ছত্তীশগড়ৰ এটা শিশুৰ মুখত ফটকা বিস্ফোৰণৰ (Cracker Blast) ফলত মৃত্যু হয়। জানিব পৰা মতে, চুবুৰীটোৰ শিশুসকলে ঘৰৰ সন্মুখৰ পথত ফটকা ফুটাই আছিল। প্ৰায় দুবছৰীয়া শিশুটিও তাতেই আছিল। সকলোৰে অগোচৰতে ‘পপ-পপ’ নামৰ ফটকা হাতত তুলি লৈছিল। যিহেতু ফটকাবোৰ ৰঙীন কাগজত মেৰিয়াই থোৱা আছিল, গতিকে শিশুটিয়ে চকলেট বুলি ভুলতে মুখত ভৰাই দিয়ে আৰু কামোৰাৰ লগে লগে বিস্ফোৰণ ঘটে।
স্থানীয় সূত্ৰৰ পৰা জানিব পৰা মতে, এই বিস্ফোৰণত শিশুটিৰ মুখত আঘাতপ্ৰাপ্ত হয়। শীঘ্ৰে উদ্ধাৰ কৰি স্থানীয় চিকিৎসালয়লৈ লৈ যোৱা হয়। কিন্তু চিকিৎসাৰ সময়ত তেওঁৰ মৃত্যু হয়।
সীতাপুৰ থানাৰ নবপাৰা গাঁৱত যোৱা ৯ নৱেম্বৰৰ পুৱা সংঘটিত হয় এই ঘটনা। এজন তদন্তকাৰী আৰক্ষী বিষয়াই জনোৱা মতে, মৃত শিশুটিৰ নাম আদিত্য। যোৱা ১১ নৱেম্বৰত তেওঁৰ মৃত্যু হয়। আকস্মিক মৃত্যুৰ গোচৰ ৰুজু কৰি তদন্ত আৰম্ভ কৰা হৈছে । শিশুটিৰ পিতৃ ইন্দ্ৰজিৎ মাঝিয়ে সংবাদ প্ৰতিষ্ঠান পিটিআইক জনোৱা মতে, চুবুৰীৰ ল’ৰা-ছোৱালীবোৰে তেওঁক এই কথা জনায়।
ইন্দ্ৰজিতে কয়, “আদিত্যৰ নাক আৰু মুখৰ পৰা তেজ ওলাই আছিল। আমি প্ৰথমে তেওঁক সীতাপুৰ স্বাস্থ্য কেন্দ্ৰলৈ লৈ যাওঁ। তাত চিকিৎসাৰ পিছত তেজ বন্ধ হয়। তাৰ পিছত আমি তেওঁক ঘৰলৈ লৈ আহোঁ।” কিন্তু আকৌ ৰক্তক্ষৰণ আৰম্ভ হোৱাত পিছদিনা আদিত্যক আন এখন চিকিৎসালয়লৈ লৈ যোৱা হয়। তাতেই তেওঁৰ মৃত্যু হয়।
