ষ্টাফ ৰিপৰ্টাৰ,ডিফু :
ভয়ঙ্কৰ গণ সংক্ৰমনৰ দিশে অগ্ৰসৰ হোৱাৰ প্ৰতি লক্ষ্য ৰাখি সদ্যহতে কাৰ্বি আংলং স্বায়ত্তশাসিত পৰিষদৰ ক’ৰোনাত আক্ৰান্ত ব্যক্তিসকলৰ সংস্পৰ্শলৈ অহা আমোলা, বিষয়া, কৰ্মীসকলক স্বয়ং কোৱাৰেণ্টাইন হোৱাৰ লগতে স্বাৱ টেষ্ট কৰাৰ আহ্বান জনাইছে কাৰ্বি আংলং জিলা প্ৰশাসনে ৷
উল্লেখ যোগ্য যে, এটা সময়ত ক’ৰোনামুক্ত বুলি খিয়াতি লাভ কৰা পাহাৰীয়া জিলা কাৰ্বি আংলঙ এতিয়া ক’ৰোনাৰ ভয়ংকৰ গণ সংক্ৰমনৰ দিশে অগ্ৰসৰ হোৱাত ৰাইজৰ মাজত চৰম আতংকই বিৰাজ কৰিছে ৷ বহিঃৰাজ্যত থকা জিলাখনৰ শ্ৰমিকসকল ক্ৰমান্বয়ে জিলাখনলৈ অহাত তেওঁলোকক প্ৰশাসনে সংশ্লিষ্ট কোৱাৰেণ্টাইন চেন্টাৰত ৰখাৰ ব্যৱস্থা কৰাৰ পিছত তেওঁলোকৰ মাজৰ পৰা একাংশৰ ক’ভিড পজিটিভ হোৱাত ডিফু চিকিৎসা মহাবিদ্যালয়ৰ ক’ভিড হাস্পাতালত চিকিৎসাৰ বাবে ভৰ্তি কৰোৱা হয় ৷ সিমানলৈকে ঠিকেই আছিল ৷ কিন্তু যোৱা কেইদিন ধৰি কোনো ভ্ৰমণ বৃত্তান্ত নথকা কেইজন মান ব্যক্তিৰ স্বাৱ টেষ্ট কৰোঁতে ৰিজাল্ট পজিটিভ অহাত জিলাখনৰ ৰাইজৰ মাজত অনাকাংখিত আতংকৰ সৃষ্টি হৈছে ৷
বিশেষকৈ চলিত সপ্তাহত কাৰ্বি আংলং স্বায়ত্তশাসিত পৰিষদৰ চিকিৎসা বিভাগৰ কাৰ্যবাহী সদস্য খনছিং ৰংপিৰ ক’ভিড-১৯ৰ অৱস্থিতি ধৰা পৰাৰ লগতে পৰিষদৰ কৃষি বিভাগৰ অতিৰিক্ত সঞ্চালক ৰামছিং হাঞ্চেৰ দেহতো ক’ভিড পজিটিভ ওলোৱাত জিলাখনৰ ক’ৰোনাৰ গণ সংক্ৰমনৰ উকমুকণি দিয়ে ৷
ইয়াৰ পিছতে আৰম্ভ হয় ইএম খনছিং ৰংপি আৰু কৃষি বিভাগৰ শীৰ্ষ বিষয়া ৰামছিং হাঞ্চেৰ সংস্পৰ্শলৈ অহা লোক সকলৰ স্বাৱ টেষ্টৰ প্ৰক্ৰিয়া ইতিমধ্যে জিলা প্ৰশাসনে আৰম্ভ কৰিছে ৷ আনহাতে ইএম খনছিং ৰংপিৰ প্ৰত্যক্ষ সংস্পৰ্শলৈ অহা পৰিষদৰ বিষয়া কৰ্মী সকলকো কোৱাৰেণ্টাইনত থকাৰ নিৰ্দেশ প্ৰদান কৰাৰ লগতে ইএম গৰাকীৰ পিছতে ৬ জুলাই নিশাৰ ভাগত কাৰ্বি আংলং স্বায়ত্তশাসিত পৰিষদত হাহাকাৰ সৃষ্টি কৰি পৰিষদৰ মুখ্য কাৰ্যবাহী সদস্য তুলিৰাম ৰংহাঙৰ পত্নী কাছে টেৰণপীৰ লগতে পুত্ৰ চেংকান ৰংহাঙৰ আৰু পৰিষদখনৰ অতি ব্যস্ত ইএম অমৰছিং তিচ’, ৰূপছিং টেৰণ আৰু এমএচি ৰামছিং তিমুঙৰ স্বাভ টেষ্টৰ ফলাফল পজিটিভ আহে ৷ এই পজিটিভ ফলাফলৰ পিছত জিলাখনে গণ সংক্ৰমনৰ এক জলন্ত সাক্ষ্য বহন কৰিছে ৷
আনহাতে কাৰ্বি আংলং স্বায়ত্ত শাসিত পৰিষদত প্ৰায় ৩০০ বিষয়া-আমোলাৰ লগতে কৃষি বিভাগৰ কাৰ্যালয়ৰ বহু বিষয়া কৰ্মচাৰী ক’ৰোনাক্ৰান্তসকলৰ সৈতে প্ৰত্যক্ষ বা পৰোক্ষ ভাবে সংস্পৰ্ষলৈ আহি তেওঁলোকেও যে আনলৈ ক’ৰোনা বিয়পাব সেয়া নিশ্চিত হৈ পৰিছে ৷ ইয়াৰোপৰি কেন্দ্ৰীয় চৰকাৰে আনলক ১ ঘোষণা কৰাৰ পিছত জিলাখনৰ ব্যস্ততম সদৰ চহৰ ডিফুত ৰাইজৰ মাজত কোনো ধৰণৰ সামাজিক দূৰত্ব ৰক্ষা নকৰা, এশ শতাংশ মাস্ক নিপিন্ধাকে আৰম্ভ কৰি ক’ৰোনাৰ বাবে থকা সতৰ্কতামূলক গাইডলাইনসমূহ ব্যাপক হাৰত উলংঘন কৰা পৰিলক্ষিত হৈছে ৷ জিলা প্ৰশাসনে ইতিমধ্যে ক’ৰোণাক্ৰান্তসকলৰ সংস্পৰ্শলৈ অহা পৰিষদৰ আমোলা, বিষয়া কৰ্মীসকলক স্বেচ্ছাই কঠোৰ কোৱাৰেণ্টাইনত থকাৰ লগতে আৰু স্বাৱ টেষ্ট কৰাৰ বাবে আহ্বান জনাইছে বুলি জানিব পৰা গৈছে ৷ এনে কৰিব নোৱাৰিলে ডিফুৰ লগতে সমগ্ৰ পাহাৰীয়া জিলাখনেই ক’ৰো’নাৰ হটবেডলৈ পৰিণত হোৱাটো নিশ্চিত৷
ইপিনে ৰাইজৰ মাজত সময় থাকোতে প্ৰয়োজনীয় সজাগতা সৃষ্টি নহ’লে ক’ৰোনাৰ সহজেই চিকাৰ হ’ব পাৰে বুলি সচেতন মহলে উদ্বিগ্নতা প্ৰকাশ কৰিছে ৷
