ক্ৰমান্বয়ে বৃদ্ধি পাইছে নেকি বিজেপিৰ সৈতে দূৰত্ব নীতিশ কুমাৰৰ জেডিইৰ ? প্ৰধানমন্ত্ৰী নৰেন্দ্ৰ মোদীৰ নেতৃত্বত অনুষ্ঠিত নিটি আয়োগৰ বৈঠকত অংশগ্ৰহণ কৰা নাই বিহাৰৰ মুখ্যমন্ত্ৰীয়ে।
মোডী নেতৃত্বাধীন বৈঠকত নীতিশে অংশগ্ৰহণ নকৰাৰ সিদ্ধান্তত প্ৰশ্ন উত্থাপন হৈছে জাতীয় ৰাজনীতিত। মোদীৰ অনুষ্ঠানত এইবাৰ দ্বিতীয়বাৰৰ বাবে অনুপস্থিত থাকে নীতিশ।
সংবাদ সংস্থাৰ সূত্ৰ অনুসৰি সোমবাৰে নিটি আয়োগৰ বৈঠকত বিহাৰৰ মুখ্যমন্ত্ৰীৰ পক্ষৰ কোনো প্ৰতিনিধি উপস্থিত নাই।
জানিব পৰা মতে, শেহতীয়াকৈ কৰোনাৰ পৰা সুস্থ হৈ উঠা নীতিশে নিজৰ ‘ডেপুটি’ক সভালৈ পঠিয়াব বিচাৰিছিল। কিন্তু নীতি আয়োগৰ বৈঠক কেৱল মুখ্যমন্ত্ৰীৰ সৈতেহে অনুষ্ঠিত হোৱাৰ কথা। গতিকে নীতিশৰ প্ৰতিনিধিয়ে তাত যোগদান কৰা নাই। সূত্ৰ অনুসৰি অহা সোমবাৰে নীতিশে অনুষ্ঠিত কৰিব ‘জনতা দৰবাৰ’ কাৰ্যসূচী। যোৱা কেইসপ্তাহমানৰ পৰা তেওঁৰ অসুস্থতাৰ বাবে এই কাৰ্যসূচী অনুষ্ঠিত কৰিব পৰা নাই।
দৰাচলতে ইয়াৰ পূৰ্বে প্ৰধানমন্ত্ৰীয়ে যোৱা মাহত প্ৰাক্তন ৰাষ্ট্ৰপতি ৰামনাথ কোবিন্দৰ বাবে নৈশভোজনৰ আয়োজন কৰিছিল। এনডিএৰ মিত্ৰ এইজন জেডিইউৰ নেতা সেই অনুষ্ঠানতো উপস্থিত নহ’ল। কেন্দ্ৰীয় গৃহমন্ত্ৰী অমিত শ্বাহে আহ্বান কৰা মুখ্যমন্ত্ৰীসকলৰ বৈঠকতো অংশগ্ৰহণ কৰা নাই নীতিশে। তেওঁৰ সলনি তেওঁৰ প্ৰতিনিধি সভাত উপস্থিত হয় ।
বিহাৰৰ মুখ্যমন্ত্ৰী হিচাপে প্ৰত্যাৱৰ্তনৰ পাছৰে পৰা বিজেপিৰ পৰা নিজকে আঁতৰাই ৰখাৰ খবৰ আহিছে। ইয়াৰ পিছতে নীতিশৰ জে ডি ইউ কেইবাটাও বিষয়ত মোদী চৰকাৰৰ বিপৰীত দিশলৈ গৈছে। যাৰ আটাইতকৈ শেহতীয়া সংযোজন হৈছে ‘অগ্নিপথ’ প্ৰকল্প। কেন্দ্ৰৰ এই প্ৰকল্পৰ বিৰোধিতা কৰিছে জেডিইউয়ে। এই প্ৰেক্ষাপটত নীতি আয়োগৰ বৈঠকত অনুপস্থিত থকাৰ সিদ্ধান্তক তাৎপৰ্যপূৰ্ণ বুলি বিবেচিত হৈছে।
