হাইস্কুল শিক্ষান্ত পৰীক্ষা (HSLC)ৰ বিজ্ঞানৰ প্ৰশ্ন কাকত ফাদিল হোৱা আৰু পৰীক্ষা বাতিল কৰাক কেন্দ্ৰ কৰি চলি থকা উত্তেজনা আৰু প্ৰতিবাদ অব্যাহত থকাৰ মাজতে আজি নগাঁৱত (Nagaon) হাইস্কুল শিক্ষান্ত পৰীক্ষাৰ ভূগোল বিষয়ৰ প্ৰশ্ন কাকত ফাদিল (Question Paper Leak) হোৱা বুলি প্ৰচাৰ হোৱা ঘটনাই সমগ্র ৰাজ্যখনতে তীব্ৰ প্ৰতিক্ৰিয়াৰ (Reaction) সৃষ্টি কৰে।
জানিব পৰা মতে নগাঁৱৰ এজন ছাত্ৰই ভূগোল বিষয় (subject of geography)ৰ ভুৱা প্ৰশ্ন কাকত ফাদিল কৰি ৰাজ্যখনৰ লাখ লাখ পৰীক্ষাৰ্থীক বিভ্ৰান্ত কৰাৰ অভিযোগ উত্থাপন হৈছে। এজন শিক্ষকৰ পৰা এই বিষয়টো অৱগত হোৱাৰ পিছত নগাঁও সংমণ্ডল বিদ্যালয়সমূহৰ পৰিদৰ্শক মৃদুল কুমাৰ নাথে ভূৱা প্ৰশ্ন কাকত ফাদিল হোৱাৰ সন্দৰ্ভত নগাঁও সদৰ আৰক্ষী থানাত এখন এজাহাৰ দাখিল কৰে।
চলিত বৰ্ষৰ হাইস্কুল শিক্ষান্ত পৰীক্ষাত অৱতীৰ্ণ হোৱা এজন ছাত্ৰই সামাজিক মাধ্যমত ভাইৰেল (Viral on social media) কৰিছিল ভূগোল বিষয়ৰ ভুৱা প্ৰশ্ন কাকত। তেওঁ ২২৫ জনীয়া ৱাটছ আপ গ্ৰুপ (whatsup group) খুলি ফাদিল কৰিছিল ভূগোল বিষয়ৰ ভুৱা প্ৰশ্ন কাকত। ছাত্ৰজনে নগাঁৱৰ চকলাঘাটৰ দুগৰাকী ছাত্ৰীকো দিছিল ভুৱা প্ৰশ্ন কাকত। ছাত্ৰজন নগাঁও চহৰৰ সমীপৰ বৰভেটি অঞ্চলৰ এখন ব্যক্তিগত খণ্ডৰ শিক্ষানুষ্ঠানৰ। সেইখন বিদ্যালয়ৰ পৰা নগাঁৱৰ ডচন উচ্চতৰ মাধ্যমিক আৰু বহুমূখী বিদ্যালয়ৰ পৰীক্ষা কেন্দ্ৰৰ পৰা তেওঁ চলিত বৰ্ষৰ হাইস্কুল শিক্ষান্ত পৰীক্ষাত অৱতীৰ্ণ হয়।
আনহাতে নগাঁও সংমণ্ডল বিদ্যালয়সমূহৰ পৰিদৰ্শকে দিয়া এজাহাৰৰ ভিত্তিত নগাঁৱৰ আৰক্ষীয়ে অভিযান চলাই আজি বিয়লি অভিযুক্ত ছাত্ৰজনক আটক কৰি জেৰা অব্যাহত ৰাখিছে।
ইপিনে ভুগোল বিষয়ৰ ভুৱা প্ৰশ্নকাকত বিয়পোৱা চক্ৰৰ বিৰুদ্ধে কঠোৰ হৈছে নগাঁও আৰক্ষী। আজি নগাঁও আৰক্ষীয়ে ফৌজদাৰীপট্টি কাঠমিল চাৰিআলিৰ উত্তৰণ একাডেমীৰ এগৰাকী হাইস্কুল শিক্ষান্ত পৰীক্ষাৰ পৰীক্ষাৰ্থীক আটক কৰাৰ পিছতে নগাঁও আৰক্ষী অধীক্ষক লীনা দলে (Nagaon S.P. Leena Dolay)য়ে এই সন্দৰ্ভত সন্ধিয়া এক সংবাদমেলৰ আয়োজন কৰে।
আৰক্ষী অধীক্ষক গৰাকীয়ে সংবাদমেলত জনোৱা মতে “Protest for HSLC Sibasagar” নামৰ হোৱাটছ এপ গ্ৰুপৰ জৰিয়তে ভুগোলৰ ভুৱা প্ৰশ্নকাকতখন ভাইৰেল হয়। আৰক্ষী অধীক্ষকগৰাকীয়ে জানিবলৈ দিয়া মতে আটকাধীন নাবালকগৰাকীয়ে গ্ৰুপটোত পোৱা প্ৰশ্নকাকতখন তেওঁৰ হোৱাটছ এপৰ ষ্টেটাছৰ জৰিয়তে বিয়পাই দিয়ে। কিন্তু কোনে এই প্ৰশ্নকাকতখন ভাইৰেল কৰিছিল সেই বিষয়ে আৰক্ষী এতিয়াও নিশ্চিত হোৱা নাই। আৰক্ষীয়ে গ্ৰুপটোৰ ৮ জন এডমিনকো এই সন্দৰ্ভত আটক কৰি জেৰা চলাব বুলি জানিবলৈ দিয়ে।
