কৰ্ণাটকত মুখ্যমন্ত্ৰী পৰিৱৰ্তন হ’ব নেকি? ডি কে শিৱকুমাৰ নতুন মুখ্যমন্ত্ৰী হ’ব, নে সিদ্দাৰমাইয়ায়ে সেই পদত থাকিব (Karnataka political Crisis) ? বৃহস্পতিবাৰৰ ভিতৰত ইয়াৰ উত্তৰ পোৱা যাব। এই কথা জনাইছে কৰ্ণাটকৰ গৃহমন্ত্ৰী জি পৰমেশ্বৰে।
কৰ্ণাটকত মুখ্যমন্ত্ৰী পৰিৱৰ্তনৰ সম্ভাৱনা, শিৱকুমাৰ যাব সিদ্দাৰমাইয়াৰ ঘৰলৈ:উল্লেখযোগ্য যে বৃহস্পতিবাৰে পুৱা মুখ্যমন্ত্ৰী সিদ্দাৰমাইয়াৰ ঘৰলৈ যাব শিৱকুমাৰ। বহুতৰ মতে সেই সময়তে দুয়োজন নেতাৰ মাজত চলি থকা জল্পনা-কল্পনা আৰু বিতৰ্কৰ বিষয়ে আলোচনা হ’ব পাৰে। আৰু তাৰ পিছত পৰৱৰ্তী সিদ্ধান্ত ঘোষণা হোৱাৰ সম্ভাৱনা আছে।
২০২৩ চনত কৰ্ণাটকৰ বিধানসভা নিৰ্বাচনত কংগ্ৰেছে জয়লাভ কৰাৰ পিছৰে পৰা মুখ্যমন্ত্ৰী পদক লৈ বিতৰ্কৰ সৃষ্টি হৈছে। সেই সময়ত কংগ্ৰেছ নেতৃত্বই জ্যেষ্ঠ নেতা সিদ্দাৰমাইয়াক মুখ্যমন্ত্ৰী হিচাপে বাছি লৈছিল।
শিৱকুমাৰক উপ-মুখ্যমন্ত্ৰী হিচাপে নিযুক্তি দিয়া হয়। সূত্ৰ অনুসৰি, ডেৰ-দুবছৰৰ পাছত মুখ্যমন্ত্ৰীৰ পদ সলনি হ’ব বুলি সিদ্ধান্ত লোৱা হয়। তাৰ পিছত কংগ্ৰেছ নেতৃত্বই শিৱকুমাৰক কৰ্ণাটকৰ মুখ্যমন্ত্ৰী হিচাপে নিযুক্তি দিব।
কিন্তু ডেৰ-দুবছৰৰ পাছত মুখ্যমন্ত্রীৰ পদ সলনি হোৱাৰ কোনো ইংগিত পোৱা নগ’ল। যাৰ ফলত কংগ্রেছৰ ভিতৰতে ‘সংঘাত’ৰ সৃষ্টি হয়৷ শিৱকুমাৰে এই সন্দৰ্ভত ৰাজহুৱাভাৱে কোনো মন্তব্য নকৰিলেও তেওঁৰ ঘনিষ্ঠ বিধায়কসকলে মুখ্যমন্ত্ৰীৰ পৰিৱৰ্তনৰ দাবী জনায়।
উপ-মুখ্যমন্ত্রী শিৱকুমাৰক মুখ্যমন্ত্রী পাতিবলৈ দলৰ ভিতৰতে দাবী উত্থাপন হৈছে৷ কেইমাহমান পূৰ্বে কৰ্ণাটক কংগ্ৰেছৰ বিধায়কৰ এটা অংশই দিল্লীত দলৰ নেতৃত্বক সাক্ষাৎ কৰাৰ পিছতে এই জল্পনা-কল্পনা বাঢ়ি যায়।
বিগত ৭ মাহ ধৰি চলি থকা এই বিতৰ্ক কেনেকৈ শেষ কৰিব পাৰি সেই সম্পৰ্কে দিল্লীত ব্যাপক চৰ্চা চলিছে। সিদ্দাৰমাইয়া আৰু শিৱকুমাৰে কংগ্ৰেছ হাইকমাণ্ডৰ সৈতে ধাৰাবাহিক বৈঠকত মিলিত হৈছে।
