বাৰিষাৰ প্ৰথমটো বানৰ কবলত (Assam flood) ৰাজ্যৰ ৬ জিলা (6 districts)। জিলাকেইখনৰ ২০ হাজাৰোধিক লোক বানত আক্ৰান্ত হৈছে। বুৰ গৈছে খেতিপথাৰ, ঘৰ-বাৰী। আনহাতে, খহনীয়াৰ কবলত পৰিও বহু লোকৰ ভেটি-মাটি উছন হৈছে। তাৰ মাজতে ৰাজ্যৰ শেহতীয়া বান পৰিস্থিতি সন্দৰ্ভত কেন্দ্ৰীয় গৃহমন্ত্ৰী অমিত শ্বাহে মুখ্যমন্ত্ৰীৰ পৰা বুজ লয়। সোমবাৰে টেলিফোনযোগে অমিত শ্বাহে মুখ্যমন্ত্ৰীৰ পৰা শেহতীয়া বান পৰিস্থিতি সন্দৰ্ভত অৱগত হয়। সামাজিক মাধ্যমযোগে মুখ্যমন্ত্ৰী হিমন্ত বিশ্ব শৰ্মাই এই কথা প্ৰকাশ কৰিছে। লগতে বান পৰিস্থিতিৰ সৈতে মোকাবিলা কৰিবলৈ ৰাজ্য চৰকাৰে গ্ৰহণ কৰা ব্যৱস্থা সন্দৰ্ভত মুখ্যমন্ত্ৰীয়ে গৃহমন্ত্ৰীক অৱগত কৰে আৰু এই বিষয়ত তেওঁ কেন্দ্ৰৰ পৰা সম্ভাৱ্য সকলো ধৰণৰ সহায়-সহযোগিতা আগবঢ়োৱাৰ আশ্বাস দিয়া বুলি মুখ্যমন্ত্ৰীয়ে অৱগত কৰে।
মুখ্যমন্ত্ৰীয়ে পোষ্টটোত লিখিছে, ‘‘ধেমাজিৰ বানৰ পৰিপ্ৰেক্ষিতত মাননীয় কেন্দ্ৰীয় গৃহমন্ত্ৰী শ্ৰীঅমিত শ্বাহ ডাঙৰীয়াই আজি টেলিফোনযোগে পৰিস্থিতিৰ বুজ লয়। তেখেতক বিতংভাৱে চলিত উদ্ধাৰ, সাহায্য আৰু পুনৰ্বাসন ব্যৱস্থাৰ বিষয়ে সবিশেষ জনোৱা হয়। এই সংকটময় সময়ত তেখেতে ভাৰত চৰকাৰৰ ফালৰ পৰা সকলোধৰণৰ সহায়-সহযোগিতাৰ আশ্বাস প্ৰদান কৰিছে। বানপীড়িত প্ৰতিজন লোকৰ সুৰক্ষা, সহায় আৰু পুনৰ্বাসনৰ ক্ষেত্ৰত চৰকাৰ সম্পূৰ্ণ দায়বদ্ধ। এই প্ৰাকৃতিক দুৰ্যোগৰ সৈতে আমি সকলোৱে মিলিত প্ৰচেষ্টাৰে মোকাবিলা কৰিম।’’
উল্লেখ্য যে ৰাজ্যৰ প্ৰথমটো বানত আটাইতকৈ ক্ষতিগ্ৰস্ত হৈছে ধেমাজি জিলা। ধেমাজিৰ চিমেন নদীৰ ওপৰত থকা এখন ৰে’ল দলঙৰ এটা অংশ ভাঙি পৰা বুলিও উত্তৰ-পূৱ সীমান্ত ৰে’লৱেৰ এগৰাকী বিষয়াই দেওবাৰে প্ৰকাশ কৰে।
অসম ৰাজ্যিক দুৰ্যোগ ব্যৱস্থাপনা প্ৰাধিকৰণে প্ৰকাশ কৰা শেহতীয়া তথ্য অনুসৰি, ৰাজ্যৰ বানাক্ৰান্ত ছখন জিলা হৈছে ধেমাজি, নলবাৰী, ডিব্ৰুগড়, চিৰাং, লখিমপুৰ আৰু কোকৰাঝাৰ। এই জিলাকেইখনত মুঠ ২২,১২৪ জন লোক বানৰ কবলত পৰি ক্ষতিগ্ৰস্ত হৈছে। আনহাতে, আটাইতকৈ ক্ষতিগ্ৰস্ত ধেমাজি জিলাৰ ১৫,৪৮৩ জন লোক প্ৰভাৱিত হৈছে। ইয়াৰ উপৰি বানত ডুবিছে ৰাজ্যৰ ৯৬ খন গাঁও। আনহাতে, প্ৰায় ১৬৯০ হেক্টৰ শস্যভূমিও বানত ক্ষতিগ্ৰস্ত হৈছে।
