ছিংগাপুৰৰ এখন আদালতে আদালত অৱমাননাৰ অপৰাধত বাইজুচৰ প্ৰতিষ্ঠাপক বাইজু ৰবিন্দ্ৰনক ৬ মাহৰ কাৰাদণ্ডৰ শাস্তি প্ৰদান কৰিছে।
জানিব পৰা মতে, ২০২৪ চনৰ এপ্ৰিল মাহৰ পৰা আৰম্ভ হোৱা বাইজুৰ সম্পত্তিৰ সৈতে জড়িত কেইবাটাও আদালতৰ আদেশ অমান্য কৰাৰ অভিযোগ উত্থাপন হৈছিল। সেই অভিযোগৰ ভিত্তিত শেহতীয়াকৈ বাইজুচৰ প্ৰতিষ্ঠাপকক কাৰাদণ্ড বিহা হৈছে।
বিভিন্ন সংবাদ মাধ্যমৰ সূত্ৰ অনুসৰি, আদালতে বাইজুক সংশ্লিষ্ট কৰ্তৃপক্ষৰ ওচৰত আত্মসমৰ্পণ কৰিবলৈ নিৰ্দেশ দিছে। একে সময়তে ৯০ হাজাৰ ছিংগাপুৰ ডলাৰ জমা দিবলৈও কোৱা হৈছে। অৱশ্যে বাইজু ছিংগাপুৰত আছে নে আন ঠাইত আছে সেয়া স্পষ্ট হোৱা নাই।
২০০৮ চনৰ পৰা ২০০৯ চনৰ ভিতৰত বাইজুৱে ভিডিঅ’ কোচিং আৰম্ভ কৰিছিল আৰু অৱশেষত দুবছৰৰ পিছত তেওঁ পত্নীৰ সৈতে এটা ষ্টাৰ্টআপ কোম্পানী গঢ়ি তুলিছিল। তাৰ নাম ৰাখে ‘বাইজুচ’। উক্ত কোম্পানীটোৱে যথেষ্ট উন্নতি কৰে। কেৱল ভাৰততে নহয়, বিশ্বৰ বিভিন্ন প্ৰান্তত জনপ্ৰিয় হৈ পৰে বাইজুচ।
বিভিন্ন বিদেশী কোম্পানীয়ে বিনিয়োগ কৰিবলৈ আৰম্ভ কৰে। কিন্তু ২০২২ চনৰ ছেপ্টেম্বৰ মাহত বাইজুচৰ বৃহৎ লোকচানৰ খবৰ ৰাজহুৱা কৰা হয়। জানিব পৰা মতে, যোৱা বিত্তীয় বৰ্ষত বাইজুচৰ ৪,৫৮৮ কোটি টকা লোকচান হৈছে। কৰ্মচাৰীৰ দৰমহাও প্ৰভাৱিত হয়। বাইজুৱে ক্ষতি চম্ভালিবলৈ বহুত চেষ্টা কৰে।
কিন্তু বাইজুচৰ ক্ষতিক একোৱেই ৰোধ কৰিব নোৱাৰিলে। বাইজুৰ বিৰুদ্ধে ঋণ পৰিশোধ নকৰাৰ অভিযোগ উত্থাপন হয়। একেধৰণৰ অভিযোগৰ ভিত্তিত দাখিল কৰা গোচৰত ছিংগাপুৰৰ এখন আদালতে বাইজুচৰ প্ৰতিষ্ঠাপকক ছমাহৰ কাৰাদণ্ড বিহে।
