ASSAM TIMES POST
নগাঁও : নগাঁও জিলাৰ বটদ্ৰৱাৰ সমীপৰ কোবাইকটা সত্ৰ পৰিচালনাক লৈ বিগত কিছুদিন ধৰি চৰ্চা অব্যাহত থকাৰ সময়তে কোবাইকটা সত্ৰ পুণ: উদ্ধাৰ সমিতিৰ সমিতিৰ সভাপতি তথা জখলাবন্ধা সত্ৰৰ সত্ৰাধিকাৰ যুগল চন্দ্ৰ গোস্বামীয়ে আজি নগাঁও চহৰৰ আমোলাপট্টিস্থ জখলাবন্ধা সত্ৰৰ কাৰ্যালয়ত এক সংবাদ মেল অনুষ্ঠিত কৰি এই সন্দৰ্ভত নিজৰ প্ৰতিক্ৰিয়া প্ৰকাশ কৰে।
সংবাদ মেলত সত্ৰাধিকাৰ যুগল চন্দ্ৰ গোস্বামীয়ে কয় : নগাঁও জিলাৰ বটদ্ৰৱা সমষ্টিৰ অন্তৰ্গত কোবাইকটা সত্ৰৰ কাম কোনো বাধা বিঘিনি নোহোৱাকৈ নিস্বাৰ্থ ভাবে ২০১২ চনৰ পৰা আমি চলাই আছোঁ। ইয়াত চৰকাৰৰ কোনো সহায়- সাহাৰ্য নাই। সত্ৰখন চলাই নিয়াৰ ক্ষেত্ৰত স্থানীয় আন সম্প্ৰদায়ৰ লোকেও সহায়-সহযোগ কৰি আহিছে। সংবাদ মেলত তেওঁ আৰু কয় যে কোবাইকটা সত্ৰ হ’ল শ্ৰী শ্ৰী দামোদৰ দেৱৰ জন্মভিঠা।
এই কথা সত্ৰৰ নামত থকা মাটিৰ নথি পত্ৰত উল্লেখ থকাৰ লগতে ১৯২৫ চনত প্ৰকাশ পোৱা দামোদৰ দেৱৰ চৰিত পুথিতো স্পষ্ট ভাবে উল্লেখ আছে। কিন্তু ইয়াক লৈ একাংশই মানুহৰ মাজত বিভ্ৰান্তিৰ সৃষ্টি কৰিব বিচাৰে। আনহাতে ইয়াক দুৰ্ভাগ্যজনক আখ্যা দি তেওঁ আৰু কয় যে দামোদৰ দেৱৰ জন্মস্থান লৈ অযথা বিতৰ্কৰ সৃষ্টি কৰি আচলতে দামোদৰ দেৱক অপমান কৰি থকা হৈছে। তাহানিতে কোবাইকটা সত্ৰ এলেকাত ৫৪ বিঘা মাটি আছিল। কিন্তু ১৯৮৩ চনত উদ্ভৱ হোৱা সংঘৰ্ষ জৰ্জৰ পৰিস্থিতিৰ বাবে তাৰ পৰা হিন্দু অসমীয়া লোক সকলে মাটি বাৰি এৰি থৈ আন ঠাইলৈ গুচি যায়।
বৰ্তমান সত্ৰৰ নামত ২২ বিঘা মাটি আছে যদিও ইয়াৰে প্ৰায় ১০ বিঘা মাটি বেদখল হৈছে। ইতিমধ্যে স্থানীয় লোকৰ সহযোগত এই মাটি বেদখলমুক্ত কৰাৰ প্ৰয়াস কৰা হৈছে। আনহাতে সত্ৰখন দীৰ্ঘদিনৰে পৰিচালনা কৰাৰ ক্ষেত্ৰত মুছলিম সম্প্ৰদায়ৰ লোকে সহযোগিতা কৰি আহিছে বুলি উল্লেখ কৰি সত্ৰাধিকাৰ গোস্বামীয়ে লগতে কয় যে কোবাইকটা সত্ৰৰ চৌপাশে বৰ্তমান মাত্ৰ এটা চাৰিজনীয়া হিন্দু সম্প্ৰদায়ৰ পৰিয়াল আছে। ইয়াৰ বিপৰীতে চৌপাশে মুছলমান সম্প্ৰদায়ৰ লোকে বসতি কৰি আছে। এই মুছলমান সম্প্রদায়ৰ লোকসকলে সত্ৰখনৰ কল্যাণৰ কাৰণে চিন্তা কৰি অহা বুলি উল্লেখ কৰি সত্ৰাধিকাৰ গোস্বামীয়ে কয় : জালাল, ৰোস্তম ডাক্টৰ, পোৱালি হাজী আদিৰ দৰে লোক সকলে সহায় সহযোগ কৰি আহিছে।
ইপিনে একাংশই অভিযোগ কৰা মতে, আমি চৰকাৰৰ পৰা ধন লাভৰ আশাত সত্ৰখনৰ উন্নয়নৰ বাবে কাম কৰা নাই। চৰকাৰে ধন নিদিলেও সত্ৰখনৰ সামগ্ৰিক উন্নয়নৰ বাবে আমি কাম কৰি আছোঁ। ডেকা সত্ৰাধিকাৰ নিযুক্তিৰ ক্ষেত্ৰত খেলিমেলি হোৱাৰ উত্থাপিত অভিযোগৰ সত্যতা অস্বীকাৰ কৰি গোস্বামীয়ে কয় : “মই ব্যক্তিগত ভাবে পূৰ্ণ পৰ্যায়ৰ সত্ৰাধিকাৰ নিয়োগ কৰা নাই, বৰং কোবাইকটা সত্ৰৰ লগত দীৰ্ঘদিন ধৰি জড়িত থকা লোকৰ সহযোগত নিয়োগ কৰা হৈছে।” এই লৈ একাংশ লোকে অপপ্ৰচাৰ চলোৱাটো দুৰ্ভাগ্যজনক বুলিও তেওঁ মন্তব্য কৰে। সংবাদ মেলত কোবাইকটা সত্ৰ পুণৰউদ্ধাৰ সমিতিৰ মুখ্য সম্পাদক জেউতি হাজৰিকা, ডেকা সত্ৰাধিকাৰ গৌৰৱ মুকুল গোস্বামী আৰু বুঢ়া সত্ৰাধিকাৰ বাগিছ ভাগৱতী, মেধি ভদ্ৰকান্ত শইকীয়া উপস্থিত থাকে।
