গুজৰাটৰ (Gujarat) সন্ত্ৰাসবাদ বিৰোধী শাখা আৰু ক’ষ্ট গাৰ্ডে গুজৰাট উপকূলৰ (Gujarat coast) পৰা ১১৫০ কোটি টকাৰ ড্ৰাগছ জব্দ (Drugs seized) কৰিছে। সংবাদ সংস্থা পি টি আয়ে প্ৰকাশ কৰা অনুসৰি, মুণ্ড্ৰা উপকূলৰ ওচৰত সন্দেহজনকভাৱে চলাচল কৰা এখন জাহাজক ক’ষ্ট গাৰ্ডে খেদি গৈ জাহাজখন জব্দ কৰে। ইয়াৰ পিছত ৰাজ্যখনৰ সন্ত্ৰাসবাদ বিৰোধী শাখাক অৱগত কৰা হয়। লগতে তিনিজন সৰবৰাহকাৰীক চমজাই দিয়া হয়।
আৰক্ষীৰ সূত্ৰ অনুসৰি, দুদিন পূৰ্বে ৰাজ্যখনৰ সন্ত্ৰাসবাদ বিৰোধী শাখাই গুজৰাট উপকূলৰ মাজেৰে বৃহৎ পৰিমাণৰ ড্ৰাগছ দেশত প্ৰৱেশ কৰিব পাৰে বুলি চোৰাংচোৱাৰ তথ্য লাভ কৰিছিল। ইয়াৰ পিছত সন্ত্ৰাসবাদ বিৰোধী শাখাই উপকূলীয় আৰক্ষী থানা আৰু উপকূলৰক্ষীক সতৰ্ক কৰি দিয়ে।
যোৱা দুদিন ধৰি উপকূলত কঠোৰ চোৰাংচোৱাগিৰি অব্যাহত আছিল। বুধবাৰে পুৱা ক’ষ্ট গাৰ্ডে মুণ্ড্ৰা বন্দৰৰ পৰা কিছু দূৰৈত এখন জাহাজ খেদি খেদি ধৰে। জাহাজখন জব্দ কৰি আৰক্ষীক খবৰ দিয়ে।
ৰাজ্যিক আৰক্ষীৰ সঞ্চালক প্ৰধান কে এল এন ৰাৱে জনোৱা মতে, মুণ্ড্ৰা বন্দৰৰ সমীপত এখন জাহাজ জব্দ কৰা হৈছে। ইয়াৰ পৰা উদ্ধাৰ হৈছে ১১৫ কেজি কোকেইন। তিনিজন বিদেশী নাগৰিকক গ্ৰেপ্তাৰ কৰা হৈছে। জানিব পৰা মতে, এই ড্ৰাগছ দিল্লীত তাঞ্জানিয়া আৰু উগাণ্ডাৰ দুই নাগৰিকক যোগান ধৰাৰ কথা আছিল। আটক কৰা লোকসকলৰ পৰা চেটেলাইট ফোন আৰু কিছু অত্যাধুনিক সা-সৰঞ্জাম উদ্ধাৰ কৰা হৈছে। ধৃত লোকসকলক সোধা-পোছা কৰাৰ পিছত জাহাজখন কেইবাখনো দেশৰ মাজেৰে ব্ৰাজিল হৈ পাকিস্তান পোৱাৰ কথা তেওঁ জানিবলৈ দিয়ে। তাৰ পৰা গুজৰাটলৈ আহে। জব্দ কৰা জাহাজখনৰ নাম হৈছে এম ভি ইউৰোপ। তাত ছয়টা বেগৰ পৰা উদ্ধাৰ হৈছে ১১৮ কেজি কোকেইন।
