ৰাষ্ট্রীয় স্বয়ংসেৱক সংঘৰ সৰসংঘচালক মোহন ভাগৱত চাৰিদিনীয়া কাৰ্যসূচীৰে আজি কাৰ্বি আংলং জিলাৰ ফুলনিত উপস্থিত হৈছে ।
ৰাষ্ট্ৰীয় স্বয়ং সেবক সংঘৰ মুৰব্বীগৰাকী ফুলনিত থকা ৰাষ্ট্ৰীয় স্বয়ংসেৱক সংঘৰ ভাতৃ সংগঠন বিশ্ব হিন্দু পৰিষদৰ আশ্ৰমত ১৩ মে’ৰ বিয়লি ভাগত উপস্থিত হৈ ১৪, ১৫ আৰু ১৬ মে’ তাৰিখে ৰাষ্ট্রীয় স্বয়ংসেৱক সংঘৰ দ্বিতীয় বৰ্ষৰ প্রশিক্ষণৰ বিভিন্ন দিশ চোৱা-চিতা কৰাৰ লগতে বৌদ্ধিক প্ৰদান কৰিব। ৰাষ্ট্ৰীয় স্বয়ংসেৱক সংঘৰ মুৰব্বীগৰাকী গৰাকীয়ে ১৭ মে ‘ পুনৰ উভতি যাব ।
ইয়াৰ পূৰ্বে ৰাষ্ট্ৰীয় স্বয়ং সেৱক সংঘৰ মূৰব্বীগৰাকীয়ে মণিপুৰত ৰাষ্ট্ৰীয় স্বয়ংসেৱক সংঘৰ এক অনুষ্ঠানত অংশ গ্রহণ কৰি কাৰ্বি আংলং জিলাৰ ফুলনিত উপস্থিত হয় । উল্লেখ্য, কাৰ্বি আংলঙৰ ফুলনিৰ আশ্ৰমত ৯ মে’ৰ পৰা আৰম্ভ হৈছে ৰাষ্ট্ৰীয় স্বয়ংসেৱক সংঘৰ অসম ক্ষেত্রৰ দ্বিতীয় বৰ্ষৰ ২০ দিনীয়া প্ৰশিক্ষণ শিবিৰ।
ৰাষ্ট্রীয় স্বয়ংসেৱক সংঘৰ অসম ক্ষেত্ৰৰ দ্বাৰা পৰিচালিত প্ৰথম বৰ্ষৰ প্রশিক্ষণ লোৱা স্বয়ংসেৱক সকলেহে এই প্রশিক্ষণত অংশ গ্রহণ কৰে বুলি ৰাষ্ট্ৰীয় স্বয়ংসেৱক সংঘৰ উত্তৰ অসম প্ৰান্তৰ প্ৰচাৰ প্ৰমুখ কিশোৰ শিৱম জানিবলৈ দিছে। ৰাষ্ট্রীয় স্বয়ংসেৱক সংঘৰ অসম ক্ষেত্ৰৰ আৰু উত্তৰ অসম প্ৰান্তৰ প্ৰায় সংখ্যক অধিকাৰীয়ে এই প্রশিক্ষণ শিবিৰত উপস্থিত থাকিব ।
ইয়াৰ পূর্বে ৰাষ্ট্রীয় স্বয়ং সেৱক সংঘৰ দ্বিতীয় বৰ্ষৰ প্রশিক্ষণ সমূহ হোজাইৰ লগতে গুৱাহাটীত অনুষ্ঠিত হৈছিল যদিও এইবেলি কাৰ্বি আংলং জিলাৰ ফুলনিৰ আশ্ৰমত এই প্রশিক্ষণ অনুষ্ঠিত হৈছে ৷ ইয়াৰ বাবে ফুলনিৰ আশ্ৰমখনক নকৈ সজাই তোলা হৈছে ।
ৰাষ্ট্ৰীয় স্বয়ংসেৱক সংঘৰ দ্বিতীয় বৰ্ষৰ বৰ্গত মুঠ ১৫৪ গৰাকী স্বয়ংসেৱকে প্ৰশিক্ষণ গ্রহণ কৰাৰ লগতে ১৬ গৰাকী শিক্ষকে প্ৰশিক্ষণ দিব। তদুপৰি, শতাধিক কাৰ্যকৰ্তাই বিভিন্ন ক্ষেত্রত ভাগ লৱ বুলি প্ৰান্ত প্ৰচাৰ প্ৰমুখ কিশোৰ শিৱমে জানিবলৈ দিছে।