পুৰস্কাৰ প্ৰদান কৰা হ’ব।
অহা ৫ বছৰত মুঠ ১০,০০০ গৰাকী কৃষকক এই বঁটাৰে পুৰস্কৃত কৰাৰ লক্ষ্য লোৱা হৈছে। ইফালে ‘পি এম কিষাণ’ ৰ সুবিধা বৰ্তমান ৰাজ্যৰ ১৮ লাখ ৬০ হাজাৰ কৃষকে লাভ কৰি আছে আৰু এই সংখ্যা আৰু ১০ লাখলৈ বৃদ্ধি কৰাৰ লক্ষ্যৰে দৈনিক গড়ে ৬,০০০ জনকৈ কৃষকক পঞ্জীয়ন কৰা হৈছে বুলি তেওঁ জানিবলৈ দিয়ে। কাৰবি আংলং আৰু পশ্চিম কাৰবি আংলঙত বৰ্তমান মাত্ৰ ৩৫,০০০ কৃষকেহে এই সুবিধা পাই থকা বাবে স্থানীয় প্ৰশাসনক যোগ্য কৃষকসকলৰ মাটিৰ স্বত্বজনিত সমস্যাসমূহ সমাধান কৰি পঞ্জীয়ন নিশ্চিত কৰিবলৈ তেওঁ নিৰ্দেশ দিয়ে। এই সন্দৰ্ভত অহা ২৪ আগষ্টত গুৱাহাটীত ভূমি ৰেকৰ্ড আৰু জৰীপ সঞ্চালকালয়ৰ সৈতে এক বৈঠক অনুষ্ঠিত হ’ব বুলিও তেওঁ প্ৰকাশ কৰে।
ইয়াৰ উপৰিও, দুয়োখন জিলাতে তৈল খেজুৰ আৰু আনাৰসৰ প্ৰক্ৰিয়াকৰণত গুৰুত্ব দি ১০ বিঘা মাটিত তৈল খেজুৰ খেতিৰে প্ৰায় ৬ লাখ টকাৰ লাভাৰ্জন কৰিব পৰা সম্ভাৱনাৰ কথা উল্লেখ কৰে মন্ত্ৰীগৰাকীয়ে। প্ৰতি বছৰে ৫ কোটিকে মুঠ ২৫ কোটি উদ্যান শস্যৰ পুলি বিতৰণ কৰাৰ লক্ষ্য পূৰণ কৰিবলৈ বিভাগক নিৰ্দেশ দিয়াৰ লগতে কৃষকমহলক তামোল, ক’ক’, নাৰিকল, আনাৰস আৰু মাখনা খেতিৰ জৰিয়তে উপাৰ্জন বৃদ্ধি কৰিবলৈ আহ্বান জনায়।
জলসিঞ্চন বিভাগৰ পৰ্যালোচনাকালত জিলাখনৰ ১৯ হাজাৰ হেক্টৰ কৃষিভূমি সামৰি লোৱা ৭ টা সম্পূৰ্ণ সক্ৰিয় আৰু ২৮১ টা আংশিকভাৱে সক্ৰিয় আঁচনিৰ বুজ লোৱাৰ লগতে বিকল হৈ থকা ১১৯ টা আঁচনি পুনৰ কাৰ্যক্ষম কৰাৰ সম্ভাৱনা পৰীক্ষা কৰা হয়। ৰাজ্যজুৰি ৪ লাখ হেক্টৰ কৃষিভূমিত জলসিঞ্চনৰ ব্যৱস্থা কৰাৰ লক্ষ্যৰে ‘পি এম কুসুম’ , লিফ্ট ইৰিগেশ্যন আৰু কেনেল ব্যৱহাৰত গুৰুত্ব দিবলৈ অভিযন্তাসকলক নির্দেশ দিয়া হয়।
