পথ দুৰ্ঘটনাত আহত ইউক্ৰেইনৰ ৰাষ্ট্ৰপতি ভলোডিমিৰ জেলেনস্কি। বুধবাৰে নিশা তেওঁৰ গাড়ীখন এক দুৰ্ঘটনাত পতিত হয়। উক্ত দুৰ্ঘটনাত আহত হয় তেওঁ। বৃহস্পতিবাৰে পুৱা ইউক্ৰেইন চৰকাৰৰ মুখপাত্ৰ ছাৰ্গেই নিকিফোৰভে এই দুৰ্ঘটনাৰ খবৰ দিয়ে।
আন্তঃৰাষ্ট্ৰীয় সংবাদ মাধ্যমৰ সূত্ৰ অনুসৰি, বুধবাৰে নিশা যুদ্ধবিধ্বস্ত খাৰ্কিভৰ পৰা ৰাজধানী কিভলৈ উভতি আহি আছিল ৰাষ্ট্ৰপতিগৰাকী। উভতি অহাৰ সময়ত তেওঁৰ গাড়ীখনৰ এক দুৰ্ঘটনা সংঘটিত হয়। জেলেনস্কিৰ গাড়ীখন আৰু তেওঁৰ কনভয়ত থকা নিৰাপত্তাৰক্ষীসকলক এখন যাত্ৰীবাহী গাড়ীয়ে খুন্দা মাৰে। নিশা প্ৰায় ১.২২ বজাত সংঘটিত হয় এই ঘটনা।
আহত হʼলেও জেলেনস্কিৰ আঘাত গুৰুতৰ নাছিল। প্ৰাথমিক চিকিৎসাৰ পিছতেই তেওঁ সুস্থ অনুভৱ কৰে। আনহাতে, ঘটনাৰ তদন্ত আৰম্ভ হৈছে। যাত্ৰীবাহী গাড়ীখনত থকা লোকসকলো আহত হয়। নিশা ৰাষ্ট্ৰপতিৰ গাড়ীত থকা চিকিৎসকসকলে তেওঁলোকৰ চিকিৎসাৰ ব্যৱস্থা লয়।
