সোমবাৰে পত্নী ৰাৱৰি (Rabri)ৰ পিছত মঙলবাৰে স্বামী লালুপ্ৰসাদ (Lalu Prasad)। বিহাৰৰ প্ৰাক্তন মুখ্যমন্ত্ৰী লালু প্ৰসাদ যাদৱ (Lalu Prasad Yadav)ক জেৰা কৰিবলৈ দিল্লীত তেওঁৰ কন্যাৰ ঘৰত উপস্থিত হয় চিবিআই। বৰ্তমান লালু আৰজেডিৰ সাংসদ মিছা ভাৰতী (MP Misa Bharati)ৰ ঘৰত থাকে। তাতেই লালুক কৰ্মসংস্থাপনৰ বিনিময়ত মাটি লোৱাৰ (আই আৰ চি টি চি) গোচৰত অনিয়ম প্ৰসঙ্গত জেৰা কৰা হয়। কেন্দ্ৰীয় চোৰাংচোৱা সংস্থাই সোমবাৰে লালুৰ পত্নী তথা বিহাৰৰ প্ৰাক্তন মুখ্যমন্ত্ৰী ৰাৱৰি দেৱীকো জেৰা কৰে।
মাত্ৰ দুদিন পূৰ্বে বংগৰ মুখ্যমন্ত্ৰী মমতা বেনাৰ্জী আৰু অবিজেপিৰ কেইবাগৰাকীও ৰাজ্যিক মুখ্যমন্ত্ৰী আৰু বিৰোধী নেতাই প্ৰধানমন্ত্ৰী নৰেন্দ্ৰ মোদীলৈ পত্ৰ লিখিছিল। পত্ৰখনৰ মূল কথাটো আছিল কেন্দ্ৰীয় সংস্থাটোৱে বিৰোধীৰ ওপৰত চাপ প্ৰয়োগ কৰা। অভিযোগ উত্থাপন হোৱাৰ পাছতো বিজেপিত যোগদান কৰা নেতাসকলৰ বিৰুদ্ধে মৌনতা অৱলম্বন কৰিছে কেন্দ্ৰীয় চৰকাৰ। ৪৮ ঘন্টাৰ ভিতৰতে চিবিআয়ে দিল্লীৰ ঘৰত উপস্থিত হৈ তেজস্বীৰ পিতৃ লালুক জেৰা কৰে। উল্লেখ্য, প্ৰধানমন্ত্ৰীলৈ লিখা পত্ৰখনত স্বাক্ষৰকাৰীসকলৰ ভিতৰত অন্যতম আছিল তেজস্বীও।
সূত্ৰ অনুসৰি, চিবিআয়ে ১৪ বছৰীয়া চাকৰিৰ বিনিময়ত মাটি লোৱাৰ গোচৰত লালুক সোধা-পোছা কৰি কিছু নিৰ্দিষ্ট তথ্য লাভ কৰিব বিচাৰিছে। চিবিআইৰ সূত্ৰ অনুসৰি, এই গোচৰত লালুলৈও চমন প্ৰেৰণ কৰা হৈছিল। সেই উদ্দেশ্যে পুৱাতেই দিল্লীৰ লালুৰ কন্যা মিছাৰ ঘৰত চিবিআই হাজিৰ হয়। বহিঃৰাজ্যৰ পৰা অস্ত্ৰোপচাৰ কৰি উভতি অহাৰ পিছৰে পৰা দিল্লীত থকা কন্যাৰ ঘৰত থাকে লালু। তাৰ বাবেই মিছাৰ ঘৰতেই লালুক জেৰা কৰিব বিচাৰিছে তদন্তকাৰীয়ে। যোৱা সোমবাৰে লালুৰ পত্নী ৰাৱৰিৰ পাটনা বাসগৃহতো তেওঁক জেৰা কৰিছিল।
