অযোধ্যাৰ ৰাম মন্দিৰৰ (Ram Mandir) পৰা ধন আৰু মূল্যৱান সামগ্ৰী চুৰি (Stealing valuable items) কৰাৰ ঘটনাক লৈ ৰাষ্ট্ৰীয় স্বয়ংসেৱক সংঘই (RSS) মৌনতা ভংগ (Breaking the silence) কৰিছে। এক বিবৃতি প্ৰকাশ কৰি আৰএছএছে কয় যে চুৰিৰ দোষীক কঠোৰ শাস্তি প্ৰদান কৰিব লাগে। আৰএছএছৰ ভাষ্য অনুসৰি, এনে ঘটনাই হিন্দুসকলৰ আৱেগক আঘাত কৰিছে আৰু ই কোনো ধৰণে সহ্য কৰিব নোৱাৰি। সংঘই কয়, “ৰাম মন্দিৰৰ ঘটনাৰ পিছত যি বিভ্ৰান্তি আৰু অনিশ্চয়তাৰ সৃষ্টি হৈছে, তাৰ অন্ত পেলাব লাগিব।”
ৰাম মন্দিৰৰ পৰা ধন চুৰিৰ ঘটনা প্ৰথম পোহৰলৈ আহিছিল যোৱা ৭ জুনত। যেতিয়া বিষয়টোক লৈ হুলস্থুল আৰম্ভ হৈছিল তেতিয়া উত্তৰ প্ৰদেশৰ মুখ্যমন্ত্ৰী আদিত্যনাথে কয় যে এই ঘটনা সন্দৰ্ভত সম্পূৰ্ণ তদন্ত কৰা হ’ব। এটা বিশেষ তদন্তকাৰী দল (SIT) গঠন কৰা হৈছে। আৰক্ষীয়ে প্ৰাৰম্ভিক তদন্তত বিগত দুবছৰত অযোধ্যাৰ ৰাম মন্দিৰলৈ ভক্তসকলে দিয়া কোটি কোটি টকাৰ ধন লুণ্ঠন কৰা বুলি জানিব পৰা গৈছে। ৰাম মন্দিৰৰ একাংশ কৰ্মচাৰী (সেৱক), আনকি মন্দিৰ পৰিচালনাৰ দায়িত্বত থকা শ্ৰী ৰাম জন্মভূমি তীৰ্থক্ষেত্ৰ ট্ৰাষ্টৰ সদস্য আৰু বিষয়ববীয়াও ইয়াৰ লগত জড়িত হ’ব পাৰে বুলি এছআইটিয়ে সন্দেহ প্ৰকাশ কৰিছে। যোৱা ২৫ জুনত আঠজন অভিযুক্তক গ্ৰেপ্তাৰ কৰা হয়। ইয়াৰে আটাইকেইজনেই দানৰ ধন গণনাৰ লগত জড়িত আছিল।
আৰএছএছৰ সাধাৰণ সম্পাদক দত্তাত্ৰেয় হোছাবালেয়ে এক বিবৃতিত কয় যে আৰএছএছ আৰু সমগ্ৰ হিন্দু সমাজে মিলি আশা কৰিছে যে শ্ৰী ৰাম জন্মভূমি তীৰ্থক্ষেত্ৰ ট্ৰাষ্টে এই নিন্দনীয় ঘটনাক এক ব্যতিক্ৰমী বিষয় হিচাপে গণ্য কৰিব। মন্দিৰ পৰিচালনাৰ সকলো অভাৱ দূৰ কৰিবলৈ কৰ্তৃপক্ষই প্ৰয়োজনীয় পদক্ষেপ গ্ৰহণ কৰিব। তেওঁকয়, “অযোধ্যা মন্দিৰত ভগৱান ৰাম ভক্তসকলৰ বিশ্বাস আৰু ভক্তি যাতে অটল আৰু অদম্য হৈ থাকে তাৰ বাবে পদক্ষেপৰ প্ৰয়োজন।”
আৰএছএছে লগতে কয়, “দানৰ বাকচৰ পৰা ধন চুৰি হোৱাৰ ঘটনাই লাখ লাখ ৰামভক্তৰ আৱেগ আৰু বিশ্বাসত আঘাত হানিছে। এই ঘটনাত আমি সকলোৱে গভীৰভাৱে স্তম্ভিত আৰু দুখী হৈছোঁ। তদন্তত দোষী সাব্যস্ত হোৱা প্ৰতিজন ব্যক্তিকে ন্যায়ালয়ৰ কাঠগড়ালৈ আনিব লাগে আৰু আইন অনুসৰি কঠোৰতম শাস্তি প্ৰদান কৰিব লাগে।” ইয়াৰ সমান্তৰালকৈ আৰএছএছে হিন্দু সমাজক ধৈৰ্য বজাই ৰাখিবলৈ আৰু এই কঠিন সময়ত সংযম ৰক্ষা কৰাৰ লগতে চুৰিক কেন্দ্ৰ কৰি হিন্দুবিৰোধী শক্তিৰ সকলো প্ৰচেষ্টা বিফল কৰিবলৈও আহ্বান জনোৱা হৈছে।
