দেশৰ মুখ্য নিৰ্বাচন আয়ুক্ত জ্ঞানেশ কুমাৰৰ (Gyanesh Kumar) বিৰুদ্ধে পুনৰ ৰাজপথলৈ ওলাই আহিবলৈ সাজু হৈছে বিৰোধী মিত্ৰজোঁট ‘ইণ্ডিয়া’। উৎসৱৰ পিছত বৃহস্পতিবাৰে তেওঁলোকে বৈঠকত মিলিত হৈ কৌশলৰ সিদ্ধান্ত ল’ব পাৰে। ‘ইণ্ডিয়া’ৰ নেতাসকলে সন্ধিয়া ভিডিঅ’ কনফাৰেন্সিঙৰ জৰিয়তে বৈঠকত মিলিত হ’বলৈ ওলাইছে বুলি সংবাদ সংস্থা এএনআয়ে সূত্ৰৰ উদ্ধৃতি দি প্ৰকাশ কৰিছে। কংগ্ৰেছ নেতা মল্লিকাৰ্জুন খাৰ্গেৰ সভাপতিত্বত অনুষ্ঠিত হ’ব এই বৈঠক। সূত্ৰ অনুসৰি, মমতা বেনাৰ্জী, ছোনিয়া গান্ধী, ৰাহুল গান্ধীয়ে এই বৈঠকত উপস্থিত থাকিব পাৰে। অৱশ্যে বৃহস্পতিবাৰৰ বৈঠক সন্দৰ্ভত মিত্ৰজোঁটে আনুষ্ঠানিকভাৱে একো ঘোষণা কৰা নাই।
জ্ঞানেশ কুমাৰৰ পদত্যাগ আৰু ভোটাৰ তালিকাৰ বিশেষ সংশোধন বাতিলৰ দাবীত ককৰোচ জনতা পাৰ্টীয়ে আৰম্ভ কৰা আন্দোলনে কংগ্ৰেছ, তৃণমূল, সমাজবাদী পাৰ্টী, আপ আদি বিজেপি বিৰোধী দলৰো সমৰ্থন লাভ কৰিছে। ইয়াৰ পূৰ্বে ‘ইণ্ডিয়া’ৰ নেতাসকলে চিজেপিয়ে আহ্বান কৰা আন্দোলনত যোগদান কৰিছিল। জ্ঞানেশ কুমাৰে পদত্যাগ নকৰালৈকে আন্দোলন বন্ধ নকৰে বুলি কৈছে ৰাহুল গান্ধীয়ে। অৱশ্যে দুৰ্গা পূজা আৰু দীপাৱলীৰ মাজত প্ৰতিবাদৰ কাৰ্যসূচী কিছু লেহেমীয়া হৈছে। নৱেম্বৰৰ আৰম্ভণিৰ পৰা পুনৰ পূৰ্ণগতিত আৰম্ভ কৰিবলৈ বদ্ধপৰিকৰ বিৰোধী। বৃহস্পতিবাৰৰ বৈঠকত এই বিষয়ে আলোচনা হ’ব পাৰে।
