ASSAM TIMES POST
নগাঁওঃ মহিলাই বোৰ্খা পিন্ধাকলৈ বিতৰ্ক অব্যাহত থকাৰ মাজতে এইবাৰ নগাঁৱৰ এ টি এমত আৱিৰ্ভাব ঘটিছে বোৰ্খা পিন্ধা প্ৰবঞ্চক।নগাঁও জিলাৰ এগৰাকী অৱসৰপ্ৰাপ্ত শিক্ষয়ত্ৰীৰ বেংকৰ এ টি এম কাৰ্ড বোৰ্খা পিন্ধা এগৰাকী অচিন মহিলাই কৌশলেৰে হস্তগত কৰি লুটি নিয়ে লক্ষাধিক টকা।প্ৰতাৰকৰ কৱলত পৰা উক্ত অৱসৰ প্ৰাপ্ত শিক্ষয়িত্ৰী গৰাকীৰ নাম কনকলতা হাজৰিকা।ঘৰ নগাঁও জিলাৰ দক্ষিণপাট বুঢ়া গোঁসাই আদৰ্শ গাঁৱত।
মহিলাগৰাকী ভাৰতীয় ষ্টেট বেংকৰ নগাঁও শাখাত থকা নং ১০৯৬৫৪০৮৫৭৬ একাউন্টৰ পৰা যোৱা ৩০ অক্টোবৰত টকা উলিয়াবলৈ কঠিয়াতলিৰ এটা এ টি এমলৈ যায়।কঠিয়াতলি ষ্টেট বেংকৰ এ টি এমৰ পৰা নিজৰ কাৰ্ডৰে ৫ হাজাৰ টকা উলিওৱাৰ পিচতে তেওঁৰ কাষত দেখা পায় এগৰাকী বোৰ্খা পিন্ধা মহিলাক।উক্ত অচিনাক্ত মহিলাগৰাকীয়ে কনকলতা হাজৰিকাক বেলেঞ্চ চেক কৰাৰ পৰামৰ্শ দি কৌশলৰে এ টি এম খন সলনি কৰি আন এখন এ টি এম দি গুচি যায়।শিক্ষয়িত্ৰী গৰাকীয়ে ঘৰলৈ উভতি আহি এ টি এম খন পৰীক্ষা নকৰাকৈ থৈ দিয়ে।কালি কনকলতা হাজৰিকাই পুনৰ সেই এ টি এম কাৰ্ডখনৰে টকা উঠাবলৈ আহি গম পায় যে এ টি এম খন তেওঁৰ নহয়।
পিছত তেওঁ বেংকলৈ গৈ একাউন্ট পৰীক্ষা কৰি গম পায় যে নিজৰ একাউন্টৰ পৰা ১ লাখ ১২ হাজাৰ টকা হৰলুকি হৈছে।তেওঁ হাতত থকা এ টি এম কাৰ্ডখন পৰীক্ষা কৰাত সেই খন তফজ্জুল ইছলাম নামৰ এজন লোকৰ বুলি জানিব পাৰে। অৱসৰপ্ৰাপ্ত শিক্ষয়িত্ৰী গৰাকীক বেংক কৰ্তৃপক্ষই অৱগত কৰা মতে দুৰ্বৃত্তই ৩০ অক্টোবৰৰ দিনাই তেওঁৰ বেংক একাউন্টৰ পৰা ৫০ টকাৰ পৰা ২০ হাজাৰ টকা পৰ্যন্ত উঠোৱাৰ লগতে মুঠ ১ লাখ ১২ হাজাৰ টকা কেইবাটাও বেংক একাউন্টলৈ সলনি কৰে।
ইয়াৰে এটা বেংক একাউন্ট ৰেজ্জাক আলি নামৰ এজন লোকৰ নামত থকা বুলি বেংক কৰ্তৃপক্ষই অৱগত কৰে।ঘটনা সম্পৰ্কত শিক্ষয়িত্ৰী গৰাকীয়ে নগাঁও সদৰ আৰক্ষী থানাত আজি এজাহাৰ দাখিল কৰিছে।উল্লেখ্য ৰোগাগ্ৰস্ত মহিলাগৰাকীয়ে নিজৰ চিকিৎসাৰ বাবে মাটি বিক্ৰী কৰি বেংক একাউন্টত থৈছিল।এতিয়া ধনখিনি হৰলুকি হোৱাত বিমোৰত পৰিছে মহিলাগৰাকী ।