ইয়াৰ পাছত মন্ত্ৰীগৰাকীয়ে তৰালাংছ’স্থিত ছেৰতাছিন প্ৰেক্ষাগৃহত অনুষ্ঠিত ‘কৃষি আন্তঃগাঁথনি পুঁজি’ বিষয়ক এক ৰাজহুৱা সভাতো অংশগ্ৰহণ কৰে। জিলাখনৰ প্ৰগতিশীল কৃষক, কৃষি-উদ্যোগী আৰু অগ্ৰণী বেংক বিষয়াসকলৰ উপস্থিতিত অনুষ্ঠিত এই সভাত মন্ত্ৰী হাজৰীকাই ৩% সুতৰ ৰেহাই থকা ২ কোটি টকালৈকে ঋণ প্ৰদান কৰা আঁচনিখনৰ সৰ্বোচ্চ সুবিধা গ্ৰহণ কৰি নিজকে সফল কৃষি-উদ্যোগী হিচাপে গঢ়ি তুলিবলৈ সমবেত কৃষক তথা উদ্যমী যুৱক-যুৱতীসকলক আহ্বান জনায়।
ইয়াৰ উপৰিও কাৰবি আংলং জিলাত বৰ্তমান মাত্ৰ ৮ টা কৃষক উৎপাদক সংগঠন (FPO) থকা বিষয়টো উল্লেখ কৰি অতি সোনকালে FPO ৰ সংখ্যা আৰু বৃদ্ধি কৰাৰ দিশত কাম কৰিবলৈ জিলা কৃষি বিষয়াক নিৰ্দেশ দিয়ে। মুখ্যমন্ত্ৰী ড° হিমন্ত বিশ্ব শৰ্মাৰ বলিষ্ঠ নেতৃত্বত ৰাজ্যৰ ৪ লাখ হেক্টৰ কৃষিভূমি জলসিঞ্চনৰ আওতালৈ অনাৰ লক্ষ্যৰ কথা দোহাৰি মন্ত্ৰীগৰাকীয়ে তামোল, ক’ক’, নাৰিকল, আনানস আৰু মাখনাৰ অধিক খেতিৰে নিজৰ আয় বৃদ্ধি কৰিবলৈ কৃষকসকলক উৎসাহ যোগায়। উক্ত ৰাজহুৱা সভাতে মন্ত্ৰীগৰাকীয়ে AIF আঁচনিৰ অধীনত নির্বাচিত এজন হিতাধিকাৰীৰ হাতত আনুষ্ঠানিকভাৱে ঋণৰ চেক প্ৰদান কৰে।
আনহাতে, কাজিৰঙা পৰিৱেশ সংবেদনশীল অঞ্চলক লৈ কংগ্ৰেছে কৰা বিৰোধ সন্দৰ্ভত মন্ত্ৰীগৰাকীয়ে প্ৰতিক্ৰিয়া প্ৰকাশ কৰে। মন্ত্ৰী পীযুষ হাজৰিকাই কয় যে নিজৰ শাসনকালত কাজিৰঙাৰ গঁড় হত্যা কৰা কংগ্ৰেছ দলে কাজিৰঙাৰ কথা কোৱাটো লজ্জাজনক। নাম নোলোৱাকৈ গৌৰৱ গগৈক কটাক্ষ কৰি পীযুষ হাজৰিকাই কয় যে বিদেশত পঢ়ি অহা দলটোৰ মুৰব্বীগৰাকীয়ে ‘Eco Sensitive Zone’ আৰু ‘Economic Sensitive Zone’-ৰ মাজৰ পাৰ্থক্য বুজি নাপায়। সেই দলে কি আন্দোলন কৰিব জনা আছে বুলি উল্লেখ কৰে কাৰ্বি আংলঙৰ অভিভাৱক মন্ত্ৰীগৰাকীয়ে কয় যে কংগ্ৰেছে কিয় গঁড় হত্যা কৰিছিল সেই কথা প্ৰথমতে অসমৰ ৰাইজৰ আগত প্ৰকাশ কৰক।উক্ত কাৰ্যসূচীত কাৰ্বি আংলং স্বায়ত্তশাসিত পৰিষদৰ মুখ্য কাৰ্যবাহী সদস্য তুলিৰাম ৰংহাং, বিধায়কসকলৰ লগতে জিলা আয়ুক্ত উপস্থিত থাকে।
