ASSAM TIMES POST
নগাঁও : নগাঁও জিলাত বিগত সময়ত এটাৰ পিছত আনটো অবৈধ মাৰণাস্ত্ৰ উদ্ধাৰ হৈছে। কালি নিশা আৰক্ষীয়ে অভিযান চলাই নগাঁৱৰ কামপুৰ আৰক্ষী থানাৰ অন্তৰ্গত মাধৱ কন্দলী ক্ষেত্ৰৰ পৰা কীৰ্তি কমল ফুকন নামৰ এজন লোকক গ্ৰেপ্তাৰ কৰাৰ লগতে তেওঁৰ পৰা চীনত নিৰ্মিত এটা নাইন এম এম পিষ্টল আৰু পাঁচ ৰাউণ্ড সজীৱ গুলী উদ্ধাৰ কৰে। আজি নগাঁও জিলা আৰক্ষী অধীক্ষকৰ কাৰ্যালয়ত আয়োজিত এক সংবাদ মেলত আৰক্ষী অধীক্ষক শংকৰব্ৰত ৰায় মেধিয়ে এই প্ৰসংগত কয় যে ধৃত কীৰ্তি কমল ফুকন পেছাত এগৰাকী হাৰ্ডৱেৰ ব্যৱসায়ী। তেওঁ নিজে অপৰাধজনিত ঘটনা সংঘটিত নকৰে যদিও তেওঁ অবৈধ ভাবে ক্ৰয় কৰা পিষ্টলটো অপৰাধীক ভাড়াত দিয়ে।ধৃত ফুকনে দীৰ্ঘদিন ধৰি এনেদৰে অবৈধ ব্যৱসায় চলাই আহিছে। এই কথা ইতিমধ্যে আৰক্ষীৰ জেৰাত অপৰাধীজনে স্বীকাৰ কৰিছে। আৰক্ষী অধীক্ষক গৰাকীয়ে জনোৱা মতে, জিলাখনৰ পৰা অপৰাধজনিত ঘটনা ৰোধ কৰাৰ বাবে এটি বিশেষী আৰক্ষী গোট গঠন কৰি বিগত চলিত বৰ্ষৰ জানুৱাৰী মাহৰ পৰা এক পৰিকল্পনা হাতত লোৱা হৈছে। সেই পৰিকল্পনা অনুসৰি, ইতিমধ্যে জিলাখনৰ বিভিন্ন আৰক্ষী থানাত ২৪ টা গোচৰ ৰুজু কৰি মাৰণাস্ত্ৰসহ ৩৬জন অপৰাধীক গ্ৰেপ্তাৰ কৰা হৈছে।
এই গোচৰ সমুহ নগাঁও সদৰ, জখলাবন্ধা, কামপুৰ, ৰূপহীহাট, জুৰীয়া, চামগুৰি, ধিং আৰক্ষী থানাত ৰুজু হৈছে। ইয়াৰে সৰ্বাধিক গোচৰ ৰুজু হৈছে নগাঁও সদৰ আৰক্ষী থানা। ইপিনে, আৰক্ষীয়ে ৩৬ জন অপৰাধীৰ লগতে ২৫ টাকৈ মাৰণাস্ত্ৰ জব্দ কৰিবলৈ সক্ষম হৈছে। ইয়াৰে ৬ টা ডাঙৰ আৰু ১৯ সৰু মাৰণাস্ত্ৰ আছে। তদুপৰি, আৰক্ষীয়ে বিগত ১০ মাহত ৭৫ টা সজীৱ গুলিও উদ্ধাৰ কৰিছে। এই মাৰণাস্ত্ৰ সমুহ মুলতঃ চুৰি-ডকাইতি, গঁড় চিকাৰ আদি কাৰ্যত অপৰাধী সকলে ব্যৱহাৰ কৰি অপৰাধ কাৰ্য সংঘটিত কৰিছে বুলি আৰক্ষী অধীক্ষক গৰাকীয়ে জানিবলৈ দিছে। একমাত্ৰ সৰ্বসাধাৰণ ৰাইজৰ সহযোগিতাৰ বাবেই আৰক্ষীয়ে ইতিমধ্যে বহু অপৰাধীক অস্ত্ৰসস্ত্ৰসহ কৰায়ত্ত কৰিবলৈ সক্ষম হোৱা মন্তব্য কৰি আৰক্ষী অধীক্ষক গৰাকীয়ে কয় যে যিসকল লোকে অপৰাধী কৰায়ত্ত কৰাৰ ক্ষেত্ৰত সহায় কৰিছে তেওঁলোকক আৰ্থিক ধনেৰে পুৰস্কৃত কৰা হৈছে। তদুপৰি,জীৱনৰ নিৰাপত্তা সুনিশ্চিত কৰাৰ বাবে সকলো ধৰণৰ গোপনীয়তাও অৱলম্বন কৰা হৈছে। নিয়মিত ভাবে আৰক্ষীৰ লোক বদলি হোৱাৰ বাবে বহু সময়ত অপৰাধীৰ গতিবিধি, স্থান-কাল আদি জানিবলৈ অসুবিধাৰ সন্মুখীন হয় বুলি উল্লেখ কৰি আৰক্ষী অধীক্ষক জনে কয় যে নগাঁও আৰক্ষীয়ে সকলোৰে সুবিধা হোৱাকৈ ডাটা সংৰক্ষণৰ বাবে সকলো তথ্য ডিজিটেলাইজ কৰিছে। অপৰাধী সকলে নিজৰ কৌশল সলনি কৰাৰ বাবে আৰক্ষীয়ে অপৰাধীক কৰায়ত্ত কৰাৰ ক্ষেত্ৰত জটিলতা আহি পৰিছে যদিও নগাঁও আৰক্ষীয়ে অপৰাধ নিৰ্মুল কৰাত চেষ্টা অব্যাহত ৰাখিছে বুলিও আৰক্ষী অধীক্ষক গৰাকীয়ে সংবাদ মেলত অবগত কৰে।
