গুৱাহাটী : কাইলৈ ৪ ছেপ্টেম্বৰ তাৰিখে, গুৱাহাটীৰ পাঞ্জাবাৰীস্থিত শ্ৰী মন্ত শংকৰদেৱ কলাক্ষেত্ৰত পুৱা ১০ বজাৰ পৰা ভাৰতীয় জনতা পাৰ্টি, অসম প্ৰদেশৰ নৱ গঠিত ৰাজ্যিক কাৰ্য্যনিৰ্বাহক সমিতিৰ প্ৰথমখন ৰাজ্যিক কাৰ্য্যনিৰ্বাহক সভা অনুষ্ঠিত হব।
বিজেপি, অসম প্ৰদেশৰ মাননীয় ৰাজ্যিক সভাপতি শ্ৰী ৰণজিত কুমাৰ দাস ডাঙৰীয়াৰ সভাপতিত্বত অনুষ্ঠিত হবলগীয়া ৰাজ্যিক কাৰ্য্যনিৰ্বাহক সভাত অসমৰ মাননীয় মুখ্যমন্ত্ৰী শ্ৰী সৰ্বানন্দ সোণোৱাল ডাঙৰীয়া, ৰাষ্ট্ৰীয় সাধাৰণ সম্পাদক মাননীয় ৰাম মাধৱ ডাঙৰীয়া আৰু নেডাৰ মাননীয় আহ্বায়ক ড° হিমন্ত বিশ্ব শৰ্মা ডাঙৰীয়া উপস্থিত থাকিব।
ভাৰতীয় জনতা পাৰ্টিৰ জ্যেষ্ঠ নেত্ৰী তথা ভাৰত চৰকাৰৰ মাননীয় বস্ত্ৰ শিল্প, মহিলা আৰু শিশু কল্যান দপ্তৰৰ মন্ত্ৰী শ্ৰী স্মৃতি ইৰাণী ডাঙৰীয়ানী আৰু ৰাষ্ট্ৰীয় সাংগঠনিক সহ সম্পাদক সৌদান সিং ডাঙৰীয়াই দিল্লীৰ পৰা ভাৰ্চুৱেলভাৱে মাৰ্গ দৰ্শন কৰিব।বিধান সভা নিৰ্বাচনৰ পূৰ্বে অনুষ্ঠিত হব লগীয়া এই পূৰ্ণাংগ কাৰ্য্যনিৰ্বাহক সভাত অৰ্থনৈতিক, ৰাজনৈতিক আৰু সাংগঠনিক দিশৰ কেইবাটাও গুৰুত্বপূৰ্ণ প্ৰস্তাৱ গ্ৰহণ কৰা হব আৰু দলৰ পৰৱৰ্তী ১০০ দিনৰ কৰ্মসূচী ঘোষণা কৰা হব।
সভাত ৰাজ্যিক বিষয়ববীয়া, ৰাষ্ট্ৰীয় বিষয়ববীয়া, কাৰ্য্য নিৰ্বাহক সদস্য, আমন্ত্ৰিত সদস্য, বিধায়ক, ৰাজ্যিক মুখপাত্ৰ, পেনেলিষ্ট, কোষৰ আহ্বায়ক আৰু সহ আহ্বায়ক, ৰাষ্ট্ৰীয় পৰিষদৰ সদস্য, নিগম-নিকায়ৰ অধ্যক্ষ আৰু উপাধ্যক্ষ, স্বায়ত্ত শাসিত পৰিষদৰ মুখ্য কাৰ্যবাহী সদস্য আৰু জিলা সভাপতি সকল উপস্থিত থাকিব।
