ষ্টাফ ৰিপ’ৰ্টাৰ:
ডিফু : ক্রীড়াখণ্ডৰ উন্নয়নব বাবে শেহতীয়াকৈ পাহাৰীয়া জিলা কার্বি আংলঙত ক্রীড়া আন্তঃগাঁঠনি নির্মাণৰ বাবে ভালেকেইটা গুৰুত্বপূর্ণ আঁচনি ৰূপায়ণ কৰাৰ সময়তে আজি ডিফুৰ কার্বি আংলং ক্রীড়া সন্থাৰ ক্রীড়া প্রকল্পত এখন বহু সুবিধাযুক্ত আন্তর্জাতিক মানদণ্ডৰ এখনি ইনড’ৰ ষ্টেডিয়ামৰ আধাৰশিলা স্থাপন কৰা হয়।
আজি এক আড়ম্বপূর্ণ অনুষ্ঠানত অনুষ্ঠিত হোৱা আধাৰশিলা স্থাপন অনুষ্ঠানত মুখ্য অতিথি হিচাপে উপস্থিত থাকি প্রদান কৰা ভাষণত পৰিষদৰ মুখ্য কার্যবাহী সদস্য তুলিৰাম ৰংহাঙে ইনডৰ ষ্টেডিয়ামখনত উপলব্ধ হ’বলগীয়া বিভিন্ন সা-সুবিধা সম্পর্কে ব্যাখ্যা আগবঢ়ায়।
সেই অনুসৰি, ষ্টেডিয়াম কক্ষত টেবুল টেনিচ, কাৰাটে, ডবাখেল আদিৰ বাবে ছটা সুকীয়া হল, এশ আসনবিশিষ্ট এটা আলােচনা কক্ষ, কার্যালয়, ভোজনালয়ৰ লগতে ষ্টেডিয়ামখনৰ প্রতিপালনৰ বাবে প্রয়ােজনীয় খৰছৰ জোৰা মাৰিবৰ বাবে গুৰুদ্বাৰা পথৰ দিশে ছখন ব্যবসায় প্রতিষ্ঠান নির্মাণ কৰি ভাড়া হিচাপে প্রদান কৰা হ’ব। ইয়াৰ উপৰি থাকিব পার্কিঙৰ সুব্যৱস্থা।
তিনি মহলীয়া বহু সুবিধাযুক্ত ষ্টেডিয়ামখনত লগতে ১২০০ লোক বহিব পৰা এটা হলৰ লগতে উক্ত হলত বেডমিন্টন, বাস্কেটবল, ভলীবল আদি খেলৰ সুবিধা থাকিব। ষ্টেয়ামটোৰ সৈতে সংযুক্ত থাকিব চাৰি হাজাৰ আসনযুক্ত এখনি মুকলি মঞ্চ। ষ্টেডিয়ামখনত লগতে সকলো অত্যাধুনিক সা-সুবিধাৰে এক ভিভিআইপি গেলেৰীৰো ব্যবস্থা কৰা হৈছে।
উক্ত গেলেৰী কেন্দ্রীয়ভাবে শীত-তাপ নিয়ন্ত্রিত হোৱাৰ লগতে দুটাকৈ এলিভেটৰৰ উপৰি সুৰক্ষামূলক সকলো সা-সুবিধাই উপলব্ধ হ’ব বুলি মুখ্য কার্যবাহী গৰাকীয়ে অৱগত কৰে ।ষ্টেডিয়ামটোৰ নির্মাণ কার্য অহা এটা বছৰৰ ভিতৰতে সম্পূর্ণ কৰা হ’ব বুলি মুখ্য কার্যবাহী গৰাকীয়ে সভাত নিশ্চিতি প্রদান কৰে।
আনহাতে, কাৰ্বি আংলং স্বায়ত্তশাসিত পৰিষদৰ অন্তর্গত ২৬টা পৰিষদীয় সমষ্টিত দহ কোটিকৈ টকা ব্যয়সাপেক্ষে নির্মাণকার্য চলি থকা ষ্টেডিয়ামসমূহৰ ২৫ খনৰ নির্মাণ কার্য অহা অক্টোবৰতে সম্পূর্ণ হ’ব বুলি মুখ্য কার্যবাহী গৰাকীয়ে জানিবলৈ দিয়ে। অনুষ্ঠানটোত পৰিষদৰ অধ্যক্ষ লংকি তিমুৎ, উপাধ্যক্ষ ৰীতেশ ইংহি, সাংসদ হৰেণ ছিং বে’ তথা পৰিষদৰ কেইবাগবাকী কাৰ্যবাহী সদস্য আৰু পৰিষদীয় সদস্য উপস্থিত থাকে।
