উত্তৰ প্ৰদেশ (Utter Pradesh)ৰ বিধায়ক ৰাজু পালৰ হত্যাকাণ্ড (MLA Raju Pal Murder)ৰ মূল সাক্ষী উমেশ পাল (Umesh Pal)ক অপহৰণ (Abduction) কৰাৰ গোচৰত আতিক আহমেদ (Atiq Ahmed) আৰু আন ২ জনক দোষী সাব্যস্ত (convicted) কৰিছে প্ৰয়াগৰাজৰ এখন আদালতে (In a court in Prayagraj)। ২০০৬ চনৰ উমেশ অপহৰণ গোচৰত মঙলবাৰে আতিককে ধৰি অভিযুক্তকেইজনক আদালতত হাজিৰ কৰোৱা হৈছিল। যদিও এই গোচৰত আতিকৰ ভাতৃ আশ্ৰফকে ধৰি ৭জন লোকক দোষমুক্ত কৰা হৈছিল, আদালতে আতিককে ধৰি ৩জন লোকক যাৱজ্জীৱন কাৰাদণ্ড (Life imprisonment)ৰ নিৰ্দেশ দিয়ে।
সমাজবাদী পাৰ্টিৰ প্ৰাক্তন সাংসদ তথা বিধায়ক আতিকৰ বিৰুদ্ধে হত্যা, অপহৰণকে ধৰি এশৰো অধিক গোচৰ। গুজৰাটৰ সাবৰমতী কাৰাগাৰত বন্দী হৈ আছিল আতিক। সোমবাৰে তেওঁক কটকটীয়া নিৰাপত্তাৰ অধীনত প্ৰয়াগৰাজলৈ লৈ যোৱা হয়। উত্তৰ প্ৰদেশ আৰক্ষীৰ জিম্মাত থকাৰ সময়তে তেওঁক নিৰাপত্তা দিব লাগে বুলি উচ্চতম ন্যায়ালয়ত এই আবেদন দাখিল কৰিছিল আতিকে। কেৱল সেয়াই নহয়, মৃত্যুৰ আশঙ্কাৰ বিষয়েও পৰিয়ালৰ লোকে আবেদন জনায়। মঙলবাৰে উচ্চতম ন্যায়ালয়ে এই আবেদন খাৰিজ কৰে।
আতিকৰ উপৰি আদালতে যাৱজ্জীৱন কাৰাদণ্ডৰ শাস্তি প্ৰদান কৰা ২ জন ব্যক্তি হৈছে দীনেশ পাছি আৰু খান সাউলাত হানিফ। কাৰাবাসৰ বাহিৰেও ৩জন ব্যক্তিক ১ লাখ টকাৰ জৰিমনা বিহা হয়। ১৭ বছৰীয়া গোচৰৰ শুনানিৰ বাবে সোমবাৰে সাবৰমতী কাৰাগাৰৰ পৰা প্ৰয়াগৰাজৰ নাইনী কাৰাগাৰলৈ আতিক আৰু আন অভিযুক্তক লৈ যোৱা হয়। ৰাজু পাল হত্যাকাণ্ডৰ মূল সাক্ষী উমেশক যোৱা ২৪ ফেব্ৰুৱাৰীত ঘৰৰ সন্মুখত গুলীয়াই হত্যা কৰা হৈছিল। এই ঘটনাত সমগ্ৰ উত্তৰ প্ৰদেশত হুলস্থুলীয়া পৰিৱেশৰ সৃষ্টি হয়। ৰাজুৰ দৰে উমেশৰ হত্যাকাণ্ডত আতিক আৰু তেওঁৰ দলটোৰ বিৰুদ্ধেও অভিযোগ উত্থাপন হৈছিল।
২০০৫ চনৰ ২৫ জানুৱাৰীত তেতিয়াৰ বহুজন সমাজ পাৰ্টিৰ বিধায়ক ৰাজুক হত্যা কৰা হৈছিল। তেতিয়া উমেশ জিলা পঞ্চায়তৰ সদস্য আছিল। তেওঁ এই হত্যাকাণ্ডত সাক্ষ্য দিব বুলি আৰক্ষীক জনায়। ২০০৬ চনত উমেশে অভিযোগ কৰিছিল যে আতিকে তেওঁক নিয়ন্ত্ৰণ কৰি আছে। লগতে তেওঁৰ বিৰুদ্ধে অপহৰণৰ অভিযোগ। ২০০৭ চনত আতিক, তেওঁৰ ভাতৃ আৰু ৪ জন অচিনাক্ত ব্যক্তিৰ বিৰুদ্ধে এফআইআৰ দাখিল কৰা হৈছিল।
