লংকা (Lanka) কৃষ্ণ বৰা বি.এড. কলেজৰ মহাবিদ্যালয় (Krishna Bara B.Ed. College College College) সপ্তাহৰ (College week) চতুৰ্থ দিনাৰ কাৰ্যসুচীৰ লগত সঙ্গতি ৰাখি অসম গৌৰৱ অৰণ্য মানৱ যাদৱ পায়েঙ (Forest Man Yadav Payeng) ডাঙৰীয়াই আমন্ত্ৰণ (Invite) ৰক্ষা কৰি মহাবিদ্যালয় প্ৰাংগনত উপস্থিত হয় । মহাবিদ্যালয়ৰ অধ্যক্ষ ড° মুস্তাফিজুৰ ৰহমান ডাঙৰীয়াৰ নেতৃত্বত অনুষ্ঠিত হোৱা সভাখনিত তেখেতে সাৰুৱা ভাষণেৰে মুখৰিত কৰি তোলে।
আৰম্ভণিতে কলেজৰ তৰফৰ পৰা তেখেতক এখনি ফুলাম গামোচাৰে সম্বৰ্ধনা জনোৱা হয়।তেওঁ কয় যে “ভৰিত গজাল সোমালে যিদৰে চেপটিক হয়, ঠিক সেইদৰে গছত নামফলক লগালেও গছে কষ্ট পায়।” তেওঁৰ বক্তব্যত কয় “যিহেতু অভাৱেই আৱিষ্কাৰৰ মূল, ঠিক সেইদৰে উন্নত দেশবোৰত ইতিমধ্যে প্ৰকৃতি ধ্বংস হোৱাৰ বাবেই তেওঁলোকে উপলব্ধি কৰিব পাৰিছে প্ৰকৃতিৰ উপযোগিতা। কিন্তু উন্নয়নশীল দেশ হিচাপে আমি ভাৰতীয়সকল সৌভাগ্যশালী যে প্ৰকৃতিৰ অভাৱ অনুভৱ কৰিব লগা হোৱা নাই।
তেওঁ আহ্বান জনায় যে, সেই অভাৱ যাতে আমি কোনো দিনেই অনুভৱ কৰিবলগা নহয় তাৰ বাবে সচেতন হ’ব লাগে। তেওঁ আৰু কয়, আমি অতি ভাগ্যবান যে আমাৰ দেশৰ পৰা অন্য দেশলৈ অক্সিজেন যোগান ধৰি আহিছে। তেওঁ কভিড মহমাৰীৰ সময়ত জীৱ-জন্তুৰ মুক্ত বিচৰণ স্থলী সেউজীয়া প্ৰকৃতিৰ অপৰূপ সৌন্দৰ্য্য উপলব্ধি কৰিব পাৰিছিল ।
তেওঁ পুনৰ কয় যে “প্ৰকৃতি” বিষয়টো ৰাষ্ট্ৰীয় শিক্ষা নীতিত অন্তৰ্ভুক্ত হ’ব লাগে। তেওঁ শিক্ষাৰ্থী সকলক অনুৰোধ জনায়, জন্মদিনত কেক কটাৰ সলনি তেওঁলোকে যাতে একোটাকৈ গছপুলি ৰোপন কৰে । তেওঁ বক্তব্যৰ শেষত শিক্ষাৰ্থী সকলক আহ্বান জনায়, ভাৰতৰ বাহিৰত শিক্ষা গ্ৰহণ কৰিলেও তেওঁলোকে যাতে পুনৰ উভতি আহি নিজ দেশতেই কম দৰমহা পালেও নিজৰ দেশৰ হকে কাম কৰে আৰু প্ৰকৃতিৰ উন্নয়নত গুৰুত্ব দিয়ে ।
তেখেতে মাধ্যমিক পৰ্যাযলৈকে ছাত্ৰ-ছাত্ৰীক মাতৃভাষাৰ মাধ্যমত শিক্ষা দিয়াৰ পোষকতা কৰে আৰু প্ৰত্যেককে গছ পুলি ৰোপন কৰি সেউজীয়া অসমখনি আৰু অধিক শুৱনি কৰি গঢ়ি তুলিবলৈ আহ্বান জনায়। ভাষণৰ অন্তত তেওঁ মহাবিদ্যালয় চৌহদত এজোপা বৃক্ষ ৰোপন কৰে। তেখেতৰ উপস্থিতিত শিক্ষাৰ্থীসকল যথেষ্ট উৎফুল্লিত হৈ পৰে । অৱশেষত তেখেতক কলেজ কৰ্তৃপক্ষৰ তৰফৰ পৰা ধন্যবাদ জনাই বিদায় দিয়া হয় ।
