এইবাৰৰ বিশ্বকাপত খেলপথাৰত স্বমহিমাৰে উজলি উঠিব পৰা নাই ক্রিষ্টিয়ানো ৰোনাল্ডো (Christiano Ronaldo) ৷ তেওঁক নিজৰ শ্ৰেষ্ঠ ৰূপত দেখা নাই অনুৰাগীয়ে। অৱশ্যে বিভিন্ন ভূমিকাত ফুটবল অনুৰাগীৰ হৃদয় জয় কৰি আহিছে চি আৰ-৭। এইবাৰ তেওঁৰ এজন অনুৰাগীলৈ প্ৰেৰণ কৰা ভিডিঅ’ মেছেজ ছ’চিয়েল মিডিয়াত ভাইৰেল হৈ পৰিছে।
ভূমিকম্পত বিধ্বস্ত ভেনিজুৱেলাৰ এজন অনুৰাগীলৈ ভিডিঅ’ বাৰ্তা প্ৰেৰণ কৰিছে ৰোনাল্ডোৱে। ভেনিজুৱেলাৰ যুৱক আন্দ্ৰেছ মাইলছ চি আৰ-৭ৰ অনুৰাগী। ভূমিকম্পত মাইলছৰ সমগ্ৰ পৰিয়ালৰ মৃত্যু হয়। তেওঁ কেনেবাকৈ বাচি যায়।
অৱশ্যে ভৰি এখন হেৰুৱায়। তীব্ৰ আঘাতৰ বাবে চিকিৎসকে ভৰিখন কাটি পেলায়। মাইলছ এতিয়াও চিকিৎসালয়ত চিকিৎসাধীন হৈ আছে। এইগৰাকী অনুৰাগীৰ অৱস্থাৰ বিষয়ে জানিব পাৰি ৰোনাল্ডোৱে তেওঁক ভিডিঅ’ মেছেজ প্ৰেৰণ কৰে।
ভিডিঅ’টোত পৰ্তুগালৰ অধিনায়কগৰাকীয়ে মাইলছক কয়, “হেল্ল’ আন্দ্ৰেছ, কেনে আছা? মই আপোনালৈ মৰম পঠিয়াবলৈ এই ভিডিঅ’টো বনাইছোঁ। মই জানো যে আপুনি মোৰ ডাঙৰ অনুৰাগী। সোনকালে ভাল হওক। তাৰ পিছত মই আপোনাক মোৰ এখন মেচ চাবলৈ নিমন্ত্ৰণ দিম। আপুনি মোৰ খেল সন্মুখৰ পৰা উপভোগ কৰিব পাৰিব। ঠিক আছে। ময়ো আপোনাক লগ পাব বিচাৰো। মৰম ল’ব বন্ধু।”
পৰ্তুগীজ সংবাদ মাধ্যমৰ প্ৰতিবেদন অনুসৰি, বিষয়টো গম পোৱাৰ পিছত ৰোনাল্ডোৱে এটা জাৰ্চিত চহী কৰি মাইলছলৈ প্ৰেৰণ কৰে। তেওঁ অনুৰাগীজনলৈ ৰাষ্ট্ৰীয় দলৰ জাৰ্চি পঠিয়ায়। ভেনিজুৱেলাত হোৱা ভূমিকম্পৰ পিছত ছ’চিয়েল মিডিয়াৰ পৰা ৰোণাল্ডোৱে মাইলছৰ বিষয়ে জানিব পাৰিছিল।
উল্লেখ্য যে শুকুৰবাৰে ক্ৰ’ৱেচিয়াৰ বিৰুদ্ধে ৰাউণ্ড অব ৩২ৰ মেচখনৰ পিছতে ফুটবল অনুৰাগীৰ হৃদয় জয় কৰিবলৈ সক্ষম হয় ৰোনাল্ডোৱে। তেওঁ ক্ৰ’ৱেচিয়াৰ অধিনায়ক লুকা মাড্ৰিকক সাৱটি ধৰি সান্ত্বনা দিয়ে।
তেওঁৰ সৈতে ৰোণাল্ডোৱে দীৰ্ঘদিন ধৰি পেছাদাৰী ফুটবলত একেলগে খেলিছিল। এই জয়ৰ পাছত তেওঁ এবছৰৰ পূৰ্বে মৃত্যু হোৱা ৰাষ্ট্ৰীয় দলৰ সতীৰ্থ ডিয়েগো জোটাকো স্মৰণ কৰে। তেওঁ ২১ নম্বৰৰ জাৰ্চিও পিন্ধিছিল। সেই জাৰ্চি পৰিধান কৰি ৰোণাল্ডোৱে প্ৰয়াত সতীৰ্থলৈ শ্ৰদ্ধা জনায়।
