নিউজ ডেস্কঃ
তামিলনাডুৰ মুঠ ২৩৪খন আসনত ৬ এপ্রিলত ভোটগ্রহণ হ’ব। ফলাফল ঘোষণা কৰা হ’ব ২ মে’ত। ৰাজ্যত বর্তমানে আইএডিএমকে চৰকাৰ আছে। এইবাৰ আইএডিএমকে আৰু বিজেপি মিলি এনডিএ জোঁট হিচাবে বিধানসভা নির্বাচন খেলিছে। এনডিএ জোঁটে দাবী কৰিছে যে জনগণে তেওঁলোকৰ পক্ষত ভোট দিব। একে সময়তে, এমকে ষ্টেলিনৰ ডিএমকে আৰু কংগ্রেছ জোঁটে দাবী কৰিছে যে এইবাৰ জনগণে তেওঁলোকৰ হাতত দিব ৰাজ্যৰ শাসনৰ বাঘজৰী। ৰাজ্যখনত চৰকাৰ গঠনৰ বাবে ১১৮খন আসনৰ প্রয়োজন। এইবোৰৰ মাজতে এটি নতুন নির্বাচনী জনমত সমীক্ষা প্রকাশিত হৈছে।
সমীক্ষাটোত প্ৰকাশ পাইছে তলৰ তথ্য :
● ইউপিএ (কংগ্রেছ + ডিএমকে + অন্যান্য) – ১৬১-১৬৯খন আসন
● এনডিএ (এআইএডিএমকে + বিজেপি + অন্যান্য) – ৫৩-৬১খন আসন
● এমএনএম (মাক্কাল নিধি মায়াম) – ২-৬খন আসন
● এএমএমকে (আম্মা মাক্কাল মুন্নেত্রা কাজগম) – ১-৫খন আসন
● অন্যান্য – ৩-৭খন আসন
সমীক্ষাৰ তথ্য মতে, এইবাৰ কংগ্রেছ আৰু ডিএমকে জোঁটে ৰাজ্যখনত বৃহৎ জয় পাব পাৰে। এই জোঁটে ১৬১ৰ পৰা ১৬৯খন আসন পাব বুলি অনুমান কৰা হৈছে। আনহাতে, এনডিএ জোঁটে ৫৩ৰ পৰা ৬১খন আসন পাব পাৰে৷ অর্থাৎ এইবাৰৰ নির্বাচনত এনডিএ-ই বৃহৎ আঘাত পাবলৈ আগবাঢ়িছে।
ইফালে কমল হাচানৰ দল মাক্কাল নিধি মায়ামে সমীক্ষাত বিশেষ একো দেখুৱাব পৰা নাই। সোমবাৰে কমল হাচানে কোয়েম্বাটোৰ দক্ষিণ সমষ্টিৰ পৰা মনোনয়ন জমা দিছে।
