অজন্তা তালুকদাৰ:
বোকাখাত : কাজিৰঙা পৰ্যটনত নতুনকৈ সংযোজিত হোৱা বোকাখাতৰ নিকতবৰ্তী কাকচাং জলপ্ৰপাতলৈ আহি মৃত্যু হৈছে দুজনকৈ যুৱকৰ৷ আজি বিয়লি সংঘটিত হৈছে এই কৰুণ ঘটনাটো৷ উল্লেখ্য যে বোকাখাত চহৰৰ পৰা ১৫ কি: মি: নিলগত কাৰ্বি আংলঙৰ কাকচাঙৰ কাইফলাংচু জলপ্ৰপাত৷ কাজিৰঙা দৰ্শন কৰিবলৈ অহা বিভিন্নগৰাকী পৰ্যটক উপস্থিত হয় এই জলপ্ৰপাতত৷
আনকি, এই গৰমৰ সময়তো প্ৰকৃতিৰ স’তে একাত্ম হ’বলৈ বিভিন্নজন লোক আহে এই জলপ্ৰপাতলৈ৷ কাৰ্বি পাহাৰৰ অত্যন্ত সুন্দৰ পৰিৱেশত থকা এই কাকচাঙৰ কাইফলাংচু জলপ্ৰপাততে সংঘটিত হৈছে পুনৰ এক অঘটন৷ প্ৰাপ্ত তথ্য মতে, জলপ্ৰপাতটোলৈ আজি বিয়লি ভাগত ফুৰিবলৈ গোলাঘাটৰ পৰা আহিছিল ৮ জনীয়া এটা যুৱকৰ দল৷ ফুৰ্তি-আনন্দৰ মাজতে গা পা ধুই থাকোতে হঠাৎ দলটোৰ দুজন যুৱক পানীত পৰি যায়৷
দলটোৰ গোলাঘাটৰ ষ্টেচন পথৰ বিভাকৰ নাগ (২০) আৰু টুকানী পাৰ্কৰ সুদীপ বাকচী (২২) নামৰ যুৱক দুজন সন্ধানহীন হোৱাত বন্ধুবৰ্গই বিচাৰ-খোচাৰ আৰম্ভ কৰে৷ কিন্তু, যোৱা নিশা হোৱা ধাৰাসাৰ বৰষুণৰ বাবে জলপ্ৰপাতটোত পানী বাঢ়ি আছিল৷
ইপিনে, সন্ধিয়া নামি অহাৰ পাছতো কোনো শুংসূত্ৰ নোলোৱাত সন্ধানহীন দুই যুৱকৰ বন্ধুবৰ্গ চিন্তিত হৈ পৰে৷ ইয়াৰ মাজতে কাৰ্বি আংলঙৰ ডলামৰা আৰক্ষী ঘটনাস্থলীত উপস্থিত হয়৷ নিশা বেছি হৈ অহাৰ বাবে আৰক্ষী অভিযান চলাব পৰা নাই যদিও ইতিমধ্যে পানীত পৰা দুই যুৱকৰ মৃত্যু হৈছে বুুলি এক চৰকাৰী সূত্ৰই প্ৰকাশ কৰিছে৷
আংলং