এই সন্দৰ্ভত মঙলবাৰে কংগ্ৰেছ সভাপতি মল্লিকাৰ্জুন খাৰ্গেৰ দিল্লীৰ বাংলোত লোকসভাৰ বিৰোধী দলপতি ৰাহুল গান্ধীৰ উপস্থিতিত এখন বৈঠক অনুষ্ঠিত হয়। ছয় ঘণ্টীয়া ৰুদ্ধদ্বাৰ বৈঠকত সিদ্দাৰমাইয়া আৰু শিৱকুমাৰৰ লগতে এআইচিচিৰ সাধাৰণ সম্পাদক কেচি বেণুগোপাল আৰু কৰ্ণাটকৰ পৰ্যবেক্ষক ৰণদীপ সিং সুৰজেৱালা উপস্থিত থাকে।
বৈঠকৰ শেষত বেণুগোপালে সিদ্দাৰমাইয়া আৰু শিৱকুমাৰক কাষত লৈ মুখ্যমন্ত্রীৰ পদ পৰিৱৰ্তনৰ সম্ভাৱনাক লৈ কোনো আলোচনা হোৱা নাই বুলি দাবী কৰে৷ আলোচনা কেৱল ১৮ জুনৰ ৰাজ্যসভা নিৰ্বাচন আৰু বিধান পৰিষদৰ ভোটক লৈহে আছিল। কংগ্ৰেছৰ এটা অংশই দাবী কৰিছে যে বৰ্তমান মুখ্যমন্ত্ৰীৰ পদৰ কোনো পৰিৱৰ্তন হোৱা নাই। অৱশ্যে তাৰ ফলত জল্পনা-কল্পনাৰ অন্ত পৰা নাই।
বিভিন্ন সূত্ৰই দাবী কৰিছে যে সিদ্দাৰমাইয়াই শীঘ্ৰে মুখ্যমন্ত্ৰীৰ পদৰ পৰা পদত্যাগ কৰিব পাৰে। সেই পৰিবেশত পৰমেশ্বৰে কৰ্ণাটকৰ কংগ্ৰেছ প্ৰভাৰী ৰণদীপ সুৰজেৱালা বেংগালুৰুলৈ যাব বুলি কয়। বৃহস্পতিবাৰে মুখ্যমন্ত্ৰী পৰিৱৰ্তন সন্দৰ্ভত থকা বিভ্ৰান্তি দূৰ হ’ব। তেওঁ লগতে কয়, “আপোনালোকে যি কৈছে সেয়া কেৱল জল্পনা-কল্পনা। ইয়াৰ বাস্তৱৰ লগত কোনো সম্পৰ্ক নাই।”
অৱশ্যে এই সন্দৰ্ভত অৱগত সূত্ৰৰ উদ্ধৃতি দি বিভিন্ন সংবাদ মাধ্যমে প্ৰকাশ কৰিছে যে কংগ্ৰেছ নেতৃত্বই সিদ্দাৰমাইয়াক মুখ্যমন্ত্ৰীৰ পদৰ পৰা পদত্যাগ কৰিবলৈ প্ৰস্তাৱ দিছে। তেওঁক পতিয়ন নিয়াবলৈ চেষ্টা কৰা হৈছে।
বিনিময়ত তেওঁৰ পুত্ৰ যতীন্দ্ৰক কেবিনেটলৈ অনা হ’ব বুলি কোৱা হৈছে। কেৱল সেয়াই নহয়, তেওঁক ৰাজ্যসভাৰ সাংসদ বনাবলৈও প্ৰস্তাৱ দিয়া হৈছিল। অৱশ্যে এটা মহলে দাবী কৰিছে যে সিদ্দাৰমাইয়া এতিয়াও মুখ্যমন্ত্ৰীৰ পদৰ পৰা পদত্যাগ কৰিবলৈ সাজু হোৱা নাই।
Related Posts
