কাছাৰত সংঘটিত হৈছে এক ৰহস্যজনক ঘটনা। কাছাৰৰ কালাইন ব্ৰাহ্মণগ্ৰামত সংঘটিত হৈছে এই ঘটনা। অঞ্চলটোত নিশা এটা পুখুৰীৰ পানীত ৰহস্যময় পোহৰ দেখা যায়। ইয়াকে লৈ অঞ্চলটোত তীব্ৰ চাঞ্চল্যৰ সৃষ্টি হয়। স্থানীয় একাংশ লোকে পুখুৰীৰ পানীৰ তলত পোহৰ প্ৰত্যক্ষ কৰে। কোনো জ্বলি থকা উৎসৰ পৰা এই পোহৰ নিৰ্গত হোৱা প্ৰত্যক্ষ কৰাৰ পাছতে ঘটনাস্থলীত শতাধিক লোকে ভিৰ কৰে। আনহাতে, কোনো বাহন দুৰ্ঘটনাগ্ৰস্ত হৈ পানীত পৰাত সেই বাহনৰ লাইট জ্বলি থকা বুলি একাংশ লোকে সন্দেহ প্ৰকাশ কৰে। সেই দুৰ্ঘটনাগ্ৰস্ত বাহনৰে হেডলাইট জ্বলি থকা বুলি একাংশ লোকে সন্দেহ প্ৰকাশ কৰে। ইয়াৰ পিছতে ঘটনাটোৰ বিষয়ে আৰক্ষীক খবৰ দিয়া হয়। এই খবৰ লাভ কৰাৰ পিছত আৰক্ষী আৰু এছডিআৰএফ বাহিনী ঘটনাস্থলীত উপস্থিত হয়।
ইয়াৰ পিছত এছডিআৰএফৰ জোৱানে পুখুৰীত নামি পোহৰৰ উৎসৰ সন্ধান চলায়। কিছু সময় পিছতে এছডিআৰএফে এই পোহৰৰ উৎসৰ সন্ধান লাভ কৰে। অৱশ্যে সেয়া কোনো দুৰ্ঘটনাগ্ৰস্ত গাড়ীৰ লাইটৰ পোহৰ বা কোনো অলৌকিক বস্তু নাছিল। পুখুৰীৰ পানীৰ তলৰ পৰা উদ্ধাৰ হয় এটা জ্বলন্ত টৰ্চলাইটহে। অৱশেষত টৰ্চ লাইটটো উদ্ধাৰ হোৱাৰ পাছত ৰহস্যময় পোহৰক লৈ সৃষ্টি হোৱা কৌতূহলৰ অৱসান ঘটে।
