ASSAM TIMES POST
অজন্তা তালুকদাৰ, বোকাখাতঃ ৰাষ্ট্ৰীয় নাগৰিক পঞ্জীৰ ৩১ আগষ্টত প্ৰকাশিত চূড়ান্ত তালিকাত নাম নাহিল ভাৰতীয় সেনাৰ এজন প্ৰাক্তন সেনা জোৱান আৰু দুবাৰকৈ বিনা প্ৰতিদণ্ডিতাৰে পঞ্চায়তৰ সভাপতি নিৰ্বাচিত হোৱা এগৰাকী ব্যক্তিৰ পৰিয়ালৰ নাম । দুয়োজনেই গোৰ্খা সম্প্ৰদায়ৰ ৷ বোকাখাত মহকুমাৰ গোলাঘাট পশ্চিম উন্নয়ণ খণ্ড, বোকাখাতৰ অধীনৰ উত্তৰ পূব কাজিৰঙা গাঁও পঞ্চায়তৰ পৰা দুবাৰ সভাপতি হিচাপে নিৰ্বাচিত হোৱা জগত বাহাদুৰ ছেত্ৰী আৰু ভাৰতীয় সেনাত সুদীৰ্ঘ ৩০ বছৰ চাকৰি কৰি অৱসৰ গ্ৰহণ কৰা প্ৰাক্তন সেনা জোৱান ৰাম বাহাদুৰ ৰায়ৰ পৰিয়ালৰ নাম নুঠিল তালিকাত।
জগত বাহাদুৰৰ ঘৰ বোকাখাতৰ ডিফলুপথাৰত আৰু ৰাম বাহাদুৰ ৰায় ঘৰ খুমটাইত ৷ ৩১ আগষ্টত প্ৰকাশিত চূড়ান্ত এন আৰ চিত বোকাখাত, দেৰগাঁও আৰু খুমটাই সমষ্টিৰ প্ৰায় ২৫০ ৰ পৰা ৩০০ লোকৰ নাম প্ৰকাশ নহ’ল এন আৰ চিত ৷ কাৰোবাৰ পুত্ৰৰ নাম আহিছে যদি কাৰোবাৰ পিতৃৰ নাম প্ৰকাশ নাপালে চূড়ান্ত তালিকাত ৷ কিন্তু জগত বাহাদুৰ ছেত্ৰী আৰু ৰাম বাহাদুৰ ৰায়ৰ পৰিয়ালৰ কাৰোৱেই নাম প্ৰকাশ নাপালে এন আৰ চিৰ চূড়ান্ত তালিকাত ৷
আজি বিয়লি বোকাখাতৰ গোৰ্খা ভৱনত অসম গোৰ্খা সন্মিলন, গোলাঘাট পশ্চিম জিলা সমিতিৰ বৰ্দ্ধিত কাৰ্যনিৰ্বাহকৰ অন্তত সংবাদ মেল যোগে এই কথা সদৰি কৰে সমিতিৰ বিষয়ববীৰ লগতে এন আৰ চিত নাম নহা দুই ব্যক্তিয়ে ৷ ৩১ আগষ্টত প্ৰকাশ পোৱা এন আৰ চিৰ চূড়ান্ত তালিকাক লৈ মুঠেই সন্তষ্ট নহয় গোৰ্খা জাতিক প্ৰতিনিধিত্ব কৰা অসম গোৰ্খা সন্মিলন, গোলাঘাট পশ্চিম জিলা সমিতি ৷
ভাৰত-নেপালৰ ভূমি চুক্তিৰ আধাৰত অসমত দীৰ্ঘ সময় ধৰি বসবাস কৰি থকা গোৰ্খা সকল কোনো কাৰণতে বিদেশী নহয় বুলি দাবী কৰাৰ লগতে এন আৰ চিৰ ক্ষেত্ৰত প্ৰতিক হাজেলাক অসমত বসবাস কৰি থকা গোৰ্খাসকলৰ ক্ষেত্ৰত পুনৰ বিবেচনা কৰিবৰ বাবে দাবী জনায় ৷ এই ক্ষেত্ৰত এন আৰ চিত নাম ভৰ্তিৰ বাবে বিদেশী ন্যায়াধিকৰণত পুনৰ আবেদন নকৰে বুলি সংবাদমেল যোগে স্পষ্ট কৰি দিয়ে সমিতিৰ সভাপতি ৰাজু বাহাদুৰ ছেত্ৰীয়ে ৷
১৯৪২ চনত বোকাখাতৰ ডিফলুপথাৰত জন্ম লাভ কৰা জগত বাহাদুৰ ছেত্ৰীয়ে শিক্ষা গ্ৰহণৰ লগতে শিক্ষানুষ্ঠান প্ৰতিষ্ঠা কৰাৰ লগতে পঞ্চায়তৰ সভাপতি হিচাপে সমাজ সেৱাত নিজকে নিয়োজিত কৰি আহিছে ৷ তেওঁ পুত্ৰ কৃষ্ণ বাহাদুৰ ছেত্ৰী সদৌ অসম ছাত্ৰ সন্থাৰ বোকাখাত মহকুমা আৰু গোলাঘাট জিলাত নেতৃত্ব বহন কৰি অসম আন্দোলনত জড়িত হৈ পৰিছিল ৷
আনহাতে ৰাম বাহাদুৰ ৰায়ে সুদাৰ্ঘ ৩০ বছৰ কাল ভাৰতীয় সেনাত জড়িত হৈ দেশ মাতৃ সেৱা আগবঢ়াই আহিছিল ৷ তেনে দুজন ব্যক্তিৰ নিজৰ লগতে পৰিয়ালৰ লোকৰ নাম এন আৰ চিৰ পৰা বাদ পৰি যোৱাতো দুৰ্ভাগ্যজনক বুলি সংবাদ মেলত সদৰি কৰে অসম গোৰ্খা সন্মিলন, গোলাঘাট পশ্চিম জিলা সমিতিৰ সভাপতি ৰাজু বাহাদুৰ ছেত্ৰীয়ে ৷ এই ক্ষেত্ৰত এন আৰ চিৰ মুখ্য সমন্বয়ক প্ৰতিক হাজেলাক নিজৰ স্থিতি স্পষ্ট কৰিবৰ বাবে অসম গোৰ্খা সন্মিলন গোলাঘাট পশ্চিম জিলা সমিতিয়ে দাবী জনাইছে ৷
