ভাৰতত কৰোনা সংক্ৰমণৰ (Corona) পৰিস্থিতি দিনক দিনে বৃদ্ধি পাইছে। স্বাস্থ্য মন্ত্ৰালয়ে প্ৰদান কৰা পৰিসংখ্যা অনুসৰি, বুধবাৰে দেশত দৈনিক কৰোনা ৰোগীৰ সংখ্যাই ৪ হাজাৰৰ সীমা অতিক্ৰম কৰিলে। পাঁচ মাহৰ পাছত পুনৰ আক্ৰান্তৰ সংখ্যা ৪ হাজাৰলৈ বৃদ্ধি পালে। ৰাজধানীতো কোভিডৰ সংক্ৰমণ বাঢ়িছে।
স্বাস্থ্য মন্ত্ৰালয়ে প্ৰদান কৰা পৰিসংখ্যা অনুযায়ী, বুধবাৰে দিল্লীত নতুনকৈ ৫০৯ জন কৰোনাত আক্ৰান্ত ৰোগী ধৰা পৰে। বুধবাৰ পৰ্যন্ত দিল্লীত সক্ৰিয় কৰোনা ৰোগীৰ সংখ্যা ১৭৯৫ জন। যোৱা ২৪ ঘন্টাত দেশত দৈনিক কৰোনা ৰোগীৰ সংখ্যা বৃদ্ধি পাই ৫০০০ৰ সীমা অতিক্ৰম কৰিছে। কেন্দ্ৰীয় স্বাস্থ্য মন্ত্ৰালয়ৰ পৰিসংখ্যা অনুসৰি, যোৱা ২৪ ঘণ্টাত কৰোনা আক্ৰান্তৰ সংখ্যা হʼল ৫,৩৩৫ জন। যোৱা ২৪ ঘন্টাত এই সংখ্যা ২০ শতাংশ বৃদ্ধি পাইছে।
একে ধাপতে ৰাজধানীত সংক্ৰমণৰ হাৰ বা পজিটিভিটিৰ হাৰো বৃদ্ধি পাইছে। মঙলবাৰে দিল্লীত কৰোনা সংক্ৰমণৰ হাৰ ১৫.৬৪ শতাংশ। ২৪ ঘণ্টাৰ ভিতৰত সংক্ৰমণৰ হাৰ ২৬.৫৪ শতাংশলৈ বৃদ্ধি পায়। বিগত ২৪ ঘণ্টাত ৪২৪ জন লোক কোভিড সংক্ৰমণৰ পৰা সুস্থ হৈ ঘৰলৈ উভতিছে। অৱশ্যে কৰোনা ভাইৰাছৰ বাবে এতিয়ালৈকে ৰাজধানীত কোনো লোকে প্ৰাণ হেৰুৱাবলগা হোৱা নাই। কৰোনা সংক্ৰমণ বৃদ্ধিৰ বাবে চিন্তিত হৈ পৰিছে চিকিৎসক। আগতীয়াকৈ পৰিস্থিতিৰ সৈতে মোকাবিলা কৰিবলৈ দিল্লীৰ চিকিৎসালয়সমূহত বিছনাৰ সংখ্যা বৃদ্ধি কৰা হৈছে।
এনে পৰিপ্ৰেক্ষিতত বুধবাৰে দিল্লীৰ মেয়ৰ শ্বেলী ওবেৰয়ে কয়, “চিকিৎসালয়ত বিছনাৰ সংখ্যা বৃদ্ধি কৰাৰ উপৰি ঔষধ আৰু অক্সিজেনৰ ব্যৱস্থাও কৰা হৈছে। লগতে চিকিৎসালয় কৰ্তৃপক্ষৰ হৈ চিকিৎসক আৰু পৌৰ নিগমৰ বিষয়াসকলৰ মাজত এখন বৈঠক অনুষ্ঠিত হয়। চিন্তাৰ কোনো কাৰণ নাই।” শ্বেলীয়ে আশ্বাস দি কয়, “পৰিস্থিতি নিয়ন্ত্ৰণত আছে। পৰিস্থিতি চম্ভালিবলৈ দিল্লী চৰকাৰ সম্পূৰ্ণ সাজু।”
